ខេត្តបាត់ដំបង ៖ បុរសម្នាក់ត្រូវរថយន្តបុកស្លា.ប់ស្ថិតលើផ្លូវជាតិលេខ៥៧B កាលពីវេលាម៉ោង០៤ និង៤០នាទីរសៀលថ្ងៃទី២៦កញ្ញា ក្នុងភូមិបន្សាយត្រែង ឃុំបន្សាយត្រែង ស្រុកថ្មគោល ខណៈដែលជនរងគ្រោះកំពុងជិះម៉ូតូបញ្ច្រាសទិសរថយន្ត ហើយអ្នកបើកនោះ បានរត់ចោលរថយន្តបាត់ ។
ខេត្តបាត់ដំបង ៖ បុរសម្នាក់ត្រូវរថយន្តបុកស្លាប់ស្ថិតលើផ្លូវជាតិលេខ៥៧B កាលពីវេលាម៉ោង០៤ និង៤០នាទីរសៀលថ្ងៃទី២៦កញ្ញា ក្នុងភូមិបន្សាយត្រែង ឃុំបន្សាយត្រែង ស្រុកថ្មគោល ខណៈដែលជនរងគ្រោះ កំពុងជិះម៉ូតូបញ្ច្រាសទិសជាមួយរថយន្ត ហើយអ្នកបើកនោះបានរត់ចោលរថយន្តបាត់ ។
មន្ត្រីចរាចរណ៍បានឱ្យដឹងថា ជនរងគ្រោះឈ្មោះឈឹម កំសត់ អាយុ២៧ឆ្នាំ រស់នៅភូមិព្រៃលាវ ឃុំបន្សាយត្រែង ស្រុកថ្មគោល ជិះម៉ូតួពីលិចទៅកើត ។ រីឯរថយន្តម៉ាកហាយឡិនឌ័រ ពាក់ស្លាកលេខភ្នំពេញ 2M-1881 អ្នកបើករត់ចោលរថយន្ត ក្រោយបង្កគ្រោះថ្នាក់ ។
មន្ត្រីដដែលបន្តថា រថយន្តបង្កបានបើកក្នុងល្បឿនលឿន ហើយបានជ្រុលចង្កូតទៅបុកអ្នកជិះម៉ួតូ ពេញទំហឹងពេលកំពុងធ្វើដំណើរបញ្ច្រាសទិសគ្នា បណ្ដាលឱ្យអ្នកជិះម៉ូតូស្លាប់ នៅកន្លែងកើតហេតុតែម្ដង ។ សាក្សីនិយាយថា មុនពេលកើតហេតុ គេឃើញរថយន្តបើកពីទិសខាងកើតទៅលិចក្នុងល្បឿនយ៉ាងលឿន លុះដល់ចំណុចកើតហេតុ មិនដឹងយ៉ាងម៉េច ក៏ជ្រុលចង្កូតទៅបុកអ្នកជិះម៉ូតូដែលជិះបញ្ច្រាសទិសគ្នា។
សាក្សីដដែលបញ្ជាក់ថា ក្រោយពីបង្កគ្រោះថ្នាក់ គេឃើញអ្នកបើកបររថយន្តបានឈប់ រួចបើកទ្វាចុះរត់គេចខ្លួនចោលរថយន្តបាត់ភ្លាមៗដែរ លុះបន្តិចក្រោយមកទើបសមត្ថកិច្ចមកដល់។
បើតាមការពិនិត្យស្លាកស្នាមនៅកន្លែងកើតហេតុ និងស្ដាប់ការបំភ្លឺពីសាក្សី គឺកំហុសភាគច្រើន បណ្ដាលមកពីភាគីរថយន្ត ដែលបើកលឿនខ្វះការប្រុងប្រយ័ត្ន ទើបបង្កឲ្យមានគ្រោះថ្នាក់ រហូតដល់ស្លាប់មនុស្សបែបនេះ។ មន្ត្រីខាងលើបញ្ជាក់ថា ក្រោយពីធ្វើការវាស់វែង និងធ្វើកំណត់ហេតុមន្ត្រីចរាចរណ៏បាននាំយករថយន្ត និងម៉ូតូទៅរក្សាទុកនៅការិយាល័យចរាចរណ៏ខេត្តហើយ ដើម្បីដោះស្រាយតាមផ្លូវច្បាប់ ។
ចែករំលែកព័តមាននេះ