រាជធានីភ្នំពេញ ៖ សេចក្តីរាយការណ៍បឋមឱ្យដឹងថា មានហេតុការណ៍ភ្ញាក់ផ្អើលមួយ ដោយបុរសម្នាក់ត្រូវកម្លាំងនគរបាលចាប់ខ្លួនក្រោយពីជួបគ្រោះថ្នាក់ចរាចរណ៍ បុកជាមួយម៉ូតូឌុបមួយគ្រឿង បណ្តាលឱ្យធ្លាក់ដាវកែច្នៃមួយដើមលើផ្លូវ ដែលជននោះអះអាងថាទុក សម្រាប់ការពារខ្លួន ខណៈកំពុងតាមរកសង្សារធ្វើការនៅរោងចក្រ ។
ប្រភពឱ្យដឹងថា ហេតុការណ៍នេះ បង្កឱ្យភ្ញាក់ផ្អើលកាលពីវេលាម៉ោង០២ និង២០នាទីរសៀលថ្ងៃទី២៨ កញ្ញា ២០១៦ ស្ថិតត្រង់ចំណុចមុខរោងចក្រអាមេរិកាំង ក្នុងភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ ។
បុរសដែលត្រូវឃាត់ខ្លួនឈ្មោះផុន ហឿន អាយុ៣៦ឆ្នាំ មានទីលំនៅក្នុងភូមិព្រៃច្រែស ឃុំអូរ ស្រុកភ្នំស្រួច ខេត្តកំពង់ស្ពឺ ជិះម៉ូតូម៉ាកវ៉េវ ពណ៌ស្លែ ស្លាកលេខកំពង់ស្ពឺ1B-3284 ។
ប្រភពបន្តថា មុនពេលកើតហេតុ បុរសរូបនោះជិះម៉ូតូមកតាមរកសង្សារដែលធ្វើការនៅរោងចក្រ ។ លុះមកដល់ចំណុចខាងលើ ស្រាប់តែជ្រុលទៅបុកជាមួយម៉ូតូឌុបមួយគ្រឿង កំពុងដឹកភ្ញៀវបុរសចំណាស់ជនជាតិចិនម្នាក់ បណ្តាលឱ្យដួលរងរបួស ។ ចំណែកម៉ូតូបានដួលហើយធ្លាក់ដាវ១ដើមចេញពីកែបម៉ូតូ បង្កឱ្យមានការភ្ញាក់ផ្អើល ហើយត្រូវសមត្ថកិច្ចឃាត់ខ្លួនតែម្តង ។
បើតាមការអះអាងពីបុរសនោះឱ្យដឹងថា រូបគេតែងតែដាក់ដាវការពារខ្លួនជាប់ជានិច្ច ព្រោះរូបគេជួបក្រុមស្ទាវនៅម្តុំរោងចក្រនោះ ដែលចង់ធ្វើបាបរូបគេ ។ ទោះបីជាយ៉ាងណា ក្រោយហេតុការណ៍នេះ បុរសជនជាតិចិនដែលរងរបួស បានទារសំណងពីបុរសរូបនេះចំនួន៥០០ដុល្លារ តែត្រូវបុរសនោះ សុំត្រឹម២០០ដុល្លារបានហើយ ដើម្បីបញ្ចប់រឿង ។
ចែករំលែកព័តមាននេះ