ខេត្តស្ទឹងត្រែង ៖ រថយន្តដឹកប្រេងចំណុះ១៦០០០លីត្រ បានបុកស្ពានដែកបណ្តាលឱ្យរងការខូចខាតយ៉ាងដំណំ កាលពីល្ងាចថ្ងៃទី២៣ កញ្ញា ស្ថិតលើស្ពានភូមិលើ ក្នុងសង្កាត់ស្រះប្ញស្សី ក្រុងស្ទឹងត្រែង ដែលសំណាងល្អ ពុំមានអ្នករងគ្រោះ ។
ប្រភពឱ្យដឹងថា រថយន្តដឹកប្រេងនោះ ជារបស់ក្រុមហ៊ុនLHR នាំប្រេងមកពីខេត្តរតនគិរី ចូលស្ទឹងត្រែងចែកចាយឱ្យស្ថានីយប្រេងរបស់ក្រុមហ៊ុន លុះទម្លាក់ប្រេងរួចរាល់ចេញដំណើរត្រឡប់ទៅខេត្តរតនគិរីវិញ ស្រាប់តែជួបគ្រោះថ្នាក់នេះតែម្តង ។
តាមប្រភពពីតៃកុងរថយន្តបានបញ្ជាក់ថា មេឃធ្លាក់ភ្លៀងខ្លាំង បន្ទាប់ពីយកប្រេងដាក់តាមស្ថានីយ៍រួចរាល់ ដោយពួកគេមានគ្នា៣នាក់ (ស្រីម្នាក់) ចេញដំណើរត្រឡប់ ទៅខេត្តរតនគិរីវិញ ។ លុះបើកដល់ចំណុចកើតហេតុ ចម្ងាយពីស្ពានដែកម៉ាឡេជាង៥០ម៉ែត្រ បានបង្អង់ល្បឿនជាន់ហ្វ្រាំង ។ ពេលនោះស្រាប់តែគាំងហ្វ្រាំងខាងក្រោយ បណ្តាលឱ្យរថយន្តអូសទទឹងផ្លូវ ទៅបុកស្ពានជាប់កណ្តាលផ្លូវ តែក្នុងហេតុការណ៍នោះ មិនបង្កឱ្យអ្នកណាម្នាក់រងគ្រោះឡើយ ។
អ្នកធ្វើដំណើរលើដងផ្លូវ ឃើញហេតុការណ៍ធ្វើឱ្យម្នាក់ៗបះសក់ជាន់ហ្វ្រាំងម៉ូតូ រថយន្ត ស្ទើរមិនទាន់ និងលាន់មាត់គ្រប់គ្នាថា
ប្រសិនក្នុងស៊ីទែនប្រេងនោះ មានប្រេងពេញអាចផ្ទុះឆេះសន្ធោសន្ធៅហើយ ព្រោះស៊ីទែនប្រេងផ្ទុករហូត១៦០០០លីត្រ បុកត្រូវដែកស្ពានរយះធ្លាយដែកទាំងដុំមើល ទៅគួរឱ្យព្រឺក្បាល ។
ក្រោយកើតហេតុ គេឃើញកម្លាំងនគរបាលចរាចណ៍ជើងគោក មន្ត្រីមន្ទីរឧស្សាហកម្មរ៉ែ និងថាមពល អនុប្រធានមន្ទីរសាធា រណការ និងដឹកជញ្ជូនខេត្ត ចុះពិនិត្យកន្លែងកើតហេតុ ព្រមទាំងទាមទារនាំយករថយន្តទៅដោះស្រាយ លើសំណងខូចខាតព្រទ្យសម្បត្តិសាធារណៈ។
ភ្លាមនោះដែរ បុគ្គលិកបម្រើការងារនៅក្រុមហ៊ុនប្រេងLHR បានយករថយន្តដឹងប្រេងក្រុមហ៊ុនទៅអូសចេញពីកន្លែងកើតហេតុ ដើម្បីសម្រួលចរាចណ៍ឲ្យដំណើរការឡើងវិញ ព្រមទាំងសំណងទៅមន្ទីរសាធារណៈការ និងដឹកជញ្ជូនខេត្តស្ទឹងត្រែង ដើម្បីជួសជុលបង្កាន់ដៃស្ពានដែកវិញ នូវទឹកប្រាក់ចំនួន៥០០ដុល្លារអាមេរិក ។
ចែករំលែកព័តមាននេះ