ប្រទេសវៀតណាម ៖ សមាគមអចលនទ្រព្យវៀតណាមបានស្នើឲ្យធ្វើវិសោធនកម្មច្បាប់ស្ដីពីដីធ្លី និងច្បាប់ស្ដីពីការជួញដូរអចលនទ្រព្យ ដើម្បីបង្កើនលក្ខខណ្ឌអំណោយផលសម្រាប់វិនិយោគិនក្នុងការវិនិយោគលើវិស័យអចលនទ្រព្យ ។
ប្រធានសមាគមអចលនទ្រព្យទីក្រុងហូជីមិញ លោក Le Hoang Chau បាននិយាយថា សមាគមបានស្នើឲ្យធ្វើវិសោធនកម្មច្បាប់ចំនួន២ ដើម្បីអនុញ្ញាតឲ្យបណ្ដាសហគ្រាសលក់គម្រោងពេញលេញ ឬផ្នែកនៃគម្រោងបន្ទាប់ពីបញ្ចប់ការដ្ឋានសាងសង់ ។ ច្បាប់ទាំងនេះគួរតែពិចារណាទៅលើការផ្ទេរកម្មសិទ្ធិនៅក្នុងដំណើរការនៃការវិនិយោគ និងគម្រោងជួញដូរអចលនទ្រព្យ ។
លោកChau និយាយថា ៖ « ការវិនិយោគលើគម្រោងអចលនទ្រព្យមានច្រើនដំណាក់កាល ។ ការផ្ទេរកម្មសិទ្ធិនៃគម្រោងមួយ គឺជាសកម្មភាពមួយក្នុងចំណោមវិនិយោគិន ។ វិនិយោគិនដែលលក់គម្រោង មិនបានបំពេញនីតិវិធីនៃការងាររដ្ឋបាល ឬដំណាក់កាលនៃការវិនិយោគទេ ចំណែកវិនិយោគិនដែលទិញគម្រោងគួរតែបំពេញនូវកិច្ចការទាំងនេះ » ។
នៅក្រោមបទប្បញ្ញាត្តិនេះ ការផ្ទេរសិទ្ធិទាំងមូល ឬផ្នែកខ្លះនៃគម្រោង ត្រូវតែមានប្លង់លម្អិតទៅតាមមាត្រដ្ឋាន១ភាគ៥០០ ឬត្រូវបានអនុម័តដោយប្លង់មេ ដើម្បីបំពេញសំណង និងសម្អាតការដ្ឋាន ហើយមានវិញ្ញាបនបត្របញ្ជាក់ពីដីធ្លីសម្រាប់ផ្ទេរកម្មសិទ្ធិនៃគម្រោង។ ប្រសិនបើការស្នើសុំត្រូវបានអនុម័តនោះ ការផ្ទេរកម្មសិទ្ធិនៃគម្រោង គឺដំណើរការដោយរលូន ។
សភាពាណិជ្ជកម្ម និងឧស្សាហកម្មវៀតណាមក៏បានស្នើទៅរដ្ឋាភិបាល លុបចោលមាត្រា ១៧១ នៃច្បាប់ស្តីពីការអនុម័តផែនការលំនៅឋាន ការវិនិយោគសម្រាប់ការកសាងគម្រោងផងដែរ ។
លោក Tran Ngoc Quang អគ្គលេខាធិការនៃសមាគមអចលនទ្រព្យវៀតណាម បាននិយាយថា សមាគមបានគាំទ្រចំពោះសំណើរបស់សមាគមអចលនទ្រព្យទីក្រុងហូជីមិញ និង សភាពាណិជ្ជកម្ម និងឧស្សាហកម្មវៀតណាម ហើយបានស្នើឲ្យរដ្ឋាភិបាល និងរដ្ឋសភា ធ្វើវិសោធនកម្មលើបទប្បញ្ញត្តិមួយចំនួននៅក្នុងច្បាប់ស្ដីពីដីធ្លី ឆ្នាំ២០១៣ ដើម្បីបង្កើតឲ្យមានតម្លាភាពក្នុងវិស័យដីធ្លី ៕
ចែករំលែកព័តមាននេះ