រាជធានីភ្នំពេញ ៖ ពុំមាននរណាម្នាក់បានដឹងទេថា បណ្ដាលមកពីមូលហេតុអ្វីឡើយ នៅសុខៗស្រាប់តែទូកុងតឺន័រ១ ដែលផ្ទុកដោយទំនិញចម្រុះច្រើនមុខនាំចូលមកពីប្រទេសចិន មានតម្លៃរាប់ម៉ឺនដុល្លារត្រូវភ្លើងឆាបឆេះ ដែលហេតុការគ្រោះអគ្គិភ័យនេះបង្កឲ្យមានការរភ្ញាក់ផ្អើល កាលពី៦និង៣០នាទីព្រឹក ថ្ងៃទី២១…
រាជធានីភ្នំពេញ ៖ ពុំមាននរណាម្នាក់បានដឹងទេថា បណ្ដាលមកពីមូលហេតុអ្វីឡើយ នៅសុខៗស្រាប់តែទូកុងតឺន័រ១ ដែលផ្ទុកដោយទំនិញចម្រុះច្រើនមុខនាំចូលមកពីប្រទេសចិន មានតម្លៃរាប់ម៉ឺនដុល្លារត្រូវភ្លើងឆាបឆេះ ដែលហេតុការគ្រោះអគ្គិភ័យនេះបង្កឲ្យមានការរភ្ញាក់ផ្អើល កាលពី៦និង៣០នាទីព្រឹក ថ្ងៃទី២១ ខែមេសានេះ នៅក្នុងផែស្ងួតហុង ឡេងហួរ ស្ថិតនៅក្នុងភូមិកន្ទោកខាងជើង សង្កាត់កន្ទោក ខណ្ឌកំបូល រាជធានីភ្នំពេញ។
បន្ទាប់ពីការស្ទូចដាក់ចុះពីលើរថយន្តតម្កល់ទុក នៅក្នុងផែស្ងួតហុង ឡេងហួរ បានត្រឹមតែរយៈពេល៣ម៉ោងកន្លះប៉ុណ្ណោះ ហើយភ្លាមៗនោះ បើទោះបីជាបុគ្គលិកកម្មករនៅក្នុងផែស្ងួតខាងលើនាំគ្នាយកបំពង់ពន្លត់អគ្គិភ័យតូច ធំជាច្រើនបំពង់ ព្រមទាំងប្រើទុយោទឹកទៅបាញ់ពន្លត់យ៉ាងណាក៏ភ្លើងមិនរលត់ឡើយ ។
រហូតមានការអន្តរាគមន៍ពីរថយន្តពន្លត់អគ្គិភ័យចំនួន៣គ្រឿង និងប្រើគ្រឿងចក្រស្ទូចលើកបំបះទូកុងតឺន័រចាក់ទំនិញក្នុងនោះចេញក្រៅទើបពន្លត់រលត់ទាំងស្រុង ។
កម្មករដែលបម្រើការងារនៅផែស្ងួតនោះបានប្រាប់ឲ្យដឹងថា ទូកុងតឺន័រដែលរងនូវការឆាបឆេះនេះទើបតែដឹកតាមរថយន្តមកពីខេត្តព្រះសីហនុមកដល់ផែស្ងួត និងទម្លាក់ចុះ កាលពីវេលាម៉ោង៣យប់ទៀបភ្លឺ ថ្ងៃកើតហេតុនេះប៉ុណ្ណោះ ។
ដោយនៅក្នុងមានផ្ទុកទៅដោយទំនិញជាចម្រុះជាច្រើនមុខ រួមមានគ្រឿងអេឡិចត្រូនិច ម៉ូទ័របូមខ្យល់ គ្រឿងជ័រប្លាស្ទិកជាដើម ដែលនាំចូលពីប្រទេសចិន និងមានតម្លៃរាប់ម៉ឺនដុល្លារ ។
ក្រោយពីការទម្លាក់ចុះពីរថយន្តរួចរាល់ទំនិញទាំងអស់នោះបានស្ថិតនៅក្នុងទូកុងតឺន័រនេះ ដោយម្ចាស់ពុំទាន់បានរើចេញក្រៅ និងដឹកជញ្ជូនចេញទៅកាន់ឃ្លាំងរបស់ខ្លួននៅឡើយទេ ។
កម្មករខាងលើប្រាប់ឲ្យដឹងបន្តទៀតថា ពុំមាននរណាម្នាក់បានដឹងថា មូលហេតុនៃការឆាបឆេះនេះបង្កឡើងដោយសារតែអ្វីឲ្យប្រាកដនោះទេ ព្រោះទូកុងតឺន័របិទជិតគ្មានប្រហោងដែលអាចគេលួចដុត ឬបោះកន្ទុយបារីចូលទៅបានឡើយ ។
ម្យ៉ាងទៀត សូម្បីតែសមត្ថកិច្ចក៏ពុំទាន់កំណត់ពីមូលហេតុនេះបានដែរ ប៉ុន្តែមានការសន្និដ្ឋានមិនផ្លូវការថា អាចបណ្ដាលមកពីការឆ្លងចរន្តគ្រឿងអេឡិចត្រូនិកណាមួយ ដែលជាទំនិញនៅក្នុងនោះប៉ុណ្ណោះ ។
ប្រភពដដែលបានប្រាប់ទៀតថា នៅពេលកើតហេតុ មានអ្នកបើកបររថយន្តនៅក្នុងផែស្ងួតខាងលើនោះបានដើរទៅរកកន្លែងបន្ទោរបង់ដោយដើរឆ្លងកាត់តាមទីនោះក៏ស្រាប់តែប្រទះឃើញមានផ្សែងហុយចេញពីក្នុងទូរកុងតឺន័រខាងលើ ។ ខណៈនោះបានស្រែកប្រាប់គ្នា ទើបបង្កឲ្យមានការភ្ញាក់ផ្អើលឆោឡោទាំងព្រឹក ភ្លាមៗនោះបុគ្គលិកកម្មករទាំងអស់ ដែលស្ថិតនៅក្នុងផែស្ងួតនេះ នាំគ្នាពន្លត់ទាំងស្លន់ស្លោ ដោយអ្នកខ្លះបានយកបំពង់ពន្លត់អគ្គិភ័យតូច និងធំជាច្រើនបំពង់ទៅបាញ់ពន្លត់ ។
រីឯអ្នកខ្លះទៀតបានយកទុយោទឹកទៅបាញ់ពន្លត់យ៉ាងសស្រាក់សស្រាំ ប៉ុន្តែភ្លើងមិនត្រឹមតែមិនថមថយ ឬរលត់ប៉ុណ្ណោះទេ ថែមទាំងឆេះកាន់តែខ្លាំងឡើងទៀតផង ហើយដោយសារតែពុំអាចទប់ទល់បាន ទើបជូនដំណឹងដល់អាជ្ញាធរដើម្បីសុំរថយន្តពន្លត់អគ្គិភ័យទៅជួយអន្តរាគមន៍តែម្ដង។
ប្រភពមួយនេះបានរៀបរាប់ឲ្យដឹងទៀតថា ក្រោយពីទទួលបានដំណឹងនេះអាជ្ញាធរបានហៅរថយន្តពន្លត់អគ្គិភ័យចំនួន៣គ្រឿងទៅបាញ់ពន្លត់ភ្លាមៗ ក្នុងនោះមានរថយន្តពន្លត់អគ្គិភ័យដែលប្រចាំការនៅសាលាខណ្ឌកំបូល១គ្រឿង និងរថយន្តពន្ល់អគ្គិភ័យអង្គភាព៧១១ កងពលតូចលេខ៧០ចំនួន២គ្រឿង ។ ប៉ុន្តែដោយសារតែសម្ភារៈនៅក្នុងទូកុងតឺន័រពិបាកក្នុងការបាញ់ពន្លត់នោះទើបអាជ្ញាធរប្រាប់ឲ្យខាងផែស្ងួតយកគ្រឿងចក្រ១គ្រឿង ទៅស្ទូចបំបះចាក់សម្ភារៈចេញពីក្នុងទូកុងតឺន័រ ។
បន្ទាប់មកទើបបាញ់ទឹកពន្លត់រហូតភ្លើងរលត់ទៅវិញទាំងស្រុងនាវេលាម៉ោង៨និង៣០នាទីព្រឹក ថ្ងៃដដែលនោះ ហើយនៅពុំទាន់ដឹងថាទំហំនៃការខូចខាតដែលបង្កឡើងដោយគ្រោះអគ្គិភ័យនេះគិតជាទឹកប្រាក់ប៉ុន្មានម៉ឺនដុល្លារនៅឡើយទេ ៕
ចែករំលែកព័តមាននេះ