រាជធានីភ្នំពេញ ៖ មឿន សុខហ៊ុច មកពីក្លិបពុទ្ធសិរីវង្សព្រែកតាទែន និងធី តុងហ៊ី មកពីក្លិបសាលវ័ន្តកីឡា នឹងជួបប្រកួតជាមួយកីឡាករថៃក្នុងវគ្គសន្សំពិន្ទុដណ្ដើមខ្សែក្រវាត់គោជល់ក្នុងប្រភេទទម្ងន់៦៥គីឡូក្រាមមុនគេ
រាជធានីភ្នំពេញ ៖ មឿន សុខហ៊ុច មកពីក្លិបពុទ្ធសិរីវង្សព្រែកតាទែន និងធី តុងហ៊ី មកពីក្លិបសាលវ័ន្តកីឡា នឹងជួបប្រកួតជាមួយកីឡាករថៃក្នុងវគ្គសន្សំពិន្ទុដណ្ដើមខ្សែក្រវាត់គោជល់ក្នុងប្រភេទទម្ងន់៦៥គីឡូក្រាមមុនគេ នៅលើសង្វៀនទូរទស្សន៍ CNC ថ្ងៃសៅរ៍ ទី២៤ កញ្ញា ស្អែកនេះ។
មឿន សុខហ៊ុច ត្រូវជួបប្រកួតជាមួយកីឡាករថៃឈ្មោះ នឹងត្រាក់កាន រីឯធី តុងហ៊ី ជួបប្រកួតជាមួយកីឡាករថៃឈ្មោះ ចមភព ស.វីរវ៉ាន ។ កីឡាករថៃទាំង២រូបនេះមិនធ្លាប់មកប្រកួតនៅស្រុកខ្មែរពីមុនមកទេប៉ុន្តែបើពិនិត្យទៅលើប្រវត្តិប្រកួតមិនអន់ជាងកីឡាករកម្ពុជាប៉ុន្មានឡើយ។
មឿន សុខហ៊ុច ធ្លាប់ប្រកួតបាន៩៤ដង ឈ្នះ៦៧ដង ចាញ់២២ដង ស្មើ៥ដង និងផ្ដួលគូប្រកួតឱ្យសន្លប់បាន១៣ដង ខណៈកីឡាករថៃនឹងត្រាក់កាន ធ្លាប់ប្រកួតបាន៨៥ដង ឈ្នះ៧៣ដង ចាញ់១០ដង ស្មើ២ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន១៥ដង។ ដូច្នេះបើប្រៀបធៀបទៅលើប្រវត្តិប្រកួតរវាងគូនេះអាចស៊ីសងគ្នាបាន គ្រាន់តែមិនដឹងថា សំណាងឈ្នះរអិលធ្លាក់ទៅក្នុងកណ្ដាប់ដៃអ្នកណា ។
ធី តុងហ៊ី ធ្លាប់ប្រកួតបាន១១៤ដង ឈ្នះ៨៦ដង ចាញ់២៦ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៣៣ដង ខណៈកីឡាករថៃចមភព ស.វីរវ៉ាន ធ្លាប់ប្រកួតបាន៩៥ដង ឈ្នះ៨០ដង ចាញ់១០ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន១៥ដង ។ យោងតាមប្រវត្តិកីឡាករកម្ពុជាមានប្រៀបជាង ប៉ុន្តែគេមិនអាចមើលស្រាលលើកីឡាករថៃរូបនេះបានទេ ព្រោះកីឡាករទាំង២មិនធ្លាប់ជួបគ្នាពីមុនមក ដូច្នេះមិនទាន់ដឹងថាអ្នកណាខ្លាំងជាងអ្នកណាឡើយ។
ចំណែកគូប្រកួតមិត្តភាពធម្មតារវាងកីឡាករកម្ពុជា និងកម្ពុជាវិញមាន កីឡាករ ខាំ ខ្លានាង មកពីក្លិបរ៉ាហាប់ស្វាយប៉ាក ជួបប្រកួតជាមួយកីឡាករ ថាន រ៉ាឌី មកពីក្លិបតាព្រហ្មមានជ័យ ។ កីឡាករ ទេស ជីវ៉ា មកពីក្លិបកងពលតូចលេខ៧០ ប្រកួតជាមួយកីឡាករ សេក គឹមរួន មកពីក្លិបអង្គរមានជ័យខេត្តសៀមរាប។
ដោយឡែកសមាសភាពគូប្រកួតប្រដាល់នៅថ្ងៃអាទិត្យលើសង្វៀនដដែលមានកីឡាករ ឡុង សុធា មកពីក្លិបខ្លារខិនមានរិទ្ធ ប្រកួតជាមួយកីឡាករ សិទ្ធ រ៉ាវី មកពីក្លិបសាមគ្គីកូនខ្មែរ ។ កីឡាករ លីន កុសល មកពីក្លិបបុរីរាជសីហ៍មានរិទ្ធ ប្រកួតជាមួយកីឡាករ សាន ហាក់ឡាយ មកពីក្លិបសុភានូមានជ័យ ។ កីឡាករ លី ហៀងមកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ វណ្ឌី រង្សី មកពីក្លិបកងទ័ពជើងទឹក ។ កីឡាករ ឡាញ់ ផល្លា មកពីក្លិបអេភូថងកីឡា ប្រកួតជាមួយកីឡាករ ឈិន ធារ៉ា មកពីក្លិបកងពលតូចអន្តរាគមន៍លេខ៨ភ្នំទ្រព្យ ។ កីឡាករ សោម វិឆ័យ មកពីក្លិបសាលវ័ន្តកីឡា ប្រកួតជាមួយកីឡាករ លាស់ យីន មកពីក្លិបតាព្រហ្មមានជ័យ និងគូចុងក្រោយកីឡាករ សំអាត រស់ជាតិមកពីក្លិបកុលបុត្រគុនខ្មែរ ប្រកួតជាមួយកីឡាករ ជា ប្រុសល័ក្ខ មកពីក្លិបឃ្លាំងមឿងកីឡា៕
ចែករំលែកព័តមាននេះ