រាជធានីភ្នំពេញ ៖ បន្ទាប់ពីអនុញ្ញាតឱ្យសម្រាកចំនួន១សប្ដាហ៍អបអរបុណ្យភ្ជុំ នៅថ្ងៃសៅរ៍ ទី៨ តុលា សប្តាហ៍នេះ ការប្រកួតដណ្ដើមពិន្ទុរវាងកីឡាករកម្ពុជា និងកីឡាករថៃរបស់ព្រឹត្តិការណ៍ប្រដាល់ដណ្ដើមជើងឯកខ្សែក្រវាត់ខារ៉ាបាវ
រាជធានីភ្នំពេញ ៖ បន្ទាប់ពីអនុញ្ញាតឱ្យសម្រាកចំនួន១សប្ដាហ៍អបអរបុណ្យភ្ជុំ នៅថ្ងៃសៅរ៍ ទី៨ តុលា សប្តាហ៍នេះ ការប្រកួតដណ្ដើមពិន្ទុរវាងកីឡាករកម្ពុជា និងកីឡាករថៃរបស់ព្រឹត្តិការណ៍ប្រដាល់ដណ្ដើមជើងឯកខ្សែក្រវាត់ខារ៉ាបាវ នឹងដល់ថ្ងៃកំណត់ទៀតហើយ ។ កីឡាករ២រូប គឺ រឿម វណ្ណៈ និងឌុម កែវដា នឹងធ្វើជាគូប្រកួតស៊ីសាច់ហុតឈាមជាមួយកីឡាករថៃ ដើម្បីដណ្ដើមយក៣ពិន្ទុទៅកាន់វគ្គបន្ត ។
លោក ញាណ សុធី អ្នករៀបចំកម្មវិធីប្រដាល់ប្រចាំស្ថានីយទូរទស្សន៍អាស៊ីអាគ្នេយ៍បានអះអាងថា ការប្រដាល់ដែលមានឈ្មោះថា «ប្រដាល់អន្តរជាតិជើងឯកខ្សែក្រវាត់ខារ៉ាបាវ» កាន់តែធ្វើឱ្យទាក់ទាញទ្វេដង ដោយសារតែការប្រកួតសម្រាប់ថ្ងៃសៅរ៍នេះ កាន់តែលេចឡើងនូវលទ្ធផលច្បាស់លាស់សម្រាប់អ្នកឈ្នះ ។ ការប្រកួតមួយនេះលោកថា កីឡាករទាំងខ្មែរ និងបរទេស នឹងឃើញពីការឈានឡើងរបស់ខ្លួនឱ្យតែរកបាន៣ពិន្ទុនៅក្នុងការប្រកួត អ៊ីចឹងហើយទើបលោកយល់ថា នេះជាការប្រកួតដែលធ្វើឱ្យកីឡាករកម្ពុជា និងថៃ មិនអាចប្រហែសបាន។ ក្នុងចំណោមកីឡាករកម្ពុជា មានតែកីឡាករវ័យក្មេង ឌុម កែវដា ម្នាក់ប៉ុណ្ណោះ ដែលរកបាន៦ពិន្ទុក្នុងការប្រកួតបើកឆាកកាលជុំទី១ និងទទួលបាន៣ពិន្ទុដោយស្វ័យប្រវត្តិលើកទី២ ខណៈដែលសប្ដាហ៍នេះគេនឹងប៉ះកីឡាករថៃដណ្ដើមយក៣ពិន្ទុបន្ថែមទៀតដើម្បីប្រាកដថា ពិតជាបានឈានឡើងទៅកាន់វគ្គបន្ទាប់។
លោកថា អ្នកមានពិន្ទុនាំមុខទាល់តែឈ្នះនៅថ្ងៃប្រកួតបន្តបន្ទាប់ទើបអាចកំណត់ពីជោគវាសនារបស់ខ្លួនបាន តែបើចាញ់ គឺមិនខុសពីរុញខ្លួនឯងឱ្យបាត់ឱកាសដណ្ដើមពាននោះទេ ដោយសារតែកីឡាករម្នាក់ៗសុទ្ធតែមានពិន្ទុប្រកៀកប្រកិតគ្នារៀងខ្លួន ។ កីឡាករកម្ពុជាផ្សេងទៀត ដែលមិនទាន់មានពិន្ទុស្មើនឹង ឌុម កែវដា ក៏មានសង្ឃឹមខ្ពស់ប្រសិនបើការប្រកួតរបស់គេសម្រាប់ថ្ងៃសៅរ៍នេះ និងថ្ងៃសៅរ៍សប្ដាហ៍ក្រោយទទួលបានជ័យជម្នះ ។ លោកនិយាយថា៖«ការប្រកួតហ្នឹងគឺគេឱ្យថៃប៉ះខ្មែរទាល់តែអស់ ប៉ុន្តែដល់ពេលគិតពិន្ទុ គឺខាងថៃគិតខាងថៃ ហើយខាងខ្មែរគិតខាងខ្មែរ ដល់អីុចឹងថៃដែលឈ្នះភាគច្រើន តែមានពិន្ទុទាបជាងគេក្នុងក្រុមថៃគង់តែធ្លាក់ដដែលទេ ទើបខ្ញុំថា អ្នកចាញ់អត់ទាន់ដឹងទេ ដោយសារយើងទើបតែប្រកួតចប់៤សប្ដាហ៍!» ។
លោកថា សមាសភាពកីឡាករដែលមានមុខក្នុងព្រឹត្តិការណ៍ប្រដាល់ដណ្ដើមខ្សែក្រវាត់ខារ៉ាបាវ សរុបមានចំនួន៨រូបដូចជាម្ចាស់ខ្សែក្រវាត់ K-Cement ឆៃ សារ៉ា មកពីក្លិបក្រសួងការពារជាតិ កីឡាករម៉ន ចាន់ដារ៉ា មកពីក្លិបការិយាល័យទី៥កងទ័ពជើងគោក ដែលបានចាញ់ការប្រកួតរួចទៅហើយ កីឡាករ រឿម វណ្ណៈ មកពីក្លិបរាជសីហ៍ខេត្តបន្ទាយមានជ័យ និងកីឡាករ ឌុម កែវដា មកពីក្លិបមកុដរាជសីហ៍ ដោយក្នុងចំណោមពួកគេទើបតែមាន ឌុម កែវដា ម្នាក់គត់ដែលរកបាន៦ពិន្ទុមុនគេ និងកំពុងត្រៀមយក៣ពិន្ទុបន្ថែមទៀតនៅសប្ដាហ៍នេះ។ សម្រាប់កីឡាករថៃលោកថា មានសុទ្ធតែកីឡាករល្អៗទាំងអស់ដូចជាជើងខ្លាំង Aram Boy កីឡាករ Pha Yalek កីឡាករ Pravit និងកីឡាករ Yort Sayam ។
សមាសភាពកីឡាករដែលត្រូវប្រកួតនៅរសៀលថ្ងៃសៅរ៍ចុងសប្តាហ៍នេះរួមមាន កីឡាករ រឿម វណ្ណៈ ប៉ះប្រកួតជាមួយកីឡាករថៃឈ្មោះ Aram Boy ដើម្បីប្រជែងយក៣ពិន្ទុទៅកាន់វគ្គបន្ត ។ មួយគូទៀត គឺកីឡាករកម្ពុជា ឌុម កែវដា ប៉ះជាមួយកីឡាករថៃឈ្មោះ Pha Yaklek ដែលជាជើងខ្លាំងម្នាក់ក្នុងពូលថៃ ។ ជំនួបរបស់ពួកគេមានការចាប់អារម្មណ៍យ៉ាងពេញទំហឹង ដោយសារតែម្នាក់ៗសុទ្ធតែត្រូវការ៣ពិន្ទុដើម្បីគេចចេញពីការហាលអាវក្នុងពេលគិតពិន្ទុ ។ ជាពិសេសចំពោះកីឡាករកម្ពុជា រឿម វណ្ណៈ បើភ្លាត់ចាញ់ថៃ គឺមិនខុសពីធ្លាក់ស្វ័យប្រវត្តិនោះទេ ក្នុងពេលដែលកីឡាករ ឌុម កែវដា បានឡើងទៅកាន់វគ្គបន្ត បើទោះជាមានលទ្ធផលមិនល្អក្នុងការប្រកួតលើកនេះក៏ដោយ ។
កីឡាករ រឿម វណ្ណៈ និង ឌុម កែវដា សុទ្ធតែអះអាងថា ព្រឹត្តិការណ៍ដណ្ដើមពិន្ទុរបស់ក្រុមហ៊ុនភេសជ្ជៈខារ៉ាបាវ សំខាន់ក្នុងការប្រជែងយកជើងឯក ទើបម្នាក់ៗយល់ថា ការប្រកួតរបស់ពួកគេនៅរសៀលថ្ងៃសៅរ៍សប្ដាហ៍នេះ គឺសំខាន់ ។ កីឡាករទាំងពីរបានអះអាងថា ពួកខ្លួនមានការប្រឹងប្រែងសំបើមណាស់ក្នុងការហ្វឹកហាត់ ដោយសារម្នាក់ៗមានបំណងតែមួយគត់ គឺចង់ឈានឡើងក្រេឌីត និងធ្វើឱ្យអ្នកទស្សនាមើលឃើញពីការប្រឹងប្រែងរបស់ខ្លួនគេនៅលើសង្វៀន។ យ៉ាងណាមិញ លោក ញាណ សុធី ហាក់មិនហ៊ានរំពឹងថា ការប្រកួតរបស់កីឡាករទាំង៤រូប កីឡាករកម្ពុជានឹងឈ្នះកីឡាករថៃនោះទេ ក្នុងពេលដែលកីឡាករថៃបានបន្តឈ្នះកីឡាករកម្ពុជាជាបន្តបន្ទាប់ ។ លោកយល់ថា ឌុម កែវដា ដ្បិតថាទទួលបាន៦ពិន្ទុ ប៉ុន្តែ៣ពិន្ទុលើកទី២ជាពិន្ទុដែលបានពីកីឡាករមានរបួសហើយបោះបង់សិទ្ធិប្រកួតប៉ុណ្ណោះ ។ ការប្រកួតលើកនេះ នឹងក្លាយជាការប៉ះគ្នាដែលកីឡាករ រឿម វណ្ណៈ និង ឌុម កែវដា ម្នាក់ៗសុទ្ធតែត្រូវការឈ្នះ ដោយសារតែពួកគេចង់បានតំណែងជើងឯកនៅក្នុងព្រឹត្តិការណ៍ប្រដាល់ជើងឯករបស់ក្រុមហ៊ុនខារ៉ាបាវ ដែលទើបចាប់ដៃបង្កើតឡើងក្នុងគោលបំណងលើកស្ទួយកីឡាប្រដាល់ជាមួយទូរទស្សន៍អាស៊ីអាគ្នេយ៍ ៕
ចែករំលែកព័តមាននេះ