រាជធានីភ្នំពេញ ៖ មន្រ្តីស្ថានទូតសហរដ្ឋអាមេរិចប្រចាំព្រះរាជាណាចក្រកម្ពុជា បានបដិសេធមិនផ្តល់ទិដ្ឋការអោយកញ្ញា ហេង ចន្ថា MISS GRAND CAMBODIA 2016 កាលពីថ្ងៃទី២១ កញ្ញា ២០១៦
រាជធានីភ្នំពេញ ៖ មន្រ្តីស្ថានទូតសហរដ្ឋអាមេរិចប្រចាំព្រះរាជាណាចក្រកម្ពុជា បានបដិសេធមិនផ្តល់ទិដ្ឋការអោយបវរកញ្ញា ហេង ចន្ថា MISS GRAND CAMBODIA 2016 បានទៅប្រកួតវគ្គផ្តាច់ព្រ័ត្រ នៅលើទឹកដីអាមេរិកនោះទេ នេះតាមការបញ្ជាក់នៅថ្ងៃនេះ នៅលើទំព័រហ្វេសបុកផ្ទាល់ខ្លួនរបស់កញ្ញា ។
នៅលើវេទិកាអន្តរជាតិដ៏មានកិត្តិយសមួយនេះបវរកញ្ញា ហេង ចន្ថា ជាបេក្ខនារី១រូប ដែលតំណាងអោយបេក្ខភាពកម្ពុជា ក្នុងកម្មវិធីប្រកួត MISS GRAND INTERNATIONAL 2016 ត្រូវបានអញ្ជើញពីសំណាក់លោកអគ្គនាយក ណាវ៉ាត់ នៃ Miss Grand International ។ កម្មវិធីប្រកួតផ្តាច់ព្រ័ត្រប្រព្រឹត្តទៅនៅរាត្រីថ្ងៃទី២៥ តុលា ២០១៦ ខាងមុខ នៅសហរដ្ឋអាមេរិក The Westgate Las Vegas Resort & Casino, Las Vegas, រដ្ឋ Nevada,។
កញ្ញាបានចោទជាសំណួរថា ហេតុអ្វីបានជាមន្ត្រីកុងស៊ុលសម្រេចចិត្តមិនផ្តល់ទិដ្ឋាការដល់នាងយ៉ាងដូច្នេះ? នាងនិយាយថា ៖ «ខ្ញុំបានបញ្ជាក់ពីបំណងថា គ្រាន់តែធ្វើដំណើរទៅប្រកួតនៅទីនោះ ក្នុងនាមតំណាងនារីកម្ពុជា ធ្វើដំណើរតាមកាតព្វកិច្ចតម្រូវ រួចត្រឡប់មកវិញ គឺពុំមានបំណងនឹងបោះបង់ចោលមាតុភូមិកម្ពុជា មាតុភូមិកំនើតនោះទេ» សូមបណ្តាប្រិយមិត្ត អ្នកគាំទ្រកម្មវិធីប្រកួត និងគាំទ្ររូបនាងជួយពិចារណា ក៏ដូចជាផ្តល់នូវការយល់ឃើញ ចំពោះលទ្ធផលដែរបានកើតឡើងនេះ។
កញ្ញាបានរៀបរាប់ថា «កាលពីថ្ងៃទី២១ កញ្ញា កន្លងទៅនេះ នាងខ្ញុំបានធ្វើដំណើរទៅកាន់ស្ថានទូតសហរដ្ឋអាមេរិកប្រចាំព្រះរាជាណាចក្រកម្ពុជា ដើម្បីសម្ភាសន៍សុំទិដ្ឋាការទៅសហរដ្ឋអាមេរិក ចូលរូមប្រកួតនៅUSA ។ ពេលចូលទៅដល់បញ្ជរសម្ភាសន៍ មានមន្ត្រីកុងស៊ុលផ្នែកសម្ភាសន៍រូបសង្ហារ២រូប ម្នាក់ជាជនជាតិអាមេរិក និងម្នាក់ទៀតជាជនជាតិកម្ពុជា បានសួរនាង១២សំនួរ «សំនួរដែលបានចោតសួរទៅកាន់នាងទាំងអស់ នាងបានឆ្លើយទៅតាមការជាក់ស្តែង ការពិត ដោយភាពក្លាហាន និងទំនុកចិត្តក្នុងនាម MISS GRAND CAMBODIA ដែលនឹងតំណាងបេក្ខភាពកម្ពុជា » ។
កញ្ញាបានបញ្ជាក់ថា ក្រោយរយៈពេលនៃការសម្ភាសន៍ប្រមាណជា១០នាទី នាងបានទទួលបាននូវលិខិតឆ្លើយតប «បដិសេធ» មិនផ្តល់នូវទិដ្ឋាការពីសំណាក់មន្ត្រីកុងស៊ុល ទាំង២នោះទេ ហើយក្នុងនោះមន្ត្រីកុងស៊ុលជនជាតិកម្ពុជា បានបកប្រែអោយនាងខ្ញុំថា នាងខ្ញុំមិនមានលក្ខណៈគ្រប់គ្រាន់ សមស្របទទួលយកទិដ្ឋាការមិនមែនអន្តោប្រវេសន៍នេះ។ ហើយមន្រ្តីកុងស៊ុលទាំង២រូបបានដើរចេញពីបញ្ជរសម្ភាសន៍គឺ«បិទសិទិ្ធតវ៉ា»។
កញ្ញាបានលើកជាចម្ងល់ថា «សូមប្រិយមិត្តជួយពិចារណានាងខ្ញុំ អ្វីជាកត្តាកំណត់ថា នាងខ្ញុំមិនមានលក្ខណៈគ្រប់គ្រាន់សមស្រប ? ដូចមានលិខិត ទាំងនោះភ្ជាប់មកជាមួយស្រាប់ ។
តែទោះជាយ៉ាងណា កោះសន្តិភាពមិនអាចសុំការបំភ្លឺ ពីមន្ត្រីកុងស៊ុលសហរដ្ឋអាមេរិចប្រចាំព្រះរាជាណាចក្រកម្ពុជា ទាំងពីររូបខាងលើនេះបានទេ ៕
ចែករំលែកព័តមាននេះ