រាជធានីភ្នំពេញ ៖ ក្រុមហ៊ុនទូរគមនាគមន៍ SEATEL-018 ដែលបានវិនិយោគទឹកប្រាក់រាប់រយលានដុល្លារនៅក្នុងប្រទេសកម្ពុជា បានសហការជាមួយស្ថាប័នរដ្ឋ និងឯកជនជាបន្តបន្ទាប់ក្នុងការពង្រីកសក្ដានុពលទីផ្សារ
រាជធានីភ្នំពេញ ៖ ក្រុមហ៊ុនទូរគមនាគមន៍ SEATEL-018 ដែលបានវិនិយោគទឹកប្រាក់រាប់រយលានដុល្លារនៅក្នុងប្រទេសកម្ពុជា បានសហការជាមួយស្ថាប័នរដ្ឋ និងឯកជនជាបន្តបន្ទាប់ក្នុងការពង្រីកសក្ដានុពលទីផ្សារ និងសេវាទូរគមនាគមន៍ ជាក់ស្ដែងកាលពីពេលថ្មីៗនេះ ក្រុមហ៊ុន SEATEL បានសហការជាមួយក្រសួងការពារជាតិនៃព្រះរាជាណាចក្រកម្ពុជា លើប្រតិបត្តិការយុទ្ធសាស្ត្ររវាងគ្នា ហើយកាលពីថ្ងៃទី២៧ ខែកញ្ញា ឆ្នាំ២០១៦ កន្លងមកនេះ ក្រុមហ៊ុន SEATEL ក៏បានផ្ដល់ទូរស័ព្ទ រួមជាមួយនឹងស៊ីមនៅក្នុងនោះជាស្រេចដល់សមាជិករាប់រយនាក់នៃសមាគមម៉ូតូកង់បីសម្រាប់ការប្រើប្រាស់ក្នុងការទំនាក់ទំនង និងអ៊ីនធើរណេត ។
តំណាងក្រុមហ៊ុន SEATEL បានអោយដឹងថា ដោយឈរលើយុទ្ធសាស្ត្រ «ខ្សែក្រវ៉ាត់មួយវិថីមួយ» របស់រដ្ឋាភិបាលនៃសាធារណរដ្ឋប្រជាមានិតចិន ក្រុមហ៊ុន SEATEL ចូលមកប្រទេសកម្ពុជា ដើម្បីធ្វើការវិនិយោគលើបណ្តាញទូរគមនាគមន៍ចល័ត 4G និងសេវាអ៊ីនធើរណេត ។ ជាមួយគ្នានេះដែរ ភាពស្មោះត្រង់របស់ប្រជាជនកម្ពុជាធ្វើឱ្យក្រុមហ៊ុនទទួលបានសម្ព័ន្ធភាពដ៏ជ្រាលជ្រៅ និងយូរអង្វែងរបស់ប្រទេសទាំងពីរ គឺកម្ពុជា-ចិន ។ SEATEL សម្រេចជម្រុញការអភិវឌ្ឍន៍បណ្តាញទូរគមនាគមន៍ ចល័ត និងសេវាបណ្តាញអ៊ីនធើរណេតនៅកម្ពុជាឱ្យកាន់តែប្រសើរ ដើម្បីឆ្លើយតបនឹងតម្រូវការ និងផលប្រយោជន៍សង្គម ក៏ដូចជាប្រជាជនកម្ពុជា ។
តំណាងក្រុមហ៊ុនបន្តថាបច្ចុប្បន្ន SEATEL បានធ្វើការវិនិយោគទឹកប្រាក់១៥០លានដុល្លារនៅកម្ពុជា ដោយទិញ និងតភ្ជាប់បណ្តាញខ្សែកាបអុបទិចក្រោមដី ប្រមាណមួយម៉ឺនគីឡូម៉ែត្រនៅទូទាំងប្រទេសកម្ពុជា ដោយ ដាក់ឱ្យដំណើរការនូវបណ្តាញអ៊ីនធើរណេត 4G VoLTE គ្របដណ្តប់គ្រប់ខេត្ត-រាជធានី ជាពិសេសតាមបណ្តោយផ្លូវជាតិសំខាន់ៗនៅទូទាំងប្រទេស និងបានសាងសង់មជ្ឈមណ្ឌលទិន្នន័យ (Cloud Data Center) ដែលមានបច្ចេកវិទ្យាឈានមុខលើពិភពលោក ។
នៅ៥ឆ្នាំខាងមុខ SEATEL នឹងវិនិយោគគិតជាទឹកប្រាក់សរុបមានចំនួន៥០០លានដុល្លារ ដើម្បីធ្វើឱ្យបណ្តាញទូរគមនាគមន៍ចល័ត និងវិស័យសេវាអ៊ីនធើរណេតកម្ពុជាឈានចូលក្នុងចំណោមបណ្តាប្រទេស ដែលមានបណ្តាញទូរគមនាគមន៍ចល័តជឿនលឿននៅលើពិភពលោក ដើម្បីអាចឱ្យប្រជាជនកម្ពុជា ទទួលបាននូវសេវាទូរគមនាគមន៍ដែលមានល្បឿនលឿន សម្លេងច្បាស់ ងាយស្រួល និងសុវត្ថិភាពបានគ្រប់ពេល វេលា និងគ្រប់ទីកន្លែង ។
គួរបញ្ជាក់ថា នៅក្នុងពិធីផ្ដល់ទូរស័ព្ទ និងលេខទូរស័ព្ទរបស់ក្រុមហ៊ុន SEATEL នោះក៏មានការចូលរួមពីលោក គួច ចំរើន អភិបាលខណ្ឌដូនពេញផងដែរ ព្រមទាំងមានវត្តមានអ្នករត់កង់បី ដែលជាសមាជិករបស់សមាគមម៉ូតូកង់បីរាប់រយនាក់ផងដែរ ៕
ចែករំលែកព័តមាននេះ