ខេត្តកំពង់ស្ពឺ ៖ ស្ត្រីម្នាក់ត្រូវបានសមត្ថកិច្ចឃាត់ខ្លួនកាលពីរសៀលថ្ងៃទី២៤ ខែកញ្ញា ឆ្នាំ២០១៦ នៅភូមិថ្មី ឃុំចំបក់ ស្រុកភ្នំស្រូច ខេត្តកំពង់ស្ពឺ បន្ទាប់ពីអ្នកជិតខាងបាន …
ខេត្តកំពង់ស្ពឺ ៖ ស្ត្រីម្នាក់ត្រូវបានសមត្ថកិច្ចឃាត់ខ្លួនកាលពីរសៀលថ្ងៃទី២៤ ខែកញ្ញា ឆ្នាំ២០១៦ នៅភូមិថ្មី ឃុំចំបក់ ស្រុកភ្នំស្រូច ខេត្តកំពង់ស្ពឺ បន្ទាប់ពីអ្នកជិតខាងបានរាយការណ៍ថា បានវាយធ្វើបាបកូនចិញ្ចឹមស្ទើរតែរាល់ថ្ងៃរហូតមានរបួសស្នាមពេញខ្លួនប្រាណ ។
សមត្ថកិច្ចបានឲ្យដឹងថា ស្ត្រីឈ្មោះ ហ៊ុយ គីមហ៊ី អាយុ៥១ឆ្នាំ ជាម្តាយចិញ្ចឹម មានទីលំនៅកន្លែងឃាត់ខ្លួន ចំណែកក្មេងស្រីរងគ្រោះឈ្មោះ មាន គីមហុង អាយុ១១ឆ្នាំ ។
សមត្ថកិច្ចស្រង់សំដីអ្នកជិតខាងបានឲ្យដឹងថា ស្ត្រីរូបនេះបានយកក្មេងស្រីរងគ្រោះមកចិញ្ចឹមធ្វើកូនរបស់ខ្លួនច្រើនឆ្នាំមកហើយ គឺចិញ្ចឹមតាំងពីតូចរហូតធំពេញ ។ ក្រោយពីនាងធំស្ត្រីខាងលើបានប្រើនាងឲ្យធ្វើកិច្ចការផ្ទះមិនសូវមានពេលសម្រាកនោះទេ មានពេលខ្លះនាងត្រូវអត់បាយក៏មានព្រោះតែធ្វើតាមចិត្តស្ត្រីចិត្តយក្ខិនីមិនទាន់ ។
នៅចំពោះមុខសមត្ថកិច្ចក្មេងស្រីរងគ្រោះបានបំភ្លឺប្រាប់សមត្ថកិច្ចថា រូបនាងត្រូវម្តាយវាយធ្វើបាបជារៀងរាល់ថ្ងៃនៅពេលដែលខឹងនាងធ្វើការយឺត ហើយពេលខ្លះបង្អត់បាយនាងក៏មានដែរ ។ ក្មេងស្រីរងគ្រោះបន្តថាបើទោះជាម្តាយប្រើអំពើហិង្សាមកលើខ្លួនបែបនេះក្តី ក៏ខ្លួនមិនខឹងនឹងម្តាយដែរ ។
ក្រោយពេលឃាត់ខ្លួន ស្ត្រីចិត្តយក្ខិនីរូបនេះបានស្រែកឡូឡាដាក់សមត្ថកិច្ចថា គាត់វាយប្រដៅកូនរបស់គាត់ហេតុអ្វីបានជាសមត្ថកិច្ចមកចាប់គាត់ទៅវិញ ។
អ្នករស់នៅជិតផ្ទះស្ត្រីខាងលើបានលួចខ្សឹបប្រាប់ថា ក្មេងស្រីរងគ្រោះត្រូវស្ត្រីរូបនេះវាយធ្វើបាបស្ទើរតែរាល់ថ្ងៃហើយការវាយម្តងៗរហូតដល់មានស្នាមពេញខ្លួនក៏មានដែរ ។ ដោយទ្រាំនឹងការវាយធ្វើបាបពីសំណាក់ម្តាយចិញ្ចឹមពុំបាន អ្នកជិតខាងក៏បានរាយការណ៍ឲ្យសមត្ថកិច្ចចុះមកឃាត់ខ្លួនម្តាយចិញ្ចឹមចិត្តអប្រិយរូបនេះតែម្តង ដើម្បីឲ្យរៀងចាល កុំឲ្យថ្ងៃក្រោយវាយធ្វើបានក្មេងដូចនេះទៀត ។
សមត្ថកិច្ចស្រុកភ្នំស្រួចបានឲ្យដឹងថា ក្រោយឃាត់ខ្លួនស្ត្រីសង្ស័យពាក់ព័ន្ធករណីហិង្សាលើកុមារី (កូនចិញ្ចឹម)មកអធិការដ្ឋានស្រុក កម្លាំងជំនាញបានកសាងសំណុំរឿងតាមនិតិវិធីបញ្ជូនទៅស្នងការខេត្តដើម្បីចាត់ការបន្ត ។
សមត្ថកិច្ចក៏សូមអំពាវនាវផងដែរដល់អង្គការសប្បុរស សូមមេត្តាជួយនាំយកក្មេងស្រីនេះឲ្យទៅរស់នៅមណ្ឌលកុមារកំព្រា និងឲ្យបានរៀនសូត្រនដូចក្មេងដទៃផង បើរស់នៅជាមួយស្ត្រីរូបនេះទៀតថ្ងៃក្រោយវាសនានាងមិនដឹងជាក្លាយទៅជាយ៉ាងណាទេ ៕
ចែករំលែកព័តមាននេះ