រាជធានីភ្នំពេញ ៖ ធនាគារកាណាឌីយ៉ា បានជួបសំណេះសំណាលជាមួយសិស្សឆ្នើមនិទ្ទេស A ៥រូប មកពីស្រុកកោះធំ ខេត្តកណ្ដាល និងផ្ដល់រង្វាន់លើកទឹកចិត្តមួយចំនួនផងដែរ ក្នុងឱកាសបុណ្យភ្ជុំបិណ្ឌឆ្នាំ២០១៦នេះ ។
រាជធានីភ្នំពេញ ៖ ធនាគារកាណាឌីយ៉ា បានជួបសំណេះសំណាលជាមួយសិស្សឆ្នើមនិទ្ទេស A ៥រូប មកពីស្រុកកោះធំ ខេត្តកណ្ដាល និងផ្ដល់រង្វាន់លើកទឹកចិត្តមួយចំនួនផងដែរ ក្នុងឱកាសបុណ្យភ្ជុំបិណ្ឌឆ្នាំ២០១៦នេះ ។ ពិធីសំណេះសំណាលធ្វើឡើងនៅអគារកាណាឌីយ៉ា ជាន់ទី២៨ កាលពីថ្ងៃទី២៨ ខែកញ្ញា ឆ្នាំ២០១៦ ដោយមានវត្តមានរបស់លោក ពុង ឃាវសែ ប្រធានក្រុមប្រឹក្សាភិបាលធនាគារកាណាឌីយ៉ា និងថ្នាក់ដឹកនាំធនាគារកាណាឌីយ៉ាជាច្រើនទៀតផងដែរ ។
លោក ពុង ឃាវសែ ប្រធានក្រុមប្រឹក្សាភិបាលនៃធនាគារកាណាឌីយ៉ា បានមានប្រសាសន៍ថា វិធីសាស្ត្រនៃការបង្រៀន គឺបានយកការសិក្សាភ្ជាប់ជាមួយនឹងការអនុវត្តផ្ទាល់តែម្ដង ទើបសិស្សទទួលបានការចេះដឹងលឿន ហើយមានគុណភាពសំខាន់នោះ គឺគោរពគោលនយោបាយរបស់រាជរដ្ឋាភិបាល ដើម្បីលើកកម្ពស់វិស័យអប់រំ និងជំរុញកម្រិតនៃការចេះដឹងអោយកាន់តែមានប្រសិទ្ធភាពបន្ថែមទៀត ។ យុទ្ធសាស្ត្រកំណែទម្រង់ស៊ីជំរៅលើវិស័យអប់រំរបស់រាជរដ្ឋាភិបាលបានពង្រឹងទៅដល់គុណភាពអប់រំរបស់យើងធ្វើអោយក្មួយៗបានក្លាយជាមនុស្សថ្មីតាមពាក្យស្លោកថា គ្រូល្អ សិស្សល្អ ហើយប្រការដែលនាំអោយសិស្សពូកែ គឺមកពីកត្តាគំនិតយល់ដឹង ការចងចាំ និងភាពឈ្លាសវៃ ហើយក៏ជាថ្ងៃផ្លាស់ប្តូរជីវិតយើងដែលរួចផុតរយៈពេល ១២ឆ្នាំ ក្នុងវ័យកម្រិតបឋម និងដល់មធ្យម ។
លោកបន្តថា ប្អូនៗទាំង៥នាក់នៅទីនេះ គឺសុទ្ធតែជាអ្នករៀនពួកែ តែប្អូនៗក៏ត្រូវតែគោរពអ្នករៀនមិនសូវពូកែ ។ ហើយអ្នករៀនមិនសូវពូកែ គេអាចជាអ្នកពូកែរកស៊ី ហើយនៅថ្ងៃអនាគត អ្នកមិនសូវរៀនពូកែអាចផ្ដល់ប្រាក់សម្រាប់កសាងសាលា និងកសាងហេដ្ឋារចនាសម្ព័ន្ធ ដូចនេះប្អូនត្រូវចេះស្រឡាញ់គ្នា និងប្រឹងប្រែងរៀនសូត្របន្តទៀត ដើម្បីអោយក្លាយជាបុគ្គលឆ្នើមសម្រាប់កសាងប្រទេសជាតិយើង ។
តំណាងសិស្សនិទ្ទេស A ស្រុកកោះធំ កញ្ញា ខេង ច័ន្ទចរណៃ មកពីវិទ្យាល័យហ៊ុនសែនកោះធំ បានថ្លែងអំណរគុណដល់លោក ពុង ឃាវសែ ប្រធានក្រុមប្រឹក្សាធនាគារកាណាឌីយ៉ា ចំពោះការផ្ដល់រង្វាន់លើកទឹកចិត្តដល់សិស្សនិទ្ទេស A នូវម៉ូតូ៥គ្រឿង និងថ្លែងអំណរគុណផងដែរ ដល់អ្នកឧកញ៉ាដែលបានផ្ដល់ប្រាក់ឧបត្ថម្ភដល់សិស្សដែលប្រលងជាប់មធ្យមសិក្សាទុតិយភូមិក្នុងពេលថ្មីៗនេះ ។
គួរបញ្ជាក់ថា សិស្សឆ្នើមទាំង៥រូបមកពីស្រុកកោះធំ ខេត្តកណ្ដាល ម្នាក់ៗទទួលបានម៉ូតូម៉ាកហុងដា Scoopy មួយគ្រឿង រួមនឹងកញ្ចប់ថវិកាផ្ដល់ជូននាយករងវិទ្យាល័យហ៊ុនសែនកោះធំ និងកំពង់កុង ដែលមានសិស្សជាប់និទ្ទេស A ផងដែរ។ ម្យ៉ាងទៀតសិស្សទាំង៥នាក់ អាចនឹងមានឱកាសចូលបម្រើការងារនៅក្នុងធនាគារកាណាឌីយ៉ា នៅពេលអនាគត បើសិនជាពួកគេចង់ធ្វើការនៅក្នុងធនាគារកាណាឌីយ៉ា ៕
ចែករំលែកព័តមាននេះ