សារព័ត៌មានបរទេសកាលពីថ្ងៃទី២២ កញ្ញា ២០១៦ ផ្សាយថា គូស្នេហ៍ដ៏ល្បីនាងអេនចេលីណា ជោលី អាយុ៤១ឆ្នាំ និងលោកប្រេត ភីត អាយុ៥២ឆ្នាំ ដែលប្រកាសលែងលះគ្នា ក្រោយពេលពួកគេបានរួមររស់ជាមួយគ្នាតាំងពីឆ្នាំ២០០៥មកនោះ នាំឱ្យសារមន្ទីររូបក្រមួននៅក្រុងឡុងដ៍សម្រេចញែករូបពួកគេទាំង២នាក់ចេញពីគ្នា ។
សារមន្ទីរប្រកាសថា បានអនុវត្តភ្លាមៗលើរូបក្រមួនរបស់នាងអេនចេលីណា ជោលី និងប្រេត ភីត ក្រោយពីព័ត៌មានចែកផ្លូវគ្នារបស់ពួកគេលេចឮ ដោយបំបែកឱ្យនៅដាច់ដោយឡែកពីគ្នា។ រូបក្រមួនរបស់នាងអេនចេលីណា ជោលី ដាក់នៅក្បែររូបរបស់នាងNicole Kidman ចំណែករូបក្រមួនរបស់ប្រេត ភីត ដាក់នៅក្បែរលោក Morgan Freeman ។
រូបក្រមួនរបស់នាងអេនចេលីណា ជោលី និងប្រេត ភីត បានដាក់តាំងបង្ហាញជាគូនឹងគ្នានៅក្នុងសារមន្ទីររូបក្រមួន «Madame Tussauds» នៅក្រុងឡុងដ៍ ចក្រភពអង់គ្លេស តាំងពីឆ្នាំ២០១៣មក។ ឥឡូវអ្នកទាំង២បែកផ្លូវគ្នា សារមន្ទីរញែករូបសំណាកពួកគេចេញពីគ្នាដែរ ៕
ចែករំលែកព័តមាននេះ