ខេត្តសៀមរាប ៖ កម្លាំងនគរបាលខេត្តសៀមរាប ដែលប្រចាំការនៅតំបន់ផាប់ស្ទ្រីត (Police Box) បានទទួលពាក្យបណ្ដឹងពីភ្ញៀវទេសចរជនជាតិចិនមួយក្រុម នៅថ្ងៃទី៣០ កញ្ញា ២០១៦ ថា បានភ្លេចកាបូប និងរបស់របរមួយចំនួននៅលើរ៉ីម៉កម៉ូតូកង់បី រួចយកមកធ្វើការប្រគល់ជូនពួកម្ចាស់វិញ ដើម្បីធានាសន្តិសុខ សុវត្ថិភាពជូនប្រជាពលរដ្ឋ និងភ្ញៀវទេសចរចម្រុះជាតិសាសន៍ នៅក្នុងក្រុងសៀមរាប។
ក្រោយពីទទួលពាក្យបណ្ដឹងរួចមក លោកវរសេនីយ៍ឯក កែវ រក្សា នាយការិយាល័យនគរបាលសណ្ដាប់ធ្នាប់នៃស្នងការដ្ឋាននគរបាលខេត្តសៀមរាប បានដឹកនាំកម្លាំងនគរបាល ដោយប្រើប្រាស់វិធានការជំនាញ ធ្វើការស្រាវជ្រាវ រកឃើញម្ចាស់រ៉ូម៉ក ហើយបាននាំយកនូវកាបូប និងរបស់របរមួយចំនួនមកប្រគល់ជូនភ្ញៀវជនជាតិចិនវិញរួចរាល់ហើយ ដោយពុំមានបាត់បងរបស់អ្វីឡើយ ។
សម្ភារដែលភ្ញៀវបរទេសភ្លេចនៅលើរ៉ឺម៉កម៉ូតូកង់បីនោះមាន លិខិតឆ្លងដែនចំនួន៣ក្បាល, ទូរស័ព្ទដៃម៉ាក Huawei ១គ្រឿង, កាបូបប្រាក់១ ក្នុងនោះមានប្រាក់១ពាន់វ៉ុន និងសម្ភារជាច្រើនទៀត។ នេះជាការយកចិត្តទុកដាក់របស់កងកម្លាំងនគរបាលខេត្តសៀមរាប ដែលមានលោកឧត្តមសេនីយ៍ទោ សត ណាឌី ជាស្នងការនគរបាលខេត្ត រួមទាំងម្ចាស់រ៉ូម៉កម៉ូតូកងបី ផងដែរ។
ទង្វើដ៏ល្អទាំងនេះ នឹងធ្វើឱ្យភ្ញៀវទេសចរមានទំនុកចិត្តមកលើកងកម្លាំងនគរបាលយើង ក៏ដូចជាការទាក់ទាញភ្ញៀវឱ្យមកទស្សនាក្នុងខេត្តសៀមរាបបន្ថែមទៀត ដោយពុំមានការភ័យខ្លាចឡើយ ហើយជនជាតិចិនទាំងនោះ បានថ្លែងអំណរគុណយ៉ាងជ្រាលជ្រៅ និងកោតសរសើ ចំពោះកម្លាំងសមត្ថកិច្ចនគរបាលខេត្ត ដែលបានខិតខំប្រឹងប្រែង រករបស់របរទាំងនេះ មកប្រគល់ជូនគាត់វិញ ៕
ចែករំលែកព័តមាននេះ