មិនថាពេលបែកគ្នាពីគូស្នេហ៍ ពេលមើលឈុតឆាកកម្សត់ក្នុងភាពយន្ត ឬពេលដែលអ្នកមិនសប្បាយចិត្តនៅកន្លែងការងារ អ្នកតែងតែយំ ។ ទោះបីជាពេលសប្បាយចិត្ត ដូចជាការមើលឃើញកូនរបស់អ្នកជាលើកដំបូង ឬជួបជាមួយមិត្តចាស់បន្ទាប់ពីបែកគ្នាជាច្រើនឆ្នាំមកហើយ ក៏រឿងទាំងនេះសុទ្ធតែអាចនាំឲ្យយើងទឹកភ្នែកបានដែរ ។
ទាំងនេះគឺជាហេតុផលដ៏គួរឱ្យភ្ញាក់ផ្អើលមួយចំនួនបង្ហាញថា ហេតុអ្វីបានជាយំគឺពិតជាមានផលល្អសម្រាប់អ្នក៖
១-ជួយបណ្តេញជាតិពុល
ការយំអាចជួយជម្រះជាតិពុល និងសារធាតុគីមីមួយចំនួនចេញពីរាងកាយរបស់អ្នក ដែលជាតិពុល និងសារធាតុគីមីទាំងនេះបង្កើនកម្រិតអ៊រម៉ូនគ័រទីស៊ុល ដែលវាជាអ៊រម៉ូនទាក់ទងទៅនឹងភាពតានតឹង ។
ដូចជាការបញ្ចេញសារធាតុអ៊ិចសូគ្រីនដទៃទៀត រួមមានទឹកនោម ញើស និងការដកដង្ហើមចេញ ការយំអាចជួយបំបាត់សារធាតុគីមីដែលបង្កឲ្យមានភាពតានតឹង និងជាតិពុលដែលបានមកពីភាពតានតឹងផ្លូវអារម្មណ៍ចេញពីរាងកាយ ដោយសារសារធាតុពុលទាំងនេះអាចប៉ះពាល់ដល់សុខភាពរបស់អ្នកបាន ។
ទឹកភ្នែកជួយក្នុងការបញ្ចេញជាតិពុល និងសារធាតុគីមីដូចជាអ៊័រម៉ូន adrenocorticotropic (ACTH) និងប្រូតេអុីន prolactin ខណៈពេលដែលវាជំរុញការបញ្ចេញ leucine-enkephalin ដែលវាមានតួនាទីជាថ្នាំបំបាត់ការឈឺចាប់ពីធម្មជាតិសម្រាប់រាងកាយ។
២-បន្ធូរបន្ថយភាពតានតឹង
ការយំគឺជាវិធីដែលមានសុវត្ថិភាព និងមានប្រសិទ្ធភាពក្នុងការបន្ធូរបន្ថយភាពតានតឹង ។
ទឹកភ្នែកផ្លូវចិត្ត គឺជាហេតុផលសំខាន់សម្រាប់ការបញ្ចេញអ៊រម៉ូនគ័រទីស៊ុលដែលលើសពីរាងកាយ។ ខណៈពេលដែលអ្នកយំ ទឹកភ្នែករបស់អ្នកនឹងច្រានអ៊័រម៉ូននេះចេញ ហើយភាពតានតឹងរបស់អ្នកនឹងធូរស្បើយ និងធ្វើឱ្យអ្នកមានអារម្មណ៍ប្រសើរជាងមុន ។
លើសពីនេះទៅទៀត ទឹកភ្នែកមានសារធាតុម៉ង់ហ្គាណែ (សារធាតុរ៉ែផ្លាស់ប្តូរអារម្មណ៍) ៣០ដងច្រើនជាងឈាមរបស់អ្នក ។ ដូច្នេះការយំអាចបំបាត់សារធាតុនេះចេញពីរាងកាយ និងធ្វើឱ្យអ្នកមានអារម្មណ៍ថាធូរស្រាលជាងមុននិងគ្មានភាពតានតឹង ។
ក្នុងអំឡុងពេលដែលអ្នកមានភាពតានតឹង ការយំគឺជាមធ្យោបាយដ៏ល្អបំផុត។ វាជួយកាត់បន្ថយហានិភ័យនៃការគាំងបេះដូង និងការខូចខាតខួរក្បាល។ ភាពតានតឹងមានការទាក់ទងទៅនឹងបញ្ហាសុខភាពមួយចំនួនដូចជាជំងឺបេះដូង សម្ពាធឈាមឡើងខ្ពស់ ជំងឺទឹកនោមផ្អែមប្រភេទទី២ និងភាពធាត់ ។
៣-ធ្វើឱ្យមានអារម្មណ៍ល្អ
ការមើលខ្សែភាពយន្ដកម្សត់ ហើយយំនឹងធ្វើឱ្យអារម្មណ៍របស់អ្នកមានការធ្លាក់ចុះ ប៉ុន្តែក្រោយមកអ្នកនឹងមានអារម្មណ៍កាន់តែ ល្អឡើងៗ ។ ការយំបញ្ចេញអ៊រម៉ូន endorphins ដែលជាអ៊រម៉ូនធ្វើឲ្យអ្នកមានអារម្មណ៍ល្អ។ លើសពីនេះទៀត អរម៉ូន endorphins មានឥទ្ធិពលតិចតួចដូចថ្នាំងងុយគេងដែលជួយឱ្យអ្នកគេងលក់ស្រួលបន្ទាប់ពីយំហើយ ។
ការសិក្សាមួយក្នុងឆ្នាំ២០១១ ដែលបានចេញផ្សាយនៅក្នុងទិនានុប្បវត្តិនៃការស្រាវជ្រាវនៅក្នុងមនុស្ស ម្នាក់ៗ បានបង្ហាញការណ៍ពិតថា ការយំពិតជាធ្វើឱ្យអ្នកមានអារម្មណ៍ប្រសើរឡើង ។
ការសិក្សាមួយនៅឆ្នាំ២០១៤ បានចុះផ្សាយនៅក្នុងគេហទំព័រព្រំដែនចិត្តវិទ្យាបានបង្ហាញថា ការយំអាចជាការព្យាបាលខ្លួនឯង និងអាចជួយអារម្មណ៍ឲ្យមានភាពល្អប្រសើរជាងថ្នាំប្រឆាំងនឹងជម្ងឺធ្លាក់ទឹកចិត្ត ។
ទោះជាយ៉ាងណា អ្នកដែលមានជំងឺថប់អារម្មណ៍មិនសូវទទួលបានផលប្រយោជន៍ពីការយំទេ។
៤-ធ្វើឲ្យគំហើញមានភាពកាន់តែល្អ
ការយំអាចជួយសម្អាត និងការពារភ្នែករបស់អ្នកពីការរលាក ព្រមទាំងធ្វើឱ្យប្រសើរឡើងនូវគំហើញ ។
នៅពេលដែលភ្នែករបស់អ្នកមានកម្ទេចកំទី រឺសត្វល្អិតចូល ក្រពេញ lacrimal របស់អ្នកនឹងត្រូវបានភ្ញោច ហើយវានឹងបញ្ចេញសារធាតុរាវកាន់តែច្រើនចូលទៅក្នុងភ្នែក ដើម្បីសំអាតនិងបញ្ចេញអ្វីដែលបានចូលក្នុងភ្នែករបស់អ្នក ។
សារធាតុរាវនេះត្រូវបានគេស្គាល់ថាជា ទឹកភ្នែកដែលកើតឡើតពីរំញោច ។ វាមានជាតិស្ករ និងសារធាតុ lysozyme អង់ស៊ីមប្រឆាំងបាក់តេរី និងវីរុសដែលការពារ និងចិញ្ចឹមកោសិកានៅលើផ្ទៃខាងក្នុងភ្នែក ។ វារំលាយ និងបំបែកសម្បកការពារខាងក្រៅនៃបាក់តេរី ហើយសម្លាប់ពួកវា និងការពារការខូចខាតភ្នែក ។
លើសពីនេះទៅទៀត វិទ្យាស្ថានភ្នែកបានចែងថា ការយំអាចជួយរក្សាភ្នាសសើមខាងក្នុងភ្នែក ផ្តល់សំណើម និងរំអិលភ្នែកផងដែរ ។ ការយំនឹងរក្សារជាតិសំណើមក្នុងភ្នែក ហើយជាតិសំណើមនេះនឹងលាងសំអាតកម្ទេចកំទី និងភាពកខ្វក់ចេញពីភ្នែក ។
ការរំអិល និងការផ្តល់សំណើមដល់គ្រាប់ភ្នែក និងត្របកភ្នែកជួយឲ្យគំហើញរបស់យើងមានភាពប្រសើរឡើង ។ បន្ទាប់ពីយំ អ្នកនឹងមានគំហើញល្អប្រសើរជាងមុន និងច្បាស់ជាងមុន ៕
ចែករំលែកព័តមាននេះ