មន្ត្រីកងរាជអាវុធហត្ថសក្ដិ៤ម្នាក់ បា.ញ់គំរាមប្រជាពលរដ្ឋ
ខេត្តក្រចេះ ៖ ប្រជាពលរដ្ឋនៅស្រុកសំបូរបានចាត់ទុកអំពើរបា.ញ់ប្រហាររបស់មន្ត្រីកងរាជអាវុធហត្ថ សក្ដិ៤ម្នាក់ គឺជាចេតនាគំរាមកំហែងយ៉ាងធ្ងន់ធ្ងរដល់សន្តិសុខការរស់នៅក្នុងព្រៃ
ខេត្តក្រចេះ ៖ ប្រជាពលរដ្ឋនៅស្រុកសំបូរបានចាត់ទុកអំពើរបាញ់ប្រហាររបស់មន្ត្រីកងរាជអាវុធហត្ថ សក្ដិ៤ម្នាក់ គឺជាចេតនាគំរាមកំហែងយ៉ាងធ្ងន់ធ្ងរដល់សន្តិសុខការរស់នៅក្នុងព្រៃរបស់ពួកគាត់ និងធ្វើឲ្យពួកគាត់មានអារម្មភិតភ័យតក់ស្លុតជាខ្លាំង។ ការលើកឡើរបស់ប្រជាំពលរដ្ឋប្រមាណជាជាង២០០គ្រួសារ ដែលកំពុងតែរស់នៅធ្វើស្រែចម្ការ អាស្រ័យអនុផលព្រៃឈើ និងធ្វើរ៉ែមាស នៅក្នុងព្រៃចំណុចអូរត្រូន ឃុំក្បាលដំរី ស្រុកសំបូរ គឺបានធ្វើឡើងក្រោយពីមានការបំផ្ទុះអាវុធវែងអស់ជិត៣០គ្រាប់ ពីមន្ត្រីជាន់ខ្ពស់កងរាជអាវុធខេត្ត ពាក់សក្ដិ៤ម្នាក់ ឈ្មោះទេព សុភា និងមានភារកិច្ចយាមការពារព្រៃ ក្រុមហ៊ុនរ៉ែមាស របស់ក្រុមហ៊ុនចិនមួយនៅចំណុចខាងលើ។
តែបើទោះជាយ៉ាងណាស្ថានភាពការរួមគ្នាប្តឹង ពីសំណាក់ប្រជាពលរដ្ឋទាំងជាង២០០គ្រួសារ មកអាជ្ញាធរទៅលើទង្វើររបស់មន្ត្រីកងរាជអាវុធហត្ថរូបនេះ ត្រូវបានស្ងប់ស្ងាត់ទៅវិញក្រោយពីមន្ត្រីកងរាជអាវុធហត្ថរូបនោះត្រូវបានដកមកអង្គភាពវិញ។ នេះបើតាមការបញ្ជាក់ពីលោក សុខ យឿន មេភូមិអូរត្រូនបានឲ្យដឹងនៅថ្ងៃទី២៥ ខែកញ្ញានេះ។ បើតាមរបាយការណ៍មួយរបស់មេភូមិអូរត្រូនលោក សុខ យឿន ដែលបានសសេរជាពាក្យបណ្តឹងមកប៉ុស្តិ៍នគរបាលរដ្ឋបាល ក្រោយពីមានការបំផ្ទុះអាវុធភ្លាមៗបានឲ្យដឹងថា កាលពីថ្ងៃទី២២ កញ្ញា មន្ត្រីកងរាជអាវុធហត្ថឈ្មោះ ទេព សុភា និងកូនចៅម្នាក់ទៀត បានផឹកស៊ីជាមួយនឹងលោកមេភូមិ រួមជាមួយអ្នកភូមិមួយចំនួនទៀតនៅក្រោមផ្ទះអ្នកស្រុកក្នុងភូមិមួយកន្លែង។
ក្នុងពេលផឹកស៊ីមន្ត្រីកងរាជអាវុធហត្ថ រូបនេះ បានបង្គាប់ឲ្យលោកមេភូមិដើរទារលុយរណ្តៅរ៉ែមាស របស់អ្នកភូមិមកឲ្យរូបគេក្នុងមួយរណ្តៅចំនួន១០០ដុល្លារ តែលោកមេភូមិបានបដិសេធមិនធ្វើតាម។ បន្ទាប់ពីមានការខ្វែងគំនិតគ្នារួចមន្ត្រីកងរាជអាវុធហត្ថរូបនេះ ក៏បានទៅឃាត់គោយន្តកន្ត្រៃ ដឹកឈើដែលមានដឹកកំណាត់ឈើតិចតួចរបស់អ្នកភូមិចំនួន៣គ្រឿង។ ក្នុងកំណត់ហេតុ បណ្តឹងនោះបានឲ្យដឹងទៀតថា ក្រៅពីការចាប់ឃាត់គោយន្តកន្ត្រៃរួចមកកងរាជអាវុធហត្ថរូបនោះ ក៏បានប្រើកាំភ្លើងអាកាភ្ជង់ទៅលើអ្នកភូមិប្រុស-ស្រី៤នាក់ទៀត ដែលកំពុងតែឈរនៅលើគំនរថ្មក្បែរអណ្តូងទឹកមួយក្រោយភូមិ និងបានបាញ់ឡើងលើប្រមាណជិត៣០គ្រាប់ បណ្តាលឲ្យអ្នកភូមិទាំងនោះរត់ប្រសាចជើង របូតខោ របូតសារ៉ុង។
សេចក្តីរាយការណ៍បានឲ្យដឹងថា ក្រោយពីកើតហេតុភ្លាមៗអ្នកភូមិក្នុងភូមិហាក់មានការខឹងសម្បារយ៉ាងខ្លាំងទៅលើទង្វើររបស់មន្ត្រីកងរាជអាវុធហត្ថរូបនេះ ដោយចោទថា មន្ត្រីកងរាជអាវុធហត្ថរូបនេះមានចេតនា គំរាមគំហែង និងប៉ុនប៉ងបាញ់សម្លាប់ពួកគាត់ ហើយក៏បាននាំគ្នាសសេរពាក្យ បណ្តឹងផ្ដិតមេដៃស្នើឲ្យអាជ្ញាធរមានចំណាត់ការមកលើមន្ត្រីកងរាជអាវុធហត្ថរូបនេះ។ តែយ៉ាងណាស្ថានការប្តឹងផ្ដល់ ក៏ត្រូវបានស្ងប់ស្ងាត់វិញក្រោយពីមន្ត្រីកងរាជអាវុធហត្ថរូបនេះត្រូវមានចំណាត់ការដកចេញពីតំបន់នោះ។ បើតាមប្រភពព័ត៌មានពីទីបញ្ជាការដ្ឋានកងរាជអាវុធហត្ថខេត្តបានឲ្យដឹងថា មន្ត្រីកងរាជអាវុធហត្ថ ដែលរងការប្តឹងពីអ្នកភូមិ ត្រូវបានដកមកនៅទីបញ្ជាការវិញបន្ទាប់ពីបង្កហេតុរួច ហើយក៏រង់ចាំចំណាត់ការបន្តពីថ្នាក់លើផងដែរ៕
ចែករំលែកព័តមាននេះ