រាជធានីភ្នំពេញ៖ បន្ទាប់ពីពិនិត្យសំណើរបស់ក្រសួងយុត្តិធម៌ក្នុងការស្នើសុំលើកអភ័យឯកសិទ្ធិអ្នកតំណាងរាស្ត្រគណបក្សសង្គ្រោះជាតិចំនួន២រូបនោះរួចមក នៅព្រឹកថ្ងៃទី២៨ កញ្ញានេះ គណៈកម្មាធិការអចិន្ត្រៃយ៍រដ្ឋសភា បានសម្រេចមិនលើកអភ័យឯកសិទ្ធតំណាងរាស្ត្រទាំងពីរូបនេះទេ។
អ្នកនាំពាក្យរដ្ឋសភាលោក ឡេង ប៉េងឡុង បានប្រាប់អ្នកសារព័តមាននៅក្រោយកិច្ចប្រជុំថា គណៈកម្មាធិការអចិន្ត្រៃយ៍បានសម្រេចមិនលើក(ដក)អភ័យឯកសិទ្ធិសភាគណបក្សសង្គ្រោះជាតិពីររូប គឺលោក ពិន រតនា និងលោកតុប វ៉ាន់ចាន់ តាមការស្នើសុំរបស់ក្រសួងយុត្តិធម៌នោះទេ។ លោកថាមូលហេតុដោយសារអ្នកតំណាងរាស្ត្រទាំងពីររូបមិនបានព្រឹត្តបទល្មើសជាក់ស្តែងដូចអ្វីដែលក្រសួងយុត្តិធម៌ស្នើសុំនោះឡើយ ។
ចំណែកអ្នកនាំពាក្យគណបក្សសង្គ្រោះជាតិ និងសមាជិកគណៈកម្មាធិកអចិន្ត្រៃយ៍សភា លោក យ៉ែម បុញ្ញឬទ្ធិ បានលើកឡើងថា សមាជិកអចិន្ត្រៃយ៍សភាបានឯកភាពដូចអ្វីដែលលោក ឡេង ប៉េងឡុង លើកឡើងរួចហើយ ។
លោកបញ្ជាក់ថា« អ្វីដែលសំខាន់នោះ យើងបានឯកភាពដាក់សំណើធ្វើវិសោធនកម្មច្បាប់មួយចំនួនទាក់ទងនឹងប្រព័ន្ធតុលាការទៅគណៈកម្មការទី៦ពិនិត្យបន្ថែម មុននឹងដាក់ចូលទៅអចិន្ត្រៃយ៍ពិនិត្យវិញ និងដាក់ចូលទៅសភាពេញអង្គប្រជុំ ។
លោកយ៉ែម បុញ្ញឬទ្ឋិ បាន្តថា «នេះជាចំណុចមួយដែលយើងសង្កេតឃើញថាល្អប្រសើរ ដែលបានកំណត់បទបញ្ជាផ្ទៃក្នុងរដ្ឋសភា និង មានចែងក្នុងច្បាប់ជាដើម »។
ចំពោះសំណើរបស់ក្រសួងយុត្តិធម៌ ស្នើសុំលើកអភ័យឯកសិទ្ធិអ្នកតំណាងរាស្ត្រគណបក្សសង្គ្រោះជាតិនោះ អចិន្ត្រៃយ៍រដ្ឋសភាបានសម្រេចឲ្យអគ្គលេខាធិការរដ្ឋសភាធ្វើរបាយការណ៍ទៅកាន់ក្រសួងយុត្តិធម៌វិញ ដោយថាអ្នកតំណាងរាស្ត្រមិនជាប់ពាក់ព័ន្ធដូច តាមការស្នើសុំនោះទេ។
ជាការកត់សម្គាល់ ការសម្រេចចូលតុប្រជុំរបស់សមាជិកអចិន្ត្រៃយ៍ទាំងប្រាំរូបរបស់គណបក្សប្រឆាំងនាព្រឹកមិញនេះ បន្ទាប់ពីស្ថានការនយោបាយមានភាពស្ងប់ស្ងាត់ ពោលគឺក្រោយការអំពាវនាវរបស់ថ្នាក់ដឹកគណបក្សដែលមានអាសនៈនៅក្នុងរដ្ឋសភាអំឡុងបុណ្យភ្ជុំបិណ្ឌប្រពៃណីជាតិខ្មែរ កុំមានការវាយប្រហារពាក្យសម្តីគ្នា ដើម្បីទុកឱកាសឲ្យប្រជាពលរដ្ឋបានធ្វើបុណ្យទានប្រកបដោយសេចក្តីសុខ ៕
ចែករំលែកព័តមាននេះ