រាជធានីភ្នំពេញ ៖ ការប្រកួតប្រដាល់ដណ្ដើមខ្សែក្រវាត់ជើងឯកគោជល់ក្នុងប្រភេទទម្ងន់៧៥គីឡូក្រាមនៅលើសង្វៀនទូរទស្សន៍ PNN ថ្ងៃអាទិត្យ ទី៩ តុលា ខាងមុខនេះ បានឈានចូលដល់សប្ដាហ៍ទី២ហើយ
រាជធានីភ្នំពេញ ៖ ការប្រកួតប្រដាល់ដណ្ដើមខ្សែក្រវាត់ជើងឯកគោជល់ក្នុងប្រភេទទម្ងន់៧៥គីឡូក្រាមនៅលើសង្វៀនទូរទស្សន៍ PNN ថ្ងៃអាទិត្យ ទី៩ តុលា ខាងមុខនេះ បានឈានចូលដល់សប្ដាហ៍ទី២ហើយ ។ ព្រំ សំណាង និង អ៊ុង វិរៈ មកពីក្លិបទ័ពពិសេសឆត្រយោង៩១១ដូចគ្នាសង្ឃឹមថាមិនដើរតាមគន្លងមាស ភារម្យ មកពីក្លិបកងទ័ពជើងទឹក និងសុខ ទូច មកពីក្លិបដែនសមុទ្រមានរិទ្ធ ដែលសុទ្ធតែត្រូវសន្លប់នៅក្រោមកណ្ដាប់ដៃកីឡាករថៃទាំង២នាក់នោះទេ ។
ព្រំ សំណាង នឹងជួបប្រកួតជាមួយកីឡាករថៃឈ្មោះ ណាក់ រ៉បដាំ ចំណែក អ៊ុង វិរៈ ប្រកួតជាមួយឡាករថៃឈ្មោះ តុងចៃ ច.ចាណាធីប ដែលឈ្មោះក្រៅហៅថា ភេច បូផា។ រវាង ព្រំ សំណាង និងកីឡាករថៃ ណាក់ រ៉បដាំ មានប្រវត្តិប្រកួតមិនខុសគ្នាប៉ុន្មានទេ ។ ព្រំ សំណាង ធ្លាប់ប្រកួតបាន៧៨ដង ឈ្នះ៦៥ដង ចាញ់១០ដង និងស្មើ៣ដង រីឯកីឡាករថៃធ្លាប់ប្រកួតបាន៨៥ដង ឈ្នះ៧២ដង ចាញ់១០ដង និងស្មើ៣ដង ។ កីឡាករទាំង២រូបធ្លាប់ជួបគ្នាម្ដងរួចមកហើយកាលពីប៉ុន្មានខែមុនដែលកាលណោះ ព្រំ សំណាង ជាអ្នកចាញ់ពិន្ទុ ទើបលើកនេះគេមិនអាចធ្វេសប្រហែសបានឡើយ ។
ចំណែកអ៊ុង វិរៈ ត្រូវបានអ្នកធ្លាប់តាមដានការប្រកួតភាគច្រើននិយាយថា ពិបាកវាយតម្លៃពីលទ្ធផលទុកមុនបានណាស់ ដោយសារកីឡាករថៃដែលរូបគេត្រូវជួបលើកនេះគឺជាជើងខ្លាំងល្បីឈ្មោះប្រចាំសង្វៀនទូរទស្សន៍ប៉ុស្តិ៍លេខ៣ ថៃ ។ យោងតាមប្រវត្តិ កីឡាករថៃតុងចៃ ច.ចាណាធីប ហៅភេច បូផា ធ្លាប់ប្រកួតបាន១២៥ដង ឈ្នះ១០០ដង និងចាញ់២៥ដង ចំណែក អ៊ុង វិរៈ ធ្លាប់ប្រកួតបាន៨៦ដង ឈ្នះ៧៦ដង ចាញ់៩ដង ស្មើ១ដង ។ ទោះបីយ៉ាងណា អ៊ុង វិរៈ ក៏មិនធម្មតាប៉ុន្មានដែរ គេធ្លាប់យកឈ្នះកីឡាករជើងខ្លាំងថៃជាច្រើននាក់រួចមកហើយ ដូច្នេះសម្រាប់ការប្រកួតលើកនេះ អ៊ុង វិរៈ នៅតែមានជំនឿចិត្តឈ្នះច្រើនជាងចាញ់ ។
ក្រៅពីគូដណ្ដើមខ្សែក្រវាត់នេះទៅនៅមានការប្រកួតដណ្ដើមជើងឯកម៉ារ៉ាតុនចំនួន២គូទៀត ដែលមានកីឡាករ ចៅ រស់ មកពីក្លិបសុភានូមានជ័យ ប្រកួតជាមួយកីឡាករ ផាត សូដាមកពីក្លិបអេភូថងកីឡា និងកីឡាករ សៅ ប៊ុនធឿន មកពីក្លិបតាព្រហ្មមានជ័យ ប្រកួតជាមួយកីឡាករ ឡុង វ៉ាន់ត មកពីក្លិបសាលវ័ន្តកីឡា ៕
ចែករំលែកព័តមាននេះ