ការបាញ់ប្រហារកើតមានជាប់រដឹកនៅសហរដ្ឋអាមេរិក ។ នៅ BALTIMORE រដ្ឋម៉ារីឡែន នាយប់ថ្ងៃទី២៤ មក២៥ កញ្ញា បុរស៣នាក់បានបាញ់ប្រហារបណ្តាលឱ្យមនុស្ស៨នាក់រងរបួស ក្នុងនោះមានឪពុកម្នាក់ និងកូនស្រីអាយុទើប៣ឆ្នាំ ។ ពួកខ្មាន់កាំភ្លើងបានរត់គេចខ្លួនបាត់ជាមួយអាវុធរបស់ពួកគេ ។
នៅកន្លែងមួយស្ថិតនៅចម្ងាយប្រមាណជា១.០០០គីឡូម៉ែត្រពី BALTIMORE គឺនៅក្បែរបរិវេណសាកលវិទ្យាល័យមួយនៅរដ្ឋអីុលលីណយ គឺសាកលវិទ្យាល័យនៅ CHAMPAIGN មានការបាញ់ប្រហារនេះមួយទៀតផ្ទុះឡើង ។ ការបាញ់ប្រហារបណ្តាលឱ្យមនុស្ស៥នាក់រងរបួស ហើយមនុស្សម្នាក់ស្លាប់ក្នុងអ្វីដែលគេយល់ថា ជាជម្លោះរវាងពួកនិស្សិត ។
រយៈពេលត្រឹមតែ២៤ម៉ោងនៅសហរដ្ឋអាមេរិកមានការបាញ់បោះដល់ទៅ៣លើក ។ ការបាញ់ប្រហារដែលបង្ហូរឈាមបំផុតកើតមានកាលពីយប់ថ្ងៃទី២៣ កញ្ញា នៅឯមជ្ឈមណ្ឌលពាណិជ្ជកម្មមួយនៃទីក្រុង BURLINGTON រដ្ឋវ៉ាស៊ីនតោន ។ នារី៤នាក់ និងបុរសម្នាក់ត្រូវបាញ់សម្លាប់ដោយយុវជនអាយុ២០ឆ្នាំម្នាក់ ឈ្មោះ ARCAN CETIN មានដើមកំណើតនៅតួកគី ។ ប៉ូលិសតាមចាប់ខ្លួនជននេះបាននាយប់ថ្ងៃទី២៤ កញ្ញា ប៉ុន្តែហេតុផលនៃការបាញ់ប្រហារនោះនៅពុំទាន់ដឹងនៅឡើយ ៕
ចែករំលែកព័តមាននេះ