រាជធានីភ្នំពេញ ៖ អ្វីទៅជាជំងឺទាចទឹក? ជំងឺទាចទឹក (Ascites) គឺជាវត្តមានទឹកដក់នៅក្នុងស្រោមពោះ ដែលមិនមែនជាឈាមទេ ។ តើមូលហេតុអ្វីខ្លះ ដែលអាចបង្កឱ្យមានជាជំងឺទាចទឹក? ក៏មូលហេតុសំខាន់ៗ ដែលអាច បណ្តាលឱ្យកើតទាចទឹកមាន៖
-ជំងឺក្រិនថ្លើម (Liver Cirrhosis) ដែលមានប្រមាណជា៨០%
-ជំងឺខ្សោយតម្រងនោមរ៉ាំរ៉ៃ (Chronic Renal Failure)
-ជំងឺខ្សោយបេះដូង
-ជំងឺរបេងស្រោមពោះ ឬពោះវៀន (Peritoneal or Intestinal Tuberculosis)
-ជំងឺមហារីកស្រោមពោះ (Primary Peritoneal Cancer) ឬការរាលដាលមកក្នុងស្រោមពោះ (Peritoneal Metastases) នៃជំងឺមហារីកផ្សេងៗដូចជា មហារីកថ្លើម លំពែង ក្រពះ ពោះវៀនធំ ឬក្រពេញអូវែរជាដើម ។
ដកស្រង់ប្រសាសន៍លោកស្រីវេជ្ជបណ្ឌិត វង ច័ន្ទលីណា ឯកទេសថ្លើម ក្រពះ ពោះវៀននៃមន្ទីរពេទ្យកាល់មែ៉ត ដែលបានធ្វើការកត់សម្គាល់ថា រោគសញ្ញាដែលអាចឱ្យយើងដឹងថា អ្នកជំងឺម្នាក់មានជំងឺទាចទឹកមានដូចជា ៖
-ពោះឡើងតឹងធំ និងភ្លឺរលោង
-ផ្ចិតប៉ោងធំខុសពីធម្មតា(ករណីមានទឹកដក់ច្រើន)
-ការថយចុះនូវបរិមាណទឹកនោម
-ហើមជើងទាំងសងខាង
-ឡើងទម្ងន់ខុសពីធម្មតា ប៉ុន្តែរូបរាងអ្នកជំងឺស្គមស្គាំង (ឡើងតឹងធំតែពោះ) ។ គេអាចរកឃើញទាចទឹកដោយការពិនិត្យរាងកាយអ្នកជំងឺដោយឱ្យគាត់សម្រាន្តផ្អៀង រួចសង្កេតមើលទៅលើពោះ និងយកដៃស្ទាប ហើយគោះលើពោះរកសំឡេងទឹកក្នុងស្រោមពោះ ។ គ្រូពេទ្យអាចស្វែងរកឃើញនូវរោគសញ្ញានៃជំងឺផ្សេងៗ ដែលជាមូលហេតុដូចបានរៀបរាប់ខាងលើ ។
ករណីទាចទឹកដែលមានបរិមាណតិចតួច ការធ្វីរោគវិនិច្ឆ័យ អាចធ្វើទៅបានតាមរយៈរូបភាពវេជ្ជសាស្ត្រផ្សេងៗដូចជា អេកូសាស្ត្រ (Abdomen Ultrasound) ឬស៊ីធីស្កែន (CT Scan) ។
ចំណាំ៖ ករណីមួយចំនួនអាចបង្កឱ្យពោះរបស់អ្នកឡើងរីកតឹងធំខុសពីធម្មតា ដែលវាមិនមែនជាជំងឺទាចទឹកដូចជា ៖
-ប្លោកនោមដែលពេញទៅដោយទឹកនោម នៅពេលស្ទះទឹកនោម
-ពេលមានផ្ទៃពោះ (ចំពោះស្ត្រី)
-ខ្យល់ក្នុងពោះវៀន ករណីស្ទះពោះវៀន
-ដុំគីសនៅក្នុងដៃស្បូន (ចំពោះស្ត្រី) ។ ល។
ដូច្នេះមានតែការទៅជួបពិគ្រោះជាមួយគ្រួពេទ្យទេ ដែលអាចបញ្ជាក់ច្បាស់ពីរោគវិនិច្ឆ័យនេះបាន ។
តើអ្នកគួរធ្វើដូចម្តេច នៅពេលដែលអ្នកសង្ស័យថា មានជំងឺទាចទឹក? អ្នកគួរទៅជួបពិគ្រោះជំងឺជាមួយវេជ្ជបណ្ឌិតជំនាញ ដើម្បីធ្វើរោគវិនិច្ឆ័យរកមូលហេតុ និងធ្វើការព្យាបាលតាមបច្ចេកទេសឲ្យបានត្រឹមត្រូវ ។ មូលហេតុមួយចំនួនអាចព្យាបាលជាសះស្បើយដូចជា ជំងឺរបេងស្រោមពោះ ឬរបេងពោះវៀន ។ល។
ផ្ទុយទៅវិញ មូលហេតុផ្សេងៗទៀត អាចក្លាយជាជំងឺរ៉ាំរ៉ៃ ឬអាចបណ្តាលឱ្យប៉ះពាល់ដល់អាយុជីវិតលោកអ្នកទៀតផង ។ ជៀសវាងការប្រើប្រាស់ឱសថដោយខ្លួនឯង ដោយពំុមានវេជ្ជបញ្ជា និងថ្នាំបុរាណទាំងឡាយណាដែលពុំមានប្រភពច្បាស់លាស់ ។
បញ្ជាក់ ៖ ជំងឺក្រិនថ្លើម (Liver cirrhosis) ជាមូលហេតុចម្បងនៃជំងឺទាចទឹក ។ ជំងឺក្រិនថ្លើមនេះ អាចបណ្តាលមកពីជំងឺរលាកថ្លើមរ៉ាំរ៉ៃ បង្កដោយវីរុស បេ និងសេ (Hepatitis B and C) ឬការទទួលទានស្រាលើសកម្រិតយូររ៉ាំរ៉ៃ និងខ្លាញ់រុំថ្លើម (Steato-Hepatitis)។ «សូមមេត្តាមកពិគ្រោះយោបល់ជាមួយក្រុមវេជ្ជបណ្ឌិតឯកទេសជំងឺថ្លើមនៃមន្ទីរពេទ្យកាល់ម៉ែតដើម្បីស្វែងរកមូលហេតុនៃជំងឺទាំងនេះ និងទទួលយកការព្យាបាលឱ្យទាន់ពេលវេលា ៕
ចែករំលែកព័តមាននេះ