Barracuda ប្រគល់សិទ្ធិចែកចាយផ្តាច់មុខជូន Andromeda
រាជធានីភ្នំពេញ ៖ ក្រុមហ៊ុន Barracuda Networks Inc ដែលជាក្រុមហ៊ុនកំពូលរបស់សហរដ្ឋអាមេរិក បានសហការជាមួយក្រុមហ៊ុន Andromeda រៀបចំសិក្ខាសាលាមួយស្តីពីការប្រគល់សិទិ្ធចែកចាយផ្តាច់
រាជធានីភ្នំពេញ ៖ ក្រុមហ៊ុន Barracuda Networks Inc ដែលជាក្រុមហ៊ុនកំពូលរបស់សហរដ្ឋអាមេរិក បានសហការជាមួយក្រុមហ៊ុន Andromeda រៀបចំសិក្ខាសាលាមួយស្តីពីការប្រគល់សិទិ្ធចែកចាយផ្តាច់មុខមកអោយក្រុមហ៊ុន Andromeda Distribution Corporation នៅសណ្ឋាគារ ហ៊ីម៉ាវ៉ារី រាជធានីភ្នំពេញ កាលពីថ្ងៃទី ២៧ ខែកញ្ញា ឆ្នាំ២០១៦ កន្លងមកនេះ ។
ក្នុងកិច្ចចាប់ផ្តើមបើកទំព័រកម្មវិធីក្រុមហ៊ុន Barracuda បានប្រគល់នូវវិញ្ញាបនបត្រដែលបញ្ជាក់ពីការព្រមព្រៀងប្រគល់សិទ្ធិចែកចាយផលិតផលរបស់ខ្លួនមកអោយក្រុមហ៊ុន Andromeda ដើម្បីធ្វើការចែកចាយជូនដល់អតិថិជននៅក្នុងប្រទេសកម្ពុជា ។
លោក Harry Chan អគ្គនាយកនៃក្រុមហ៊ុន Andromeda បានមានប្រសាសន៍ថា លោកមានកិត្តិយសយ៉ាងខ្លាំងដែលក្រុមហ៊ុនរបស់លោកបានទទួលសេចក្តីទុកចិត្តពីក្រុមហ៊ុន Barracuda ដែលជាក្រុមហ៊ុនលំដាប់កំពូលរបស់សហរដ្ឋអាមេរិកផ្នែកសុវត្តិភាពតាមប្រព័ន្ធអ៊ីនធើរណេត ព្រមទាំងទទួលបានការគាំទ្រពីសំណាក់ដៃគូចែកចាយក៏ដូចជាអតិថិជនតាមបណ្តាក្រុមហ៊ុននានាជាច្រើន ។
លោកក៏បានធ្វើបទបង្ហាញអំពីក្រុមហ៊ុន Andromeda និងផលិតផលព័ត៌មានវិទ្យា (IT) ដែលក្រុមហ៊ុនរបស់លោកបានទទួលសិទ្ធិចែកចាយផ្តាច់មុខដូចជា Barracuda WatchGaurd Sangfor Alcatel-Lucent QNAP Zebra ZyXEL Edge-CorePanduit Ekorack ហើយនិង Softing ដែលសុទ្ធសឹងតែជាផលិតផលកំពុងទទួលបានការគាំទ្រស្ទើរតែគ្រប់មជ្ឈដ្ឋានអ្នកប្រើប្រាស់ទាំងអស់ ។
លោកបន្តថា ដោយយោងទៅលើភាពជោគជ័យ ជាមួយនឹងយុតិ្តសាស្ត្រដ៏រឹងមាំ និងច្បាស់លាស់ដោយផ្តោតទៅលើសុក្រឹត្យភាព ក៏ដូចជាការផ្តល់នូវទំនុកចិត្តគ្រប់ដៃគូចែកចាយ និងអតិថិជនទាំងអស់ដែលជាកត្តាធ្វើអោយក្រុមហ៊ុនលោកបានទទួលសិទ្ធិចែកចាយផ្តាច់មុខពីក្រុមហ៊ុន Barracuda នៅក្នុងទីផ្សារកម្ពុជាយើងនេះ ។
លោក Fadhly តំណាងក្រុមហ៊ុន Barracuda ក៏បានថ្លែងអំណរគុណចំពោះក្រុមហ៊ុន Andromeda ដែលបានសហការបង្កើតកម្មវិធីនេះឡើង ក៏ដូចជាផ្តល់ឱកាសឲ្យលោកបានធ្វើបទបង្ហាញអំពីផលិតផលរបស់ខ្លួននៅក្នុងសិក្ខាសាលានេះ។ លោកបានបញ្ជាក់បន្ថែមទៀតថា ផលិតផល Barracuda ជាផលិតផលលេខមួយដែលកំពុងល្បីល្បាញទូទាំងសកល ដែលមានផលិតផលដូចជា ៖ Link Balancer, Load Balancer, Email Security Service, Web Application Firewall និង Back Up ជាដើម ៕
ចែករំលែកព័តមាននេះ