ខេត្តព្រះសីហនុ ៖ នៅព្រឹកថ្ងៃទី២៨ ខែកញ្ញា ឆ្នាំ២០១៦នេះ សមត្ថកិច្ចចម្រុះខេត្តព្រះសីហនុ រួមមាននគរបាលបង្ក្រាបបទល្មើសសេដ្ឋកិច្ច នៃស្នងការដ្ឋាននគរបាលខេត្ត មន្ត្រីសាខាកាំកុងត្រូល ព្រមទាំងមន្ត្រីតំណាងមកពីស្ថាប័នពាក់ពន្ធ័ផ្សេងៗទៀត បានចូលរួមដុតកម្ទេចស្លាបមាន់ ជើងមាន់ និងដុំប្រហិតខូចគុណភាពដែលនគរបាលចាប់ដកហូតពីឈ្មួញនៅក្រុងព្រះសីហនុកាលពីថ្ងៃ២៧ ខែកញ្ញាម្សិលមិញនេះ។
មន្ត្រីកាំកុងត្រូលថ្លែងថា ស្លាបមាន់ ជើងមាន់និងដុំប្រហិតខូចគុណភាពដែលនាំយកមកដុតកម្ទេចចោលនេះមានទម្ងន់ជិត៤០០គីឡូក្រាម គឺជាទំនិញខុសច្បាប់ដែលឈ្មួញលួចនាំចូលពីប្រទេសថៃ តាមច្រករបៀងផ្លូវសមុទ្រ ដើម្បីចែកចាយក្នុងក្រុងព្រះសីហនុ។
ប៉ុន្តែត្រូវបានចាប់បង្ក្រាបដោយកម្លាំងមានសមត្ថកិច្ច ហើយការបង្ក្រាបនេះធ្វើឡើងដើម្បីទប់ស្កាត់ការចរាចរលក់ដូរផលិតផលម្ហូបអាហារខូចគុណភាព នាពិធីបុណ្យភ្ជុំបិណ្ឌនេះ។ សូមបញ្ជាក់ផងដែរថាស្លាបមាន់ខូចគុណភាពប្រមាណ៣៥៥គីឡូគ្រាម នាព្រឹកថ្ងៃទី២៧ ខែកញ្ញា វេលាម៉ោង៩ព្រឹកនេះ ត្រូវបានកម្លាំងនគរបាលប្រឆាំងបទល្មើស នៃស្នងការដ្ឋាននគរបាលខេត្តព្រះសីហនុ ឃាត់ចាប់បានបញ្ជូនទៅឲ្យមន្ត្រីសាខាកាំកុងត្រូលខេត្តដើម្បីចាត់ការបន្តតាមនីតិវិធីច្បាប់។
យោងតាមប្រភពពីលោកវរៈសេនីយ៍ឯក ស៊ុន សុផាត ស្នងការរងទទួលផែនប្រឆាំងបទល្មើស នៃស្នងការដ្ឋាននគរបាលខេត្តព្រះសីហនុ គូសបញ្ជាក់ថា ដើម្បីចូលរួមថែរក្សានូវសុខភាពរបស់ប្រជាពលរដ្ឋ ទប់ស្កាត់នូវអំពើខុសច្បាប់ ក្រោមការណែនាំចង្អុលបង្ហាញពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ កម្លាំងជំនាញប្រឆាំងបទល្មើស ក្រោមការដឹកនាំពីលោកផ្ទាល់បានចុះស្ទាក់ និងបង្ក្រាបសាច់មាន់ ស្លាបមាន់ និងប្រហិតខូចគុណភាពត្រង់ចំណុចក្រោយកោះទន្សាយ ស្ថិតក្នុងភូមិ២ សង្កាត់លេខ២ ក្រុងព្រះសីហនុ សរុបប្រមាណ៣៥៥គីឡូក្រាម ដោយម្ចាស់ទំនិញមានឈ្មោះ ចេ ស៊ុនហ៊ី ភេទប្រុស អាយុ៣៣ឆ្នាំ មានទីលំនៅក្រុមទី០៩ ភូមិ២ សង្កាត់លេខ២ ក្រុងព្រះសីហនុ៕
ចែករំលែកព័តមាននេះ