មន្ទីរពេទ្យរ៉ូយ៉ាល់ភ្នំពេញរៀបចំកម្មវិធីបរិច្ចាគឈាមក្នុងឱកាសបុណ្យភ្ជុំបិណ្ឌ
រាជធានីភ្នំពេញ ៖ ក្នុងឱកាសបុណ្យកាន់បិណ្ឌ និងភ្ជុំបិណ្ឌនេះ មន្ទីរពេទ្យរ៉ូយ៉ាល់ភ្នំពេញបានរៀបចំកម្មវិធីបរិច្ចាគឈាមជូនមជ្ឈមណ្ឌលជាតិផ្ដល់ឈាម
រាជធានីភ្នំពេញ ៖ ក្នុងឱកាសបុណ្យកាន់បិណ្ឌ និងភ្ជុំបិណ្ឌនេះ មន្ទីរពេទ្យរ៉ូយ៉ាល់ភ្នំពេញបានរៀបចំកម្មវិធីបរិច្ចាគឈាមជូនមជ្ឈមណ្ឌលជាតិផ្ដល់ឈាម
រាជធានីភ្នំពេញ ៖ ក្នុងឱកាសបុណ្យកាន់បិណ្ឌ និងភ្ជុំបិណ្ឌនេះ មន្ទីរពេទ្យរ៉ូយ៉ាល់ភ្នំពេញបានរៀបចំកម្មវិធីបរិច្ចាគឈាមជូនមជ្ឈមណ្ឌលជាតិផ្ដល់ឈាម សម្រាប់យកទៅប្រើប្រាស់សង្គ្រោះជីវិតជនរងគ្រោះដែលត្រូវការឈាមបន្ទាន់នៅរាជធានីភ្នំពេញ ក៏ដូចជានៅទូទាំងប្រទេសកម្ពុជាផងដែរ ។ កម្មវិធីនេះធ្វើឡើងកាលពីថ្ងៃទី២២ ខែកញ្ញា ឆ្នាំ២០១៦ នៅមន្ទីរពេទ្យរ៉ូយ៉ាល់ភ្នំពេញផ្ទាល់តែម្ដង ដោយមានការចូលរួមបរិច្ចាគពីសំណាក់បុគ្គលិកមន្ទីរពេទ្យ និងដៃគូសហការផងដែរ ។ នេះជាលើកទី៣ហើយសម្រាប់មន្ទីរពេទ្យរ៉ូយ៉ាល់ភ្នំពេញ ក្នុងការរៀបចំឱ្យមានកម្មវិធីបរិច្ចាគឈាមជូនមជ្ឈមណ្ឌលជាតិផ្ដល់ឈាម ។
លោក ហុក គឹមចេង ប្រធានមជ្ឈមណ្ឌលជាតិផ្ដល់ឈាម បានមានប្រសាសន៍ថា តម្រូវការឈាមមានកំណើនជាប្រចាំ ដោយឃើញថានៅឆមាសទី១ ឆ្នាំ២០១៦ នៅរាជធានីភ្នំពេញ ទទួលបាន និងផ្គត់ផ្គង់ឈាមប្រមាណជាង២ម៉ឺនប្លោក ហើយនៅតាមខេត្តប្រមាណជាង១ម៉ឺនប្លោកទៀត ។ ដូចនេះឃើញថា នៅទូទាំងប្រទេសការទទួលបាន និងផ្គត់ផ្គង់ឈាមមានប្រមាណ៣ម៉ឺនប្លោក ហើយយើងក៏អាចសន្និដ្ឋានបានថានៅក្នុងឆ្នាំ២០១៦នេះ ការផ្គត់ផ្គង់ឈាមអាចនឹងមានចំនួន៦ម៉ឺនប្លោក ឬលើសពីនេះទៅទៀត ។ លោកបន្តថា នៅក្នុងពិធីបុណ្យភ្ជុំបិណ្ឌ បើតាមបទពិសោធន៍កន្លងមកតម្រូវការឈាមមានលក្ខណៈបន្ទាន់ៗ ដូចជាករណីគ្រោះថ្នាក់ចរាចរណ៍ ។ ដូច្នេះលោកសូមសំណូមពរឱ្យបងប្អូនប្រជាពលរដ្ឋកម្ពុជាទាំងអស់ មានការប្រុងប្រយ័ត្នខ្ពស់ក្នុងអំឡុងពេលបុណ្យភ្ជុំ ក្នុងការធ្វើដំណើរ និងសូមចូលរួមគោរពច្បាប់ចរាចរណ៍ឱ្យបានត្រឹមត្រូវទាំងអស់គ្នា ។
លោក វេជ្ជបណ្ឌិត វ៉ាត់សាន់ អាភីវ៉ាតាណាគុណ (Watson Appiwatanakoon) នាយករងមន្ទីពេទ្យរ៉ូយ៉ាល់ភ្នំពេញ បានឱ្យដឹងថា ក្នុងឱកាសនេះ ប្រាកដជាមានបងប្អូនខ្មែរមួយចំនួនធំបានធ្វើបុណ្យក្នុងពិធីកាន់បិណ្ឌដើម្បីឧទ្ទិសកុសលដល់បងប្អូនដែលចែកឋានទៅ ។ ទន្ទឹមនឹងនេះដែរ មន្ទីរពេទ្យបានយល់ឃើញថា ការចែករំលែក គឺជាផលបុណ្យមួយដ៏ល្អប្រសើរ ហើយការបរិច្ចាគឈាមសម្រាប់ជួយជីវិតអ្នកដទៃនោះ ក៏រឹតតែទទួលបានបុណ្យយ៉ាងពិសេសមិនអាចកាត់ថ្លៃបាន ។ លោកបន្តថា មនុស្សយើងម្នាក់ៗគួរតែដឹងច្បាស់ខ្លួនឯងថា យើងស្ថិតនៅក្រុមឈាមប្រភេទអ្វី ងាយស្រួលនៅពេលបងប្អូន ឬមិត្តភក្តិរបស់យើងមានបញ្ហា អាចបរិច្ចាគឈាមបានលឿនៗ ជៀសវាងមានអ្នកណាម្នាក់មានបញ្ហាត្រូវការឈាមបន្ទាន់ តែខ្លួនយើងមិនដឹងច្បាស់ខ្លួនឯងមានឈាមប្រភេទណាមួយនោះ ។
គួរបញ្ជាក់ថា នៅរៀងរាល់ពេលមន្ទីរពេទ្យរ៉ូយ៉ាល់ភ្នំពេញរៀបចំកម្មវិធីបរិច្ចាគឈាមម្ដងៗ មជ្ឈមណ្ឌលជាតិផ្ដល់ឈាមបានទទួលឈាមពីអ្នកបរិច្ចាគបានប្រមាណជិត១០០ប្លោក ហើយនៅពេលនេះដែរ ក៏មានអ្នកចុះឈ្មោះបរិច្ចាគឈាមជូនមជ្ឈមណ្ឌលជាតិផ្ដល់ឈាមប្រមាណជិត១០០ប្លោកផងដែរ ៕
ចែករំលែកព័តមាននេះ