រាជធានីភ្នំពេញ ៖ ដើម្បីចូលរួមជំរុញពាណិជ្ជកម្មទ្វេភាគីឱ្យមានកំណើនពីមួយឆ្នាំទៅមួយឆ្នាំ និងទាក់ទាញវិនិយោគិន ក៏ដូចជាផ្តល់ឱកាសដល់ពាណិជ្ជករនៃប្រទេសទាំងពីរកម្ពុជា-ឥណ្ឌូណេស៊ី ចាប់ដៃគូពាណិជ្ជកម្មកាន់តែងាយស្រួល ស្ថានទូតសាធារណរដ្ឋឥណ្ឌូណេស៊ីប្រចាំកម្ពុជា បានរៀបចំពិព័រណ៍ពាណិជ្ជកម្ម និងទេសចរណ៍ ដែលមានក្រុមហ៊ុនចូលរួមតាំងបង្ហាញផលិតផល និងសេវាកម្មប្រមាណ៦១ស្តង់ ។
ថ្លែងក្នុងពិធីបើកសម្ពោធពិព័រណ៍កាលពីព្រឹកថ្ងៃទី២៣ កញ្ញា កន្លងមក នៅមជ្ឈមណ្ឌលពិព័រណ៍ និងសន្និបាតកោះពេជ្រ លោកឯកអគ្គរដ្ឋទូតសាធារណរដ្ឋឥណ្ឌូណេស៊ីប្រចាំកម្ពុជា បានឱ្យដឹងថា ស្ថានទូតប្រទេសឥណ្ឌូណេស៊ី តែងតែរៀបចំពិព័រណ៍ពាណិជ្ជកម្មប្រចាំឆ្នាំនៅកម្ពុជាជារៀងរាល់ឆ្នាំ ចាប់តាំងពី២០០៦មក ដើម្បីបង្ហាញនូវផលិតផល និងសេវាកម្មជាច្រើន ហើយនៅឆ្នាំនេះ ក្រុមហ៊ុនមកពីប្រទេសឥណ្ឌូណេស៊ីចំនួន២២ និងក្រុមហ៊ុនឥណ្ឌូណេស៊ីនៅកម្ពុជាចំនួន៣៩ក្រុមហ៊ុន បានយកផលិតផលនិងសេវាកម្មរបស់ខ្លួនមកចូលរួមតាំងបង្ហាញដើម្បីចូលរួមបង្កើតឱកាសធ្វើពាណិជ្ជកម្ម ធ្វើយ៉ាងណា ជំរុញពាណិជ្ជកម្មនៃប្រទេសទាំងពីរឲ្យមានកំណើនជាវិជ្ជមាន ។
លោក Pitono Purnomo ឯកអគ្គរដ្ឋទូតនៃសាធារណរដ្ឋឥណ្ឌូណេស៊ី បានថ្លែងថា ៖ «ពិព័រណ៍ពាណិជ្ជកម្ម និងទេសចរណ៍ឆ្នាំ២០១៦នេះ ជាផ្នែកមួយនៃការប្តេជ្ញាចិត្តរបស់យើងក្នុងការពង្រឹងទំនាក់ទំនងសេដ្ឋកិច្ច និងការធ្វើពាណិជ្ជកម្មទ្វេភាគី ។ ខ្ញុំមានសេចក្តីរីករាយដែលបានឃើញការធ្វើពាណិជ្ជកម្មរបស់យើងកើនឡើងជាវិជ្ជមាន ។ ក្នុងឆ្នាំ២០១៥កន្លងទៅ ទំហំពាណិជ្ជកម្មរួមរវាងកម្ពុជា និងឥណ្ឌូណេស៊ី មានទឹកប្រាក់សរុប៤៥០លានដុល្លារអាមេរិក កើនឡើង១៦លានដុល្លារ បើធៀបនឹងឆ្នាំ២០១៤ ។ ដូច្នេះ ខ្ញុំជឿជាក់ថា បើយើងព្យាយាមខិតខំធ្វើការ នោះតួលេខនៃការធ្វើពាណិជ្ជកម្មរវាងប្រទេសទាំងពីរនឹងកើនឡើងមួយទ្វេជាពីរនៅក្នុងរយៈពេល៥ឆ្នាំខាងមុខ » ។
ថ្លែងនាឱកាសនោះដែរ លោក ឈួន ដារ៉ា រដ្ឋលេខាធិការក្រសួងពាណិជ្ជកម្ម បានលើកឡើងថា ប្រទេសឥណ្ឌូណេស៊ី ជាដៃគូសំខាន់របស់កម្ពុជា ។ លោកបន្ដថា ៖ « ឥណ្ឌូណេស៊ី ជាប្រទេសដែលមានសេដ្ឋកិច្ចធំនៅក្នុងទីផ្សារអាស៊ាន និងបានដើរតួនាទីជាអ្នកអភិវឌ្ឍន៍សេដ្ឋកិច្ចនៅក្នុងតំបន់ផងដែរ តាមរយៈការធ្វើពិព័រណ៍ពាណិជ្ជកម្ម តួយ៉ាងដូចជា កិច្ចសហប្រតិបត្តិការរវាងកម្ពុជា និងឥណ្ឌូណេស៊ីពេលនេះ នឹងបានចូលរួមធ្វើឱ្យមានទំទាក់ទំនងល្អ និងជំរុញការធ្វើពាណិជ្ជកម្មឱ្យកើនឡើងបន្ថែមទៀតនាពេលខាងមុខ»។
ប្រធានគ្រប់គ្រងក្រុមហ៊ុន Salak K.A.K ដែលនាំចូលផ្លែសាឡាក់ឥណ្ឌូណេស៊ីមកកម្ពុជា អ្នកស្រី ទូច ភក្តី បានឱ្យដឹងថា អ្នកស្រីបាននាំចូលផ្លែសាឡាក់ពីឥណ្ឌូណេស៊ី ដំបូងក្នុងអំឡុងដើមឆ្នាំ២០១៦ ។ កាលណោះ គឺមានតែនិស្សិត និងអ្នកធ្វើដំណើរចេញ ចូលទៅបរទេសប្រមាណ៣០%ទេដែលបានស្គាល់ ប៉ុន្តែដោយសារការព្យាយាមផ្សព្វផ្សាយ និងចូលរួមតាមរយៈការតាំងពិព័រណ៍នានា ឃើញថា ផ្លែសាឡាក់ឥណ្ឌូណេស៊ី ទទួលបានការគាំទ្រច្រើន ធ្វើឱ្យបរិមាណនាំចូលមានការកើនឡើងគួរឲ្យកត់សម្គាល់ផងដែរ ។
អ្នកស្រីថា ៖ « សព្វថ្ងៃនេះ ផ្លែសាឡាក់ឥណ្ឌូណេស៊ី ទទួលបានការគាំទ្រពីពលរដ្ឋកម្ពុជាច្រើន ។ មកដល់ពេលនេះ យើងបានចែកចាយនៅតាមផ្សារទំនើប និងហាងលក់ផ្លែឈើធំមួយចំនួននៅក្រុងភ្នំពេញ និងមួយផ្នែកទៀតបានបោះទៅឱ្យអ្នកផ្គត់ផ្គង់ផ្លែឈើដើម្បីចែកចាយទៅតាមបណ្តាខេត្ត » ។
ទន្ទឹមនឹងនេះ អ្នកស្រីសង្ឃឹមថា បន្ទាប់ពីការចូលរួមតាំងបង្ហាញផលិតផលនៅក្នុងពិព័រណ៍ពាណិជ្ជកម្ម និងទេសចរណ៍របស់ប្រទេសឥណ្ឌូណេស៊ីពេលនេះ នឹងធ្វើឱ្យអាជីវកម្មទទួលបានការគាំទ្រពីអតិថិជនកាន់តែច្រើនថែមទៀត ។ មិនត្រឹមប៉ុណ្ណោះ អ្នកស្រីថា ៖ « ការទទួលទានផ្លែសាឡាក់ គឺផ្តល់គុណប្រយោជន៍យ៉ាងច្រើនចំពោះសុខភាព » ៕
ចែករំលែកព័តមាននេះ