សម្ភារៈចាស់ៗគរទុកចោលនៅក្បែរជញ្ជាំងត្រូវបានអគ្គិភ័យឆាបឆេះហុយផ្សែងឡើងខ្មួលខ្មាញ់ បង្កអោយមានការភ្ញាក់ផ្អើលដល់រថយន្តពន្លត់អគ្គីភ័យចំនួន២គ្រឿងទៅអន្តរាគមន៍បា.ញ់ទឹកពន្លត់ ខ្លាចភ្លើងឆេះរាលដាល
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា សម្ភារៈចាស់ៗគរទុកចោលនៅក្បែរជញ្ជាំងត្រូវបានអគ្គិភ័យឆាបឆេះហុយផ្សែងឡើងខ្មួលខ្មាញ់ បង្កអោយមានការភ្ញាក់ផ្អើលដល់រថយន្តពន្លត់អគ្គីភ័យចំនួន២គ្រឿងទៅអន្តរាគមន៍បាញ់ទឹកពន្លត់ ខ្លាចភ្លើងឆេះរាលដាលកាន់តែខ្លួន។ ទោះបីជាយ៉ាង អណ្តាតភ្លើងពុំបានបណ្តាលអោយឆេះរាលដាលឡើយ គ្រាន់តែបំផ្លាញរបស់របរចាស់ៗ និងខ្សែភ្លើងមួយចំនួនតែប៉ុណ្ណោះ។
សេចក្តីរាយការណ៍បន្តថា ហេតុការណ៍នេះបង្កអោយមានការភ្ញាក់ផ្អើលខាងលើនេះបានកើតឡើងកាលពីវេលាម៉ោងប្រមាណ១០និង៣០នាទីព្រឹក ថ្ងៃទី១១ ខែមេសា ឆ្នាំ២០២២ ស្ថិតនៅចំណុចអគារ «ហូមវែរ» ឃ្លាំងផ្គត់ផ្គង់សម្ភារៈសំណង់គ្រប់ប្រភេទ ស្ថិតនៅផ្ទះលេខ២៣១ ផ្លូវ៥៩៨ ក្នុងភូមិទំនប់១ សង្កាត់ភ្នំពេញថ្មី ខណ្ឌសែនសុខ រាជ ធានីភ្នំពេញ។
តាមប្រភពព័ត៌មានបានអោយដឹងថា នៅមុនពេលកើតហេតុ គេបានឃើញអណ្តាតភ្លើងឆាបឆេះគំនរសម្ភារៈដែលទុកចោលហុយផ្សែងឡើងខ្មួលខ្មាញ់ បង្កឱ្យមានការភ្ញាក់ផ្អើល និងភ័យស្លន់ស្លោ ហើយនាំគ្នាយកបំពង់ពន្លត់អគ្គិភ័យទៅអន្តរាគមន៍ជួយបាញ់ពន្លត់។ ភ្លាមៗនោះ រថយន្តពន្លត់អគ្គិភ័យចំនួន២គ្រឿងបានទៅអន្តរាគមន៍បាញ់ទឹកពន្លត់ ទើបភ្លើងរលត់ទៅវិញ។
តាមនគរបាលការិយាល័យបង្ការពន្លត់អគ្គីភ័យ និងសង្គ្រោះ នៃស្នងការនគរបាលរាជធានីភ្នំពេញ បានអោយដឹងថា មូលហេតុដែលកើតមានអគ្គិភ័យនេះ បណ្តាលមកពីកម្មករឃ្លាំង បោះកន្ទុយបារីចោលទៅលើក្រដាសឡាំង ដែលជាហេតុបង្កអោយក្លាយជាអគ្គិភ័យតែម្តង។
នគរបាលបានអោយដឹងទៀតថា សម្ភារៈចាស់ៗ រួមមាន កង់រថយន្ត, ក្រដាសឡាំង, ខ្សែភ្លើង និងសម្ភារៈមួយចំនួនទៀត ត្រូវភ្លើងឆាបឆេះរងការខូចខាត តែពុំបណ្តាលអោយឆេះរាលដាលទៅដល់ឃ្លាំងសម្ភារៈ និងគ្រឿងសំណង់ឡើយ៕
ចែករំលែកព័តមាននេះ