ខេត្តព្រៃវែង ៖ រថយន្តយីឌុបភ្លៅ៥ដ៏ធំមួយគ្រឿង បានក្រឡាប់ចាក់ស្រូវរាប់តោនចូលទៅក្នុងប្រឡាយ ដោយសារតែអ្នកបើកបរដេកលក់ពេលកំពុងបើកបរ ប៉ុន្តែចាត់ទុកថាជាសំណាងមួយដែរ ដែលរថយន្តនេះមិនបានបង្កគ្រោះថ្នាក់ដល់អ្នកដទៃ ដោយគ្រាន់តែធ្វើឲ្យអ្នកបើកបរនិងព្រូរងរបួសស្រាលប៉ុណ្ណោះ។ ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង៣ទាបភ្លឺ ព្រឹកថ្ងៃទី២៦ ខែកញ្ញានេះ នៅលើកំណាត់ផ្លូវជាតិលេខ១១ ត្រង់ចំណុចផ្លូវកោងឡើងស្ពានពាម ដែលស្ថិតក្នុងភូមិបាទី ឃុំពាមរក៍ ស្រុកពាមរក៍ ខេត្តព្រៃវែង។
រថយន្តយីឌុបដែលក្រឡាប់នេះ ពាក់ស្លាកលេខតាកែវ ៣A-១៤១៥ តែគេមិនបានបញ្ជាក់ពីអត្តសញ្ញាណរបស់ម្ចាស់រថយន្តនោះទេ។ តាមការឲ្យដឹងពីក្រុមកម្មករ ដែលកំពុងតែកើបជញ្ជូនស្រូវពីក្នុងប្រឡាយនោះ បានប្រាប់ឲ្យដឹងថា រថយន្តយីឌុបនេះដឹកស្រូវមកពីខេត្តពោធិ៍សាត់ គោលដៅយកទៅលក់នៅច្រកទ្វារព្រំដែនអន្តរជាតិបន្ទាយចក្រី ដែលស្ថិតនៅក្នុងស្រុកព្រះស្តេច ខេត្តព្រៃវែង។ ប៉ុន្តែពេលមកដល់ចំណុចកើតហេតុ ដែលជាផ្លូវកោងឡើងស្ពានពាម តែដោយសារអ្នកបើកបរដេកលក់មួយ ភាំងទើបមិនបានបត់កោងតាមស្ពាន ធ្វើឲ្យរថយន្តធ្លាក់ផ្លូវក្រឡាប់ចូលប្រឡាយបែបនេះទៅ។
គួរបញ្ជាក់ថា ដោយសារហេតុការណ៍នេះមិនបានបណ្តាលឲ្យមានគ្រោះថ្នាក់ដល់អ្នកដទៃ ហើយក៏មិនបានធ្វើឲ្យដងផ្លូវខូច ទើបពុំមានសមត្ថកិច្ចណាទៅឃាត់រថយន្ត ឬធ្វើអន្តរាគមន៍អ្វីឡើយ គឺទុកឲ្យម្ចាស់រថយន្តកើបប្រមូលយកស្រូវ និងស្ទូចរថយន្តយកចេញពីប្រឡាយយកទៅជួសជុលតាមសម្រួល៕
ចែករំលែកព័តមាននេះ