ការធ្វើលំហាត់ប្រាណពេលព្រឹកព្រលឹមនឹងជួយឱ្យអ្នកផ្តោតលើការងារ និងមានការប្រុងប្រយ័ត្នពេញមួយថ្ងៃ ។ នៅពេលដែលអ្នកធ្វើលំហាត់ប្រាណនៅពេលព្រឹក វាក៏ជួយជំរុញឱ្យមេតាបូលីសរបស់អ្នកធ្វើការពេញមួយថ្ងៃផងដែរ ដែលជាហេតុនាំឱ្យអ្នកស្រកទម្ងន់បាន ។ ខាងក្រោមនេះជាគន្លឹះងាយស្រួលយកមកអនុវត្ត៖
១-ចូលគេងឱ្យបានលឿនជាងរាល់ដង ៖ ក្រុមអ្នកជំនាញបានណែនាំថា ការគេងពីប្រាំពីរទៅប្រាំបីម៉ោងជារៀងរាល់យប់គឺជាការចាំបាច់ ដើម្បីធ្វើឱ្យយើងមានអារម្មណ៍សម្រាកបានគ្រប់គ្រាន់ ការពារការឡើងទម្ងន់ និងរបៀបរស់នៅដែលធ្វើឱ្យយើងចៀសផុតពីជំងឺដង្កាត់ផ្សេងៗ ។ វិធីមួយដើម្បីសម្រេចឱ្យចំគោលដៅនៃការចូលគេងលឿន គឺចាប់ផ្តើមចូលគេង១៥នាទីមុនម៉ោងដែលអ្នកមានទម្លាប់ចូលគេងរៀងរាល់យប់។ ធ្វើបែបនេះរហូតដល់អ្នកឈានដល់ម៉ោងដែលអ្នកចង់បាន ដែលគន្លឹះសំខាន់គឺការព្យាយាមម្តងបន្តិចៗទៅកាន់គោលដៅរបស់អ្នក ។
២-អាហារសម្រន់មុនពេលចូលគេង ៖ កម្រិតជាតិស្ករទាបក្នុងឈាម អាចធ្វើឱ្យអ្នកមានអារម្មណ៍ថា អស់កម្លាំង ទោះបីអ្នកគេងបានគ្រប់គ្រាន់ក៏ដោយ ។ ព្យាយាមទទួលទានប៊័រអាល់ម៉ុងគ្មានជាតិស្ករមួយស្លាបព្រាបាយមុនពេលចូលគេង ។ វានឹងជួយរក្សាស្ថិរភាពជាតិស្ករក្នុងឈាមរបស់អ្នកនៅពេលអ្នកគេង ។
៣-ធ្វើផែនការសម្រាប់ថ្ងៃស្អែក ៖ អ្នកអាចរៀបចំផែនការ និងរឿងចាំបាច់ដទៃទៀតសម្រាប់ថ្ងៃស្អែកមុនពេលចូលគេង ។ អ្នកអាចធ្វើការព្រាងទុកនូវគម្រោងរបស់អ្នក និងសរសេរឱ្យបានច្បាស់នូវអ្វីដែលអ្នកចង់ធ្វើ ។ វានឹងធ្វើឱ្យអ្នកមានអារម្មណ៍កាន់តែងាយស្រួលដើម្បីក្រោកឡើងនៅពេលព្រឹក នៅពេលដែលអ្នកមានគម្រោងច្បាស់លាស់ថាអ្នកនឹងធ្វើអ្វីនៅថ្ងៃបន្ទាប់ ។
៤-គ្មានការគេងមួយភ្លែតទៀតទេ ៖ ចូរប្រាប់ខ្លួនអ្នកថា គ្មានការគេងថែមមួយភ្លែតទៀតទេ សូមព្យាយាមងើបឡើងឱ្យបានឆាប់នៅពេលអ្នកឮសំឡេងម៉ោងរោទ៍ ៕
ចែករំលែកព័តមាននេះ