រាជធានីភ្នំពេញ ៖ នៅអាជ្ញាធរជាតិប្រយុទ្ធប្រឆាំងគ្រឿងញៀនកាលពីថ្ងៃទី១១ មីនា បានរៀបចំពិធីប្រកាសមុខតំណែងអគ្គលេខាធិការរងនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងបំពាក់គ្រឿងឥស្សរិយយសដល់មន្ត្រីដែលមានស្នាដៃក្រោមអធិបតីភាព លោកកៅ ខុនដារ៉ា អនុប្រធានអាជ្ញាធរជាតិប្រឆាំងគ្រឿងញៀន។
តាមព្រះរាជក្រឹត្យ លោកជំទាវអ៊ីវ ស្រ៊ី ត្រូវបានតែងតាំងជាអគ្គលេខាធិការរងនៃអគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនមានឋានៈស្មើអនុរដ្ឋលេខាធិការ។ ចំណែកគ្រឿងឥស្សរិយយសត្រូវផ្តល់ជូននៅក្នុងឱកាសនោះមានចំនួន៤០នាក់ ក្នុងនោះអ្នកដែលទទួលបានគ្រឿងឥស្សរិយយស ព្រះរាជាណាចក្រកម្ពុជាថ្នាក់ធិបឌិន្ទចំនួន៤នាក់ ថ្នាក់សេនា១៨នាក់ និងថ្នាក់អស្សឫទ្ធិ១៨នាក់។
លោកកៅ ខុនដារ៉ា បានថ្លែងថា ក្នុងរយៈពេលប៉ុន្មានឆ្នាំនេះ អាជ្ញាធរជាតិប្រយុទ្ធប្រឆាំងគ្រឿងញៀនបានខិតខំដោះស្រាយការងារសំខាន់ៗមួយចំនួនដូចជា ការលើកកំពស់ការអប់រំផ្សព្វផ្សាយឱ្យមានការយល់ដឹងជាសាធារណៈអំពីគ្រោះថ្នាក់នៃគ្រឿងញៀនក្នុងចំណោមប្រជាជនទូទៅ និងក្រុមដែលងាយរងគ្រោះតាមរយៈការចូលរួមយ៉ាងផុសផុលពីក្រសួង-ស្ថាប័នក្នុងការរៀបចំវគ្គបណ្តុះបណ្តាល និងការផលិតឯកសារ និងសារអប់រំគ្រឿងញៀន។ ការពង្រឹងកិច្ចសហប្រតិបត្តិការល្អក្នុងការងារអនុវត្តច្បាប់ជាមួយប្រទេសនានានៅក្នុងតំបន់ បំផ្លាញបានជាបន្តបន្ទាប់នូវអង្គការចាត់តាំងពួកឧក្រិដ្ឋជនគ្រឿងញៀន។ ការកែសំរួលច្បាប់ស្តីពីការត្រួតពិនិត្យគ្រឿងញៀន ដោយបំពេញចន្លោះប្រហោងផ្នែកនីតិវិធី និងបង្កើនកំរិតទំងន់ទោសចំពោះជនល្មើស។ ការកសាងបាននូវបទដ្ឋានមួយចំនួនពាក់ព័ន្ធនឹងការបង្កើតមជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀន។ ការផ្តល់នូវរបបឧបត្ថម្ភដល់ជនរងគ្រោះដោយសារគ្រឿងញៀននៅតាមមជ្ឈមណ្ឌលបណ្តោះអាសន្ន ព្យាបាល និងស្តារនីតិសម្បទាអ្នកញៀនគ្រឿងញៀនជាដើម។
លោកបញ្ជាក់ថា ទោះបីជាយ៉ាងណាក៏ដោយ យើងនៅមានបញ្ហាប្រឈមមួយចំនួនដែលត្រូវបន្តដោះស្រាយចំពោះមុខដូចជាការកាត់បន្ថយគ្រោះថ្នាក់ ការកសាងប្រព័ន្ធទិន្នន័យព័ត៌មាន ការងារព្យាបាល និងស្តារនីតិសម្បទា និងការធ្វើសមាហរណកម្មអ្នកញៀនទៅក្នុងសហគមន៍ជាតិវិញ៕
ចែករំលែកព័តមាននេះ