ភ្នំពេញ៖ លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា សម្រាប់ថ្ងៃទី២ នៃពិធីបុណ្យចូលឆ្នាំថ្មីប្រពៃណីជាតិខ្មែរ ប្រជាពលរដ្ឋ ភ្ញៀវទេសចរចំនួន ៦៥០០០នាក់ មកចូលរួមលេងកម្សាន្ត លើសថ្ងៃទី១ ជាង ២ម៉ឺននាក់។ ក្នុងនោះ នៅវត្តភ្នំ ដែលរៀបចំព្រឹត្តិការណ៍សង្ក្រាន្តវត្តភ្នំ មានអ្នកចូលរួមលេងកម្សាន្ត ច្រើនជាងគេ ទាំងថ្ងៃទី១ និងថ្ងៃទី២ នៃពិធីបុណ្យចូលឆ្នាំថ្មី ប្រពៃណីជាតិនេះ។
យ៉ាងណាក៏ដោយ នៅវត្តភ្នំ តម្លៃសំបុត្រផ្ញើម៉ូតូ ថ្លៃដល់ ៤០០០រៀល ក្នុងម៉ូតូ ១គ្រឿង។ រហូតដល់យប់ថ្ងៃទី១៥ ខែមេសា ត្រូវនឹងថ្ងៃចូលឆ្នាំ ថ្ងៃទី២ គឺនៅវត្តភ្នំ កកស្ទះចរាចរណ៍យ៉ាងខ្លាំង នៅតំបន់ជុំវិញ ដោយនៅផ្លូវព្រះនរោត្តម កកស្ទះដល់ស្ពាននាគ ដោយសារតែមានអ្នកទៅលេងច្រើន ហើយកន្លែងផ្ញើម៉ូតូ ក៏បានពង្រីកដល់ចិញ្ចើមផ្លូវនៅរតនាគារជាតិ ជាប់ស្ពាននាគ និងសួនច្បារផ្សារចាស់។
នៅជិតៗវត្តភ្នំ នៅព្រលប់ថ្ងៃទី១៥មេសានេះ មានអ្នកលេងបាញ់ទឹក ដោយក្មេងៗ នៅលើឡាន និងតទុយោពីតាមផ្ទះ បាញ់លើអ្នកធ្វើដំណើរតែម្តង។ ករណីលេងបាញ់ទឹក ជះទឹក និងប៉ាតម្សៅ ត្រូវបានក្មេងៗ លេងនៅថ្ងៃចូលឆ្នាំនេះ នៅភ្នំពេញ និងតាមបណ្តាខេត្ត ស្រុកភូមិនានា ទូទាំងប្រទេស៕
ចែករំលែកព័តមាននេះ