រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន មានជំនឿថា ក្នុងពេលខាងមុខ ទាំងវិនិយោគិនជប៉ុន ក៏ដូចជាទេសចរណ៍ជប៉ុន នឹងមានការកើនឡើងបន្ថែមទៀតមកកាន់ប្រទេសកម្ពុជា ។
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន មានជំនឿថា ក្នុងពេលខាងមុខ ទាំងវិនិយោគិនជប៉ុន ក៏ដូចជាទេសចរណ៍ជប៉ុន នឹងមានការកើនឡើងបន្ថែមទៀតមកកាន់ប្រទេសកម្ពុជា ។
សម្ដេចថ្លែងបែបនេះនៅឯវិមានសន្តិភាព កាលពីព្រឹកថ្ងៃទី២៦ កញ្ញា ម្សិលមិញ ក្នុងឱកាសអនុញ្ញាតឲ្យលោក Yuji Kummaru ឯកអគ្គរាជទូតជប៉ុន ចូលជួបសម្តែងការគួរសម និងជម្រាបលា បន្ទាប់ពីបញ្ចប់បេសកកម្មការទូតនៅកម្ពុជា អស់រយៈពេលជាង៣ឆ្នាំមកនេះ ។
ក្នុងឱកាសនោះ សម្តេចតេជោបានសម្តែងនូវភាពរីករាយចំពោះការរីកចម្រើនរវាងប្រទេសទាំងពីរទាំងទំនាក់ទំនង និងកិច្ចសហប្រតិបត្តិការ ជាពិសេសការហោះហើរត្រង់មកភ្នំពេញផ្ទាល់ថ្មីៗនេះ និងដំណើរទស្សនកិច្ចនៃមេដឹកនាំប្រទេសទាំងពីរក្នុងរយៈពេលកន្លងមក ។ លើសពីនេះ សម្ដេចតែងតែឆ្លៀតឱកាសជួបជាមួយវិនិយោគិន និងធុរកិច្ចជប៉ុនជាបន្តបន្ទាប់ ធ្វើយ៉ាងណា ឲ្យជប៉ុនចូលមកបណ្តាក់ទុននៅកម្ពុជាកាន់តែច្រើនថែមទៀត ក្នុងការជួយបង្កើតការងារជូនប្រជាពលរដ្ឋកម្ពុជាផងដែរ ។
ជាមួយគ្នានេះដែរ លោកឯកអគ្គរាជទូតជប៉ុន Yuji Kummaru បានថ្លែងអំណរគុណសម្តេចតេជោ ហ៊ុន សែន ដែលបានគាំទ្របេសកកម្មការទូតកន្លងមក ដែលលោកបានសម្រេចការងារយ៉ាងច្រើនក្នុងការពង្រីក និងពង្រឹងទំនាក់ទំនងកិច្ចសហប្រតិបត្តិការទ្វេភាគី កម្ពុជា-ជប៉ុន បានឈានដល់កម្រិតមួយថ្មី។ ក្នុងរយៈកាលកន្លងមកនេះ មានការផ្លាស់ប្តូរទស្សនកិច្ចគ្នាទៅវិញទៅមកដូចជា ការអញ្ជើញមកបំពេញទស្សនកិច្ចរបស់នាយករដ្ឋមន្ត្រីជប៉ុន Shinzo Abe មកកម្ពុជា និងការអញ្ជើញរបស់សម្តេចតេជោ ហ៊ុន សែន ទៅទស្សនកិច្ចនៅជប៉ុនជាបន្តបន្ទាប់ជាដើម ។
ជាងនេះទៅទៀត កម្ពុជា-ជប៉ុន ក៏បានភ្ជាប់ជើងហោះហើរត្រង់ពីតូក្យូមកភ្នំពេញ នៅក្នុងអាណត្តិបំពេញការទូតរបស់លោកផងដែរ។ លោក Yuji Kummaru បានថ្លែងអំណរគុណសម្តេចតេជោ ដែលតែងតែទទួលជួបប្រតិភូពីប្រទេសជប៉ុន រួមទាំងខាងរដ្ឋាភិបាលជប៉ុនក្តី និងវិនិយោគិនក្តី ។ ក្រៅពីនេះ លោកបានជម្រាបជូនសម្តេចតេជោថា រាល់ការរីកចម្រើនទាំងនេះបានធ្វើឲ្យប្រទេសទាំងពីរ ពិសេសទំនាក់ទំនងកិច្ចសហប្រតិបត្តិការបានកើនឡើងផងដែរ ។ លោក Yuji Kummaru បានអញ្ជើញសម្តេចតេជោ ហ៊ុន សែន ដើម្បីទៅចូលរួមក្នុងវេទិកាអនាគតនៃអាស៊ី ដែលរៀបចំនៅប្រទេសជប៉ុន នៅដំណាច់ខែមិថុនា ឆ្នាំ២០១៧ ដែលរដ្ឋាភិបាលជប៉ុនចាត់ទុកថា វេទិកានេះដូចគ្នានឹងវេទិកាសេដ្ឋកិច្ចពិភពលោកដែរ ។
តាមរបាយការណ៍ក្រសួងទេសចរណ៍ ក្នុងរយៈពេល៦ខែដើមឆ្នាំ២០១៦នេះ ភ្ញៀវទេសចរជប៉ុនដែលមកទស្សនាកម្ពុជាមានចំនួន៩០.៨៧៧នាក់ កើនឡើង០,៣% បើធៀបនឹងរយៈពេលដូចគ្នាកាលពីឆ្នាំ២០១៥ មានចំនួន៩០.៦២៧នាក់ ឈរក្នុងលំដាប់ទី៧ ក្នុងចំណោមទីផ្សារអាទិភាពធំៗទាំង១០ ។
តាមប្រភពពីក្រុមប្រឹក្សាអភិវឌ្ឍន៍កម្ពុជា គម្រោងវិនិយោគនៃក្រុមហ៊ុនជប៉ុននៅកម្ពុជាដែលក្រុមប្រឹក្សាអភិវឌ្ឍន៍កម្ពុជាបានទទួលស្គាល់ពីឆ្នាំ១៩៩៤ដល់ឆ្នាំ២០១៥ មានទឹកប្រាក់ចំនួន៨០១លានដុល្លារអាមេរិក ៕
ចែករំលែកព័តមាននេះ