ជារៀងរាល់ឆ្នាំ លោកកុយ ស៊ីឌឿន ប្រធានក្លិបសិល្បៈឌីភី និងជាអតីតក្មេងកំព្រានៅមជ្ឈមណ្ឌលកៀនឃ្លាំង តែងតែដឹកនាំក្រុមគ្រួសារ និងភរិយានាំអំណោយមួយចំនួនទៅចែកជូនបងប្អូន លោកយាយ លោកតា និងចាស់ៗ រស់នៅស្រុកកំណើតជាដរាប ។
ជាក់ស្តែង កាលពីថ្ងៃទី២៥ កញ្ញា ២០១៦ លោកកុយ ស៊ីឌឿន បានដឹកនាំសិល្បករល្បីៗ ព្រមទាំងយកអំណោយថវិកាមួយចំនួនទៅស្រុកមុខកំពូលខេត្តកណ្តាល ក្នុងឃុំរកាកោង ដើម្បីសំណេះសំណាលជាមួយចាស់ទុំ អ្នកស្រុក អ្នកភូមិ និងប្រគល់ជូនទេយ្យទានមួយចំនួនប្រគេនព្រះសង្ឃ ក្នុងឱកាសកាន់បិណ្ឌឆ្នាំថ្មីនេះ ។
ក្នុងឱកាសនោះ ក៏មានការពិសារអាហារសាមគ្គីចូលរួមពីសំណាក់សិល្បករជាច្រើនផងដែរ ដើម្បីបង្កកម្មវិធីឲ្យសប្បាយរីករាយក្រោយនាំគ្នាធ្វើបុណ្យដាក់ទាន ។ លោកកុយ ស៊ីឌឿន និងភរិយា លោកស្រីហួត សុភាព បានចែកជាសារុង ខោអាវ ក្រណាត់ និងថវិកាជូនដល់ចាស់ៗ និងអ្នកខ្វះខាតយ៉ាងច្រើនកុះករ ដល់អ្នកស្រុកភូមិ និងអ្នកចំណុះជើងវត្តនាម្តុំរកាកោងនោះផងដែរ។
ជាការកត់សម្គាល់ មិនថាតែពេលណានោះទេ អតីតកុមារកំព្រានៅកៀនឃ្លាំងនេះ តែងតែយកចិត្តទុកដាក់គិតដល់ស្រុកកំណើតមួយនេះ ។ ការសាងកុសលជាញឹកញាប់នេះ ក៏ព្រោះតែលោកធ្លាប់លំបាក កាលពីនៅក្មេងរស់នៅបានបាយសម្លកន្លែងមណ្ឌលកុមារកំព្រាហើយខិតខំរៀនរហូតទទួលបានការងារល្អចិញ្ចឹមជីវិត មានប្រពន្ធកូនមានមុខរបររឹងមាំប្រែជីវិតកាន់តែប្រសើរខុសពីអតីតកាល ។
ជាញឹកញាប់ លោកតែងតែផ្តាំដល់កុមារកំព្រាជំនាន់ក្រោយ ឱ្យខិតខំរៀនស្តាប់គ្រូគោរពវិន័យដឹកគុណអ្នកជួយ ។ ក្រៅពីនេះ លោកក៏តែងតែនាំក្មេងៗកំព្រា ដែលជាប់បាក់ឌុបទៅដើរលេងកម្សាន្ត និងផ្តល់រង្វាន់ជាដើមនេះ ជាទំលាប់របស់លោកផងដែរ។
នាវេនកាន់បិណ្ឌទី៩នោះ គេឃើញវត្តមានតារាចូលរួមមានអ្នកនាងស៊ុន ណារីម៉ូនីកា អ្នកនាងម៉ៅ ស៊ីណាត កញ្ញាស្រីពៅមុខឈើ លោកគន់ រៀមរតនៈ លោកអៀម វុត្ថា លោកកុល សុភោ និងតារាប្រុសស្រីមួយចំនួនទៀតផងដែរ។
ចែករំលែកព័តមាននេះ