សហរដ្ឋអាមេរិក ៖ ចំនួនការលក់ផ្ទះបន្តនៅសហរដ្ឋអាមេរិកបានថយចុះដោយនឹកស្មានមិនដល់ក្នុងខែសីហា ព្រោះតែមានការធ្លាក់ចុះនៃបរិមាណផ្ទះសម្រាប់លក់ ដែលកំពុងតែធ្វើឲ្យតម្លៃកើនឡើងយ៉ាងលឿន ។
សមាគមភ្នាក់ងារអចលនទ្រព្យជាតិបាននិយាយកាលពីថ្ងៃព្រហស្បតិ៍ថា បរិមាណការលក់ផ្ទះក្នុងពេលបច្ចុប្បន្ននេះបានធ្លាក់ចុះ០,៩% មកស្មើអត្រាប្រចាំឆ្នាំត្រឹម៥,៣៣លានខ្នង ។
តាមការស្ទង់មតិរបស់អ្នកវិភាគសេដ្ឋកិច្ចបានព្យាករណ៍ថា នឹងមានការកើនឡើងនៃបរិមាណការលក់១,១%ក្នុងខែកញ្ញានេះ មកស្មើនឹង៥,៤៥លានខ្នង ។
បរិមាណការលក់ផ្ទះនៅខែកក្កដា ត្រូវបានគេកែពី៥,៣៩លានខ្នង ទៅ៥,៣៨លានខ្នងវិញ។ ប៉ុន្តែបើទោះជាបរិមាណលក់បានធ្លាក់ទាបជាងគេលំដាប់ទី២ក្នុងឆ្នាំនេះក្តី ក៏បរិមាណនៃការលក់ផ្ទះបន្តបានកើន០,៨% បើធៀបនឹងឆ្នាំមុន ។
ទីផ្សារអចលនទ្រព្យបានរឹងមាំឡើងវិញ ព្រោះតែមានការកើនឡើងនៃចំនួនការងារ។ អត្រាមនុស្សគ្មានការងារធ្វើបានកើនឡើងប្រមាណ៥% តាំងពីខែសីហា ឆ្នាំមុនមកម្ល៉េះ ហើយទីផ្សារការងារក៏បានចាប់ផ្តើមបង្កើនប្រាក់ខែ បើទោះជាវាមិនគ្រប់គ្រាន់ បើធៀបនឹងការកើនឡើងនៃតម្លៃផ្ទះក៏ដោយ ។
លោក Lawrence Yun ប្រធានអ្នកសេដ្ឋកិច្ចក្នុងសមាគមភ្នាក់ងារអចលនទ្រព្យជាតិ (NAR) បាននិយាយថា ៖ « យើងបានត្រឡប់ទៅរកពេលដែលមានផ្ទះសម្រាប់លក់តិច និងការកើនឡើងនូវតម្លៃផ្ទះខ្ពស់ » ។
NAR ឱ្យដឹងទៀតថា មានតែប៉ែកខាងឦសាន ដែលមានបរិមាណការលក់ច្រើនជាងប៉ែកដទៃ ព្រោះតែមានការផ្គត់ផ្គង់ច្រើនជាងគេ។ អ្នកទិញថ្មី ស្មើនឹង៣១% នៃបរិមាណការលក់ផ្ទះក្នុងខែសីហា ។
ទិន្នន័យក្នុងសប្តាហ៍នេះបង្ហាញថា វិស័យអចលនទ្រព្យ (ផ្ទះ) ក្នុងសហរដ្ឋអាមេរិកបានធ្លាក់ចុះក្នុងខែសីហា ច្រើនជាងអ្វីដែលបានគិតទុក ព្រោះតែអាកាសធាតុមិនអំណោយផល ដែលនាំឲ្យមានការបង្អាក់សកម្មភាពសាងសង់ក្នុងប៉ែកខាងត្បូងប្រទេស ។
បរិមាណផ្ទះដែលមិនបានលក់ចេញក្នុងទីផ្សារ បានធ្លាក់ចុះ៣,៣% មកស្មើត្រឹម២,០៤លានខ្នងក្នុងខែសីហា ។ ផ្ទះសម្រាប់លក់បានធ្លាក់ចុះ១០,១% បើធៀបនឹងឆ្នាំមុន ។
យោងតាមល្បឿននៃការលក់ក្នុងខែសីហា វាត្រូវការ៤.៦ខែដើម្បីផ្ទះលក់អស់នៅលើទីផ្សារ។ ៦ខែ គឺជារយៈពេលដ៏ល្អសម្រាប់ធ្វើឲ្យមានលំនឹងរវាងការផ្គត់ផ្គង់ និងតម្រូវការ ។ សម្រាប់ឆ្នាំមុនវិញ គឺមានរយៈពេល៥.១ខែ ។
ជាមួយនឹងបរិមាណផ្ទះមានតិចក្នុងទីផ្សារ តម្លៃផ្ទះជាមធ្យមបានកើនឡើង៥,១% បើធៀបនឹងឆ្នាំមុន មកស្មើនឹង២៤០.២០០ដុល្លារអាមេរិកនាខែមុន ៕
ចែករំលែកព័តមាននេះ