រាជធានីភ្នំពេញ ៖ រថយន្តមួយគ្រឿងរបស់កងពលតូច ដឹកជញ្ជូនលេខ៩៩ត្រូវបានគេអះអាងថា បានបើកបុកម៉ូតូមួយគ្រឿង ហើយបើកថយកិនទៀត តែសំណាងល្អ ស្ត្រី២នាក់ម្តាយនិងកូន គ្រាន់តែរងរបួសប៉ុណ្ណោះ ។
គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១១ព្រឹកថ្ងៃទី២៨ កញ្ញា ស្ថិតនៅចំណុចស្តុបផ្លូវភ្នំពេញ-ហាណូយ កែងផ្លូវសម្តេចជា ស៊ីម ក្នុងភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ ។
រថយន្តដែលបើកកិនម៉ូតូពណ៌ត្រេអី ពាក់ស្លាក់លេខខេមរភូមិន្ទ០១ ៣ ៤៧៥៧ ជារថយន្តកងពលតូចដឹកជញ្ជូនលេខ៩៩ បើកបរ ដោយមន្ត្រីយោធាម្នាក់ ត្រូវបាននគរបាលឃាត់ខ្លួន ។ ចំណែកស្ត្រីរងរបួសមិនត្រូវបានស្គាល់ឈ្មោះឡើយ ក្រោយកើតហេតុត្រូវបងប្អូនដឹកតាមរ៉ឺម៉កម៉ូតូទៅសង្គ្រោះនៅគ្លីនិកឯកជនក្បែកន្លែងកើតហេតុ ។
តាមសាក្សីបានឱ្យដឹងថា នៅមុនពេលកើតហេតុ គេឃើញរថយន្តយោធាខាងលើ បានធ្វើដំណើរតាមផ្លូវភ្នំពេញ-ហាណូយ ក្នុងទិសដៅពីជើងទៅត្បូង ។ នៅពេលមកដល់ចំណុចកើតហេតុ បានបុកម៉ូតូម៉ាកហុងដាឌ្រីមសេ១២៥ ពណ៌ខ្មៅ ស៊េរី២០១៥ ពាក់ស្លាកលេខកណ្តាល1P-8531 បើកបរដោយស្ត្រីរងគ្រោះដឹកកូនស្រីអាយុប្រមាណជាង១០ឆ្នាំ ដែលធ្វើដំណើរឆ្លងផ្លូវសសៀរទៅផ្លូវបញ្ច្រាស ។
តាមសាក្សីបានបន្តទៀតថា នៅក្នុងគ្រោះថ្នាក់គេឃើញ ស្ត្រីជាម្តាយបានដួល ហើយកូនស្រីបានចូលក្រោមរថយន្ត តែសំណាងល្អមិនបណ្តាលឱ្យរងរបួសធ្ងន់ធ្ងរ ចំណែកម៉ូតូត្រូវរថយន្តកិនខ្ទេចផ្នែកខាងមុខ ។ បន្ទាប់ពីកើតមានគ្រោះថ្នាក់អ្នកបើកបរ បានថយរថយន្តទៅកិន ស្ត្រីរងគ្រោះបន្ថែមទៀត តែត្រូវបានស្ត្រីរងគ្រោះរបួសស្រាល នៅមានស្មារតីរឹងខំប្រឹងក្រោកគេចចេញ ។
ភ្លាមៗ រថយន្តក៏បានបើកគេចខ្លួន ហើយត្រូវបានប្រជាពលរដ្ឋដែលឃើញហេតុការណ៍ មានការក្តៅក្រហាយនាំគ្នាដេញតាមដោយមានការជួយអន្តរាគមន៍ពីនគរបាលខណ្ឌសែនសុខ ក៏បានឃាត់រថយន្ត និងអ្នកបើកបរបាន នៅមុខផ្សារឈូកមាស តាមផ្លូវលេខ ២០១១ ចម្ងាយប្រមាណជាង១គីឡូម៉ែត្រ ពីកន្លែងកើតហេតុ ។
តាមព័ត៌មានឱ្យដឹងទៀតថា ខណះនោះ អ្នកបើកបរបានក្រាញននៀល និងព្យាយាមមិនឱ្យនគរបាលនាំយករថយន្តនោះទេ តែក្រោយមក ត្រូវបានមេបញ្ជាការចុះទៅសម្របសម្រួលឱ្យប្រគល់ខ្លួន និងរថយន្តបញ្ជូនទៅកាន់អធិការដ្ឋានខណ្ឌសែនសុខ ដើម្បីដោះស្រាយ ។
ចែករំលែកព័តមាននេះ