ខេត្តសៀមរាប ៖ រថយន្តដឹកសាំងរបស់ក្រុមហ៊ុនមួយបានបើកបោះពួយក្នុងល្បឿនយ៉ាងលឿន ស្រាប់តែដល់ផ្លូវកោងខ្លាំង មិនប្រយ័ត្នជាន់ហ្វ្រាំងរអិលធ្លាក់ជ្រោះ បណ្តាលឱ្យព្រូឡានម្នាក់របួសស្រាល ចំណែកអ្នកបើកបរគេចខ្លួនបាត់ បង្កឱ្យមានការភ្ញាក់ផ្អើលទាំងយប់។ ហេតុការណ៍បង្កឱ្យមានការភ្ញាក់ផ្អើលនេះ កើតឡើងនៅវេលាម៉ោង២១យប់ ថ្ងៃទី២៣ ខែកញ្ញា នេះស្ថិតនៅចំណុចក្បាលប្រើស ក្នុងភូមិអង្កាញ់ ឃុំស្វាយលើ ស្រុកស្វាយលើ ខេត្តសៀមរាប។
លោកវរសេនីយ៍ត្រី ស៊ុន អេង អធិការនគរបាលស្រុកស្វាយលើ បានប្រាប់ឱ្យដឹងនៅរសៀលថ្ងៃទី២៤ ខែកញ្ញា ឆ្នាំ២០១៦ នេះថា បើតាមការសាកសួរហេតុការណ៍គ្រោះថ្នាក់នេះ គឺគ្រោះថ្នាក់ដោយសារអ្នកបើកបរបើកក្នុងល្បឿនលឿនពេក មិនប្រយ័ត្នពេលដល់ផ្លូវកោងខ្លាំង ទើបបណ្តាលឱ្យធ្លាក់ជ្រោះបះជើងឡើងលើតែម្តង។ លោកបានបន្តថា ក្នុងហេតុការណ៍នោះមានព្រូឡានម្នាក់បានរងរបួសស្រាល ចំណែកអ្នកបើកបរចុះរត់គេចខ្លួនបាត់។
លោកបានបន្ថែមទៀតថា រថយន្តនោះឥឡូវមើលមិនច្បាស់ទេដោយសារធ្លាក់ជ្រោះ និងមានស្លាកលេខភ្នំពេញ 3D7977 បើកពីខេត្តសៀមរាបទៅខេត្តព្រះវិហារ ប្រហែលមកពីដាក់ប្រេងឱ្យម៉ូយក្នុងខេត្តសៀមរាប រួច៏ត្រឡប់ទៅវិញ ខណៈមេឃកំពុងភ្លៀងផង ទើបរអិលធ្លាក់ជ្រោះបែបហ្នឹង។
លោកបានបញ្ជាក់បន្ថែមថា ចំពោះរថយន្តដឹកសាំងដែលធ្លាក់ជ្រោះនោះ គ្មានសាំងទេ ប្រហែលជាបើកទៅយកប្រេងសាំងដាក់ឱ្យម៉ូយបន្ថែមទៀត៕
ចែករំលែកព័តមាននេះ