៤ថ្ងៃហើយ បញ្ហាសំរាមរាយប៉ាយពាសវាលពាសកាលក្នុងក្រុងសែនមនោរម្យ
- មណ្ឌលគិរី
អស់រយៈពេល៤ថ្ងៃមកហើយ បន្ទាប់ពីពិធីបុណ្យចូលឆ្នាំថ្មីប្រពៃណីជាតិខ្មែរត្រូវបានបញ្ចប់ សំរាមត្រូវបានគេមើលឃើញថា
អស់រយៈពេល៤ថ្ងៃមកហើយ បន្ទាប់ពីពិធីបុណ្យចូលឆ្នាំថ្មីប្រពៃណីជាតិខ្មែរត្រូវបានបញ្ចប់ សំរាមត្រូវបានគេមើលឃើញថា
ខេត្តមណ្ឌលគិរី ៖ អស់រយៈពេល៤ថ្ងៃមកហើយ បន្ទាប់ពីពិធីបុណ្យចូលឆ្នាំថ្មីប្រពៃណីជាតិខ្មែរត្រូវបានបញ្ចប់ សំរាមត្រូវបានគេមើលឃើញថា រាយប៉ាយពាសវាលពាសកាល ខណៈក្រុមហ៊ុនដេញថ្លៃទទួលខុសត្រូវសំរាមនៅក្រុងសែនមនោរម្យ មិនទាន់ដំណើរការប្រមូលសំរាមឡើងវិញ ធ្វើឲ្យមានការកកស្ទះសំរាមតាមផ្ទះប្រជាពលរដ្ឋ និងផ្លូវសាធារណៈផងដែរ។
ដើម្បីថែរក្សាបរិស្ថានល្អស្អាត នៅព្រឹកថ្ងៃទី២០ ខែមេសា ឆ្នាំ២០២២នេះ មន្ទីរបរិស្ថានខេត្តមណ្ឌលគិរី ក៏បានចុះធ្វើយុទ្ធនាការសម្អាតបរិវេណក្នុងក្រុងសែនមនោរម្យតែម្តង។
មន្ទីរបរិស្ថានខេត្តមណ្ឌលគិរី ក៏បានក្រើនរម្លឹក ក៏ដូចជា ជំរុញឱ្យក្រុមហ៊ុនប្រមូលសំរាមត្រូវមានភាពម្ចាស់ការលើខ្លួនឯង ព្រោះឃើញថា តាំងពីមុនព្រះរាជពិធីបុណ្យចូលឆ្នាំប្រពៃណីជាតិ រហូតមកដល់ពេលនេះ មិនទាន់ឃើញក្រុមហ៊ុនប្រមូលសំរាមវិលត្រឡប់មកប្រមូលសំរាមក្នុងក្រុងសែនមនោរម្យវិញទេ ដូចច្នេះហើយទើបមន្ទីរបរិស្ថានខេត្តមណ្ឌលគិរី បានប្រើប្រាស់ធនធានផ្ទាល់ ដើម្បីប្រមូលសំរាមក្នុងក្រុងសែនមនោរម្យ នឹងសំណូមពរដល់ស្ថាប័នសាធារណៈ និងឯកជន អាជ្ញាធរគ្រប់លំដាប់ថ្នាក់ ប្រជាពលរដ្ឋ ចូលរួមធ្វើអនាម័យ និងថែរក្សាបរិស្ថានជាប្រចាំនៅតាមមូលដ្ឋានរបស់ខ្លួន។ ជាពិសេសអាជ្ញាធរមូលដ្ឋាន ជាមួយអ្នកពាក់ព័ន្ធធ្វើការអប់រំផ្សព្វផ្សាយដល់ប្រជាពលរដ្ឋពីការគ្រប់គ្រងទុកដាក់សំរាម និងសំណល់រឹងឲ្យបានត្រឹមត្រូវផងដែរ។
ការធ្វើយុទ្ធនាការសម្អាតខាងលើនេះ នឹងក្លាយជាចរន្តចលករដែលជំរុញអោយមានការផ្តើមធ្វើសកម្មភាពមេត្រីភាពបរិស្ថានចេញពីបុគ្គលម្នាក់ៗ ក្នុងការចេះទទួលខុសត្រូវក្នុងការទុកដាក់សំរាម សំណល់រឹង និងមិនបោះចោលពាសវាលពាសកាលនៅតាមទីសាធារណៈ ជាហេតុធ្វើអោយប៉ះពាល់ដល់សោភ័ណភាពទីក្រុង ដែលពោរពេញដោយសម្រស់ធម្មជាតិមួយនេះ ជាពិសេសគឺសេចក្តីថ្លៃថ្នូរបស់ខ្លួនឯងផ្ទាល់។
សាធារណជនទាំងអស់ដែលបានមកលេងខេត្តមណ្ឌលគិរី បន្ទាប់ពីបុណ្យចូលឆ្នាំប្រពៃណីជាតិរួច សូមជួយថែរក្សាអនាម័យបរិស្ថានទាំងអស់គ្នា អនាម័យខ្លួនឯងជាប្រចាំ ទុកដាក់ និងញែកសំរាមអោយត្រូវក្នុងធុង ស្រលាញ់ការពារសត្វព្រៃ និងដាំដើមឈើ។
បច្ចុប្បន្ននេះ ដោយសារកំណើនប្រជាជន យើងបានជួបប្រទះនូវបញ្ហាមួយចំនួន ក្នុងនោះរួមមាន បញ្ហាសំរាម សំណល់រឹង រាវ នៅតាមទីប្រជុំជនដែលមានការកើនឡើងយ៉ាងខ្លាំង គួបផ្សំនឹងប្រព័ន្ធគ្រប់គ្រងសំរាមនៅពេលបច្ចុប្បន្ននៅមានកម្រិតនៅឡើយ។
សំណល់សំរាមមួយចំនួន ជាពិសេសសំណល់ប្លាស្ទិក ត្រូវបានប្រជាពលរដ្ឋខ្លះដុត និងខ្លះបានបោះចូលទៅក្នុងទឹក និងទីសាធារណៈបង្កគ្រោះថ្នាក់ដល់ជីវៈចម្រុះដែលមនុស្សគ្រប់ៗគ្នាបាននិងកំពុងយកចិត្តទុកដាក់ ។
ទន្ទឹមនឹងនេះ ការចូលរួមរបស់ប្រជាពលរដ្ឋគ្រប់រូបក្នុងការលើកកម្ពស់អនាម័យ និងគុណភាពបរិស្ថាន គឺជាការចាំបាច់ និងជាវិភាគទានដ៏សំខាន់បំផុត ដើម្បីចូលរួមជាមួយរាជរដ្ឋាភិបាល ក្នុងការដោះស្រាយបញ្ហាប្រឈមទាំងនេះសំដៅការរស់នៅប្រកបដោយសុខុមាលភាព និងជីវភាពរបស់ប្រជាជនយើងនៅក្នុងខេត្តដ៏មានសក្តានុពលមួយនេះ៕
ចែករំលែកព័តមាននេះ