ខេត្តតាកែវ ៖ នាយិការអង្គការយុវជនកិច្ចការសង្គម កញ្ញា ធីសុវណ្ណថា បានបន្តធ្វើការរិះគន់ប្រធាន និងអនុប្រធានគណបក្សសង្គ្រោះជាតិ លោក សម រង្ស៊ី និង លោក កឹម សុខា ថាជាមេដឹកនាំដែលមិនបានគិតគូពីប្រយោជន៍ប្រជាពលរដ្ឋនិងប្រទេសជាតិ ដោយម្នាក់សម្បូរស្រី ឯម្នាក់ទៀតដើរអំពាវនាវឲ្យសហគមន៍អន្តរជាតិផ្តាច់ជំនួយកម្ពុជា ។
នៅចំពោះមុខប្រជាពលរដ្ឋ១២០០នាក់ដែលចូលរួមវេទិកាសាធារណៈលើកទី៣៨ ស្តីពីសិទ្ឋិពលរដ្ឋនិងការអភិវឌ្ឍភូមិ-ឃុំ នៅក្នុងស្រុកសំរោង ខេត្តតាកែវ កាលពីព្រឹកថ្ងៃទី២៤ កញ្ញា ២០១៦ អតីតសកម្មជនគណបក្សសង្គ្រោះជាតិរូបនេះក៍បានបន្តវាយប្រហារលោក កឹម សុខា ថាជាមនុស្សមិនទទួលខុសត្រូវរត់គេចពីច្បាប់ ហើយថាពលរដ្ឋនឹងមិនទៅចូលរួមធ្វើបាតុកម្មរបស់គណបក្សសង្គ្រោះជាតិដើម្បីការពារអំពើខុសច្បាប់របស់លោក កឹម សុខានោះទេ ។
ក្រៅពីរិះគន់មេបក្សប្រឆាំង កញ្ញា ធី សុវណ្ណថា ក៍ស្នើដល់រាជរដ្ឋាភិបាលចាត់វិធានការច្បាប់ចំពោះមន្ត្រីខិលខូចពុករលួយ និងអំពាវនាវដល់អ្នកមានទ្រព្យសម្បត្តិ ក្រុមហ៊ុនឯកជននិងមន្ត្រីរាជការដែលមានលទ្ឋភាព បន្តទិញស្រូវអង្ករដើម្បីជួយប្រជាកសិករខ្មែរផងដែរ ៕
ចែករំលែកព័តមាននេះ