រាជធានីភ្នំពេញ ៖ មួយរយៈនេះ តម្លៃស្រូវអង្ករកំពុងជួបវិបត្តិយ៉ាងធ្ងន់ធ្ងរ និងឈានដល់កសិករនាំគ្នាធ្វើបាតុកម្មចាក់ស្រូវបិទផ្លូវជាដើម ដើម្បីឲ្យក្រសួង ស្ថាប័ន ពិសេសរាជរដ្ឋាភិបាលជួយរកដំណោះស្រាយ ។ ជាការឆ្លើយតបភ្លាមៗ ប្រមុខរាជរដ្ឋាភិបាលបានអំពាវនាវដល់វិស័យរដ្ឋ ក៏ដូចជាវិស័យឯកជន ធ្វើយ៉ាងណារួមគ្នាដោះស្រាយវិបត្តិមួយនេះឲ្យមានសភាពធូរស្រាលវិញ ។
ដើម្បីឆ្លើយតបនឹងការអំពាវនាវនេះ ក្រសួងពាណិជ្ជកម្ម បានប្រកាសនឹងទិញស្រូវពីប្រជាជនឲ្យបានច្រើនជាអតិបរមា ហើយខិតខំស្វែងរកទីផ្សារអន្តរជាតិបន្ថែមទៀតសម្រាប់ស្រូវអង្ករខ្មែរ ។ ដោយឡែកនៅក្នុងវិស័យឯកជន ក៏មានការចូលរួមយ៉ាងសកម្មផងដែរ តាមរយៈការប្រមូលទិញកសិករដើម្បីលើកស្ទួយវិស័យមួយនេះឲ្យមានភាពប្រសើរឡើងវិញ ។
ថ្លែងក្នុងយុទ្ធនាការទិញស្រូវពីប្រជាកសិករកាលពីថ្ងៃទី២៥ កញ្ញា កន្លងមក លោករដ្ឋមន្ត្រីក្រសួងពាណិជ្ជកម្ម ប៉ាន សូរស័ក្ដិ បានឲ្យដឹងថា ស្រូវក្រអូបចំនួនជាង១០០តោនរបស់កសិករនៅឃុំកំពង់ព្រៀង ស្រុកសង្កែ ខេត្តបាត់ដំបង ត្រូវបានប្រមូលទិញដើម្បីប្រគល់ជូនក្រុមហ៊ុនហ្គ្រីនត្រេត សម្រាប់ស្តុកទុក និងប្រើប្រាស់ទៅតាមតម្រូវការជាក់ស្តែង ។ លោកថ្លែងថា ៖ « នេះគឺជាស្មារតីជួយគ្នាទៅវិញទៅមកប្រកបដោយភាពទទួលខុសត្រូវរវាងរដ្ឋ និងរាស្ត្រ ដើម្បីរក្សាកំណើនសេដ្ឋកិច្ច និងពាណិជ្ជកម្មរបស់កម្ពុជា សំដៅកាត់បន្ថយភាពក្រីក្រ និងការធ្វើចំណាកស្រុក ស្របតាមគោលនយោបាយអភិវឌ្ឍន៍ជាតិរបស់រាជរដ្ឋាភិបាល ហើយក្រសួងនឹងធ្វើការទិញស្រូវឲ្យបានច្រើនជាអតិបរមា » ។
លោករដ្ឋមន្ត្រីក៏មានប្រសាសន៍ដែរថា ៖ «ស្រូវអង្ករគឺជាអាយុជីវិតរបស់កសិករ ដូច្នេះនៅពេលតម្លៃស្រូវធ្លាក់ រាជរដ្ឋាភិបាលមានកាតព្វកិច្ចស្រោចស្រង់វិបត្តិមួយនេះ » ។
ដោយឡែក អគ្គនាយកក្រុមហ៊ុនអេមរុរាយស៍ កាលពីពេលថ្មីៗ ក៏បានប្រកាសទិញស្រូវសែនក្រអូបពីកសិករចំនួន១ពាន់តោនផងដែរ ដើម្បីជួយរក្សាទីផ្សារស្រូវកុំឱ្យធ្លាក់ចុះ ក៏ដូចជាជួយសម្រាលទុក្ខរបស់កសិករនៅក្នុងសហគមន៍ស្រុកសង្កែ ខេត្តបាត់ដំបង ។
លោកឧកញ៉ា សុង សារ៉ន អគ្គនាយកក្រុមហ៊ុនអេមរុ រាយស៍ បានមានប្រសាសន៍ថា ៖ « ក្នុង១ឆ្នាំៗ ក្រុមហ៊ុនទិញស្រូវសែនក្រអូបក្នុងបរិមាណពី២ពាន់ទៅ៣ពាន់តោននោះទេ តែដោយសារឆ្នាំនេះ ឃើញថ្លៃស្រូវសែនក្រអូបធ្លាក់ចុះខ្លាំងពេក ក្រុមហ៊ុនក៏សម្រេចចិត្តទិញបន្ថែម១ពាន់តោនទៀត ដើម្បីចូលរួមបង្កើនតម្លៃស្រូវឱ្យងើបឡើងខ្ពស់ជាងមុនពេលមុនៗ » ។
ជាមួយនឹងកិច្ចខិតខំប្រឹងប្រែងនេះដែរ ក្នុងជំនួបសំណេះសំណាលជាមួយលោកឯកអគ្គរដ្ឋទូតថ្មីនៃសាធារណរដ្ឋប្រជាមានិតចិន ប្រចាំនៅកម្ពុជា កាលពីព្រឹកថ្ងៃទី២៦ កញ្ញា ម្សិលមិញនេះ លោកឧបនាយរដ្ឋមន្ដ្រី ហោ ណាំហុង បានស្នើទៅរដ្ឋាភិបាលចិនប្រញាប់ជួយទិញអង្ករតាមអ្វីដែលបានសន្យាកន្លងមក។ លោកឧបនាយករដ្ឋមន្ត្រី បានថ្លែងថា ៖ «បច្ចុប្បន្ន កម្ពុជាកំពុងជួបវិបត្តិដោយសារតែតម្លៃអង្ករធ្លាក់ចុះយ៉ាងខ្លាំង ហើយកន្លងមកចិនបានសន្យាថា នឹងជួយទិញអង្ករពីកម្ពុជាចំនួន៣០ម៉ឺនតោនក្នុងមួយឆ្នាំ ។ ហេតុនេះ លោកឯកអគ្គរដ្ឋទូតថ្មីត្រូវរាយការណ៍ទៅរដ្ឋាភិបាលចិន ដើម្បីប្រញាប់ជួយទិញអង្ករពីកម្ពុជា ទៅតាមអ្វីដែលខ្លួនបានសន្យា » ។
លោក Xiong Bo ឯកអគ្គរដ្ឋទូតចិនបានលើកឡើងថា ការប្រឈមលើវិស័យកសិកម្ម ស្រូវអង្កររបស់កម្ពុជានាពេលនេះ រដ្ឋាភិបាលចិនកំពុងយកចិត្តទុកដាក់ ហើយក្នុងពេលឆាប់ៗខាងមុខ នឹងមានការចុះហត្ថលេខាសំខាន់មួយលើវិស័យនេះ ។
គួរបញ្ជាក់ថា ដើម្បីទប់ទល់ការធ្លាក់ចុះនៃតម្លៃស្រូវក្រអូប រាជរដ្ឋាភិបាលបានដាក់ចេញនូវកម្មវិធីពិសេសដែលមានថវិកាសមមូលទំហំ២៧លានដុល្លារ ក្នុងនោះថវិកាបំរុងរបស់រាជរដ្ឋាភិបាលចំនួន២០លានដុល្លារ និងទុនធនាគារអភិវឌ្ឍន៍ចំនួន៧លានដុល្លារ ដើម្បីជាឥណទានកាតាលីករសំដៅជំរុញស្ថិរភាពភាវូបនីយកម្មថ្លៃស្រូវ និងជំរុញការទិញស្រូវក្នុងស្រុក ដែលមានធនាគារអភិវឌ្ឍន៍ជនបទជាអ្នកអនុវត្តន៍គម្រោង ៕
ចែករំលែកព័តមាននេះ