ខេត្តកណ្ដាល ៖ បន្ទាប់ពីនគរបាលស្រុកកៀនស្វាយ បានឃាត់ខ្លួនស្ត្រីចំណាស់ម្នាក់តាមបទបញ្ជាលោក ហេង ផេង ព្រះរាជអាជ្ញារងអមសាលាដំបងខេត្តនៅពេលព្រឹក ស្រាប់តែល្ងាចឡើងថ្ងៃដដែលក៏បានឃាត់ខ្លួនកូនប្រុសម្នាក់ទៀត ពាក់ព័ន្ធនឹងករណីលួចទ្រព្យសម្បត្តិអ្នកភូមិជាមួយគ្នាឈ្មោះ ងន ព្រាប ភេទស្រី អាយុ៨៥ឆ្នាំ នៅភូមិភូមិធំ ឃុំភូមិធំ ស្រុកកៀនស្វាយ កាលពីថ្ងៃទី១៦
ខេត្តកណ្ដាល ៖ បន្ទាប់ពីនគរបាលស្រុកកៀនស្វាយ បានឃាត់ខ្លួនស្ត្រីចំណាស់ម្នាក់តាមបទបញ្ជាលោក ហេង ផេង ព្រះរាជអាជ្ញារងអមសាលាដំបងខេត្តនៅពេលព្រឹក ស្រាប់តែល្ងាចឡើងថ្ងៃដដែល ក៏បានឃាត់ខ្លួនកូនប្រុសម្នាក់ទៀត ពាក់ព័ន្ធនឹងករណីលួចទ្រព្យសម្បត្តិអ្នកភូមិជាមួយគ្នាឈ្មោះ ងន ព្រាប ភេទស្រី អាយុ៨៥ឆ្នាំ នៅភូមិភូមិធំ ឃុំភូមិធំ ស្រុកកៀនស្វាយ កាលពីថ្ងៃទី១៦ ខែកញ្ញា ។
ជនសង្ស័យទាំង២នាក់ម្តាយ-កូននេះ ម្ដាយឈ្មោះ តុប ស្រីទូច អាយុ៤៨ឆ្នាំ ឃាត់ខ្លួនកាលពីថ្ងៃទី២៤ ខែកញ្ញា វេលាម៉ោង១០និង៥២នាទីព្រឹក កូនប្រុសឈ្មោះ ទេព សម្បត្តិ អាយុ២៣ឆ្នាំ ឃាត់ខ្លួននៅវេលាម៉ោង៥និង៥០នាទីល្ងាចថ្ងៃដដែល ក្រោយពីធ្វើសកម្ម ភាពរួចរត់គេចខ្លួនបាន៨ថ្ងៃហើយចូលផ្ទះវិញ ។
លោកអនុសេនីយ៍ឯក វង សែ អធិការរងនគរបាលស្រុកកៀនស្វាយទទួលផែនព្រហ្មទណ្ឌបានឲ្យដឹងថា នៅថ្ងៃទី២០ ខែកញ្ញា ស្ត្រីឈ្មោះ ងន ព្រាប បានមកដាក់ពាក្យបណ្តឹងនៅអធិការដ្ឋាននគរបាលស្រុកថា កាលពីថ្ងៃទី១៦ ខែកញ្ញា វេលាម៉ោង៦ព្រឹក ខណៈរូបគាត់មិននៅមានចោរគាស់ទ្វារផ្ទះរបស់គាត់ចូលទៅរុករើកកាយលួចយកប្រាក់អស់ចំនួន៣ម៉ឺនដុល្លារ មាស៥តម្លឹងប្លាទីន១តម្លឹង ខ្សែដៃដាំពេជ្រ១ខ្សែ ហើយបានដឹងពីមុខសញ្ញាជនសង្ស័យគឺឈ្មោះទេព សម្បត្តិ ជាអ្នកលួចហើយរត់គេចខ្លួនបាត់ ។
ក្រោយពីទទួលបានពាក្យបណ្តឹងភ្លាម កម្លាំងសមត្ថកិច្ចក៏ចុះទៅពិនិត្យមើលផ្ទះកើតហេតុ និងស្រាវជ្រាវស្វែងរកជនសង្ស័យតែរកមិនឃើញ។ លុះនៅយប់ថ្ងៃទី២០ ខែកញ្ញា ស្ត្រីឈ្មោះ តុបស្រីទូច ត្រូវជាម្តាយបង្កើតជនសង្ស័យ បានយកប្រាក់ចំនួន៣.៩០០ដុល្លារ ខ្សែ.ក-ខ្សែដៃសរុប៤ខ្សែ មកឲ្យស្ត្រីរងគ្រោះវិញដោយប្រាប់ថា កូនប្រុសគាត់ទូរស័ព្ទមកប្រាប់ឲ្យយកមកឲ្យវិញ តែរូបគាត់មិនដឹងថាកូនលួចទេ ។
ដោយចំនួនទឹកប្រាក់និងគ្រឿងអលង្ការដែលម្តាយជនសង្ស័យយកមកឲ្យជនរងគ្រោះវិញ មិនគ្រប់ចំនួនដែលបាត់ ទើបលោក ហេង ផេង ព្រះរាជអាជ្ញារងអមសាលាដំបូងខេត្ត បញ្ជាឲ្យសមត្ថកិច្ចឃាត់ខ្លួនស្ត្រីរូបនេះ នៅថ្ងៃទី២៤ ខែកញ្ញា វេលាម៉ោងជាង១០ព្រឹក ពីបទសមគំនិតជាមួយកូនលួចទ្រព្យសម្បត្តិអ្នកដទៃ ។
លោកអធិការរងបន្តថា ក្រោយពីឃាត់ខ្លួនម្តាយហើយ នៅល្ងាចថ្ងៃដដែលមានព័ត៌មានរាយការណ៍មកប្រាប់ថាជនឈ្មោះ ទេព សម្បត្តិ ជាកូនដែលរត់គេចខ្លួននោះបានលួចចូលផ្ទះវិញ។ ភ្លាមនោះ សមត្ថកិច្ចក៏ចុះទៅព័ទ្ធចាប់ឃាត់ខ្លួនជនសង្ស័យជាកូនបាននៅវេលាម៉ោង៥និង៥០នាទីល្ងាចថ្ងៃដដែល នាំមកកាន់អធិការដ្ឋានដើម្បីសាកសួរនិងកសាងសំណុំរឿងបញ្ជូនទាំង២នាក់ម្តាយនិងកូន ទៅស្នងការដ្ឋាននគរបាលខេត្តដើម្បីចាត់ការបន្តតាមនីតិវិធី ។
លោក វង សែ បន្ថែមថា នៅចំពោះមុខសមត្ថកិច្ចនគរបាលស្រុក ជនសង្ស័យ ទេព សម្បត្តិ និយាយសារភាពថា ទ្រព្យសម្បត្តិដែលខ្លួនលួចនោះគឺមានមួយស្បោង ចំនួនគ្រឿងអលង្ការមានដូចការរៀបរាប់របស់ជនរងគ្រោះប្រាកដមែន ប៉ុន្តែលុយមានតែ១២.៧០០ដុល្លារទេ មិនមែន៣ម៉ឺនដុល្លារដូចជនរងគ្រោះនិយាយឡើយ ។ ប៉ុន្តែខ្លួនលក់ខ្សែ.ក២ខ្សែគឺប្លាទីន១ខ្សែនិងមាស១ខ្សែបាន១.៦០០ដុល្លារ ទិញម៉ូតូ១គ្រឿងជិះ និងលុយមួយចំនួនស៊ីចាយអស់ហើយ នៅសល់តែចំនួន៣.៩០០ដុល្លារ និងខ្សែ.កខ្សែដៃ៤ខ្សែដែលខ្លួនលាក់ទុកនៅផ្ទះ បានប្រាប់ឲ្យម្តាយយកមកឲ្យជនរងគ្រោះវិញ និងម៉ូតូ១គ្រឿងជិះមកផ្ទះនេះប៉ុណ្ណោះ ៕
ចែករំលែកព័តមាននេះ