រាជធានីភ្នំពេញ ៖ លោកតា ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ ដែលបានដាក់បណ្ដឹងប្តឹងព្រះតេជ គុណ ប៊ុត ប៊ុនតិញ ពីបទបរិហារកេរ្តិ៍ជាសាធារណៈនោះ បានចូលខ្លួនឆ្លើយការពារបណ្ដឹងរបស់លោក កាលពីព្រឹកថ្ងៃទី២៦ កញ្ញា ២០១៦ ។
នៅក្នុងពាក្យបណ្តឹងរបស់លោកម៉ម សូណង់ដូ ចុះថ្ងៃទី១ កញ្ញា ២០១៦ បានឱ្យដឹងថា មូលហេតុដែលលោកប្តឹងព្រះតេជគុណ ប៊ុត ប៊ិនតិញ ដោយសារព្រះអង្គបានផ្សព្វផ្សាយព័ត៌មានមិនពិត តាមប្រព័ន្ធផ្សព្វផ្សាយសង្គម ដែលបានធ្វើឲ្យប៉ះពាល់កិត្តិនាមរបស់លោក និងប៉ះពាល់ដល់ការងារគណបក្ស និងប៉ះពាល់ដល់ទឹកចិត្ត អ្នកគាំទ្រគណបក្ស ដែលទង្វើនេះ គឺជាបទបរិហារកេរ្តិ៍សាធារណៈ តាមមាត្រា៣០៥ នៃក្រមព្រហ្មទណ្ឌ ។
ពាក្យបណ្តឹងបានបញ្ជាក់អង្គហេតុថា នៅថ្ងៃទី៣០ មេសា ឆ្នាំ២០១៥ ព្រះតេជគុណ ប៊ុត ប៊ុនតិញ បានផុសខ្សែវីដេអូមួយ ដែលបង្ហាញពីរូបព្រះអង្គ ដែលកំពុងថ្លែងអត្ថាធិប្បាយ វិភាគនយោបាយ និងសង្គម។ នៅក្នុងបទអត្ថាធិប្បាយនោះ ព្រះអង្គបានមានបន្ទូលចោទមកលើរូបលោក និងភរិយា ថា «…បែរទៅជាតា ម៉ម សូណង់ដូ មកចរចាថ្លៃគ្នា សូមឱ្យប្រពន្ធគាត់ ឈរជាតំណាងរាស្ត្រមុនគាត់ ហើយគាត់ចង់បានតំណែង ធំជាងនោះទៀត ប៉ុន្តែនៅក្នុងគណបក្សសង្គ្រោះជាតិ នៅពេលនោះ បានព្រមព្រៀងគ្នា ជួយជ្រោមជ្រែងឱ្យលោកតាម៉ម សូណង់ដូ ទៅឈរជាតំណាងរាស្ត្រ ខេត្តក្រចេះ ប៉ុន្តែលោកតា ម៉ម សូណង់ដូ គាត់ចង់បានទាំងពីរ ប្រពន្ធផង ប្តីផង ហេតុដូច្នេះ គណបក្សសង្គ្រោះជាតិ មិនព្រម ទើបធ្វើឱ្យតាម៉ម សូណង់ដូ អាក់អន់ស្រពន់ចិត្ត មិនចូលរួមក្នុងបក្សមួយរយៈ…ខ្សែវីដេអូនេះ បានរក្សាទុក នៅក្នុងគណនីហ្វេសប៊ុករបស់ព្រះតេជគុណ ប៊ុត ប៊ុនតិញ រហូតមកដល់សព្វថ្ងៃ»៕
ចែករំលែកព័តមាននេះ