តាមការស្រាវជ្រាវធ្វើឡើងដោយក្រុមអ្នកវិទ្យាសាស្ត្រសហរដ្ឋអាមេរិកបានរកឃើញថា ការបញ្ចុះទម្ងន់ខ្លួនមិនត្រឹមតែផ្តល់ផលល្អដល់សុខភាពជាទូទៅប៉ុណ្ណោះទេ ប៉ុន្តែថែមទាំងអាចជួយកែលំអគុណភាពដំណេកក្នុងពេលរាត្រីនិងជួយ ឱ្យអារម្មណ៍ស្រស់ស្រាយផងដែរ ។
ការពិសោធលើបុរស-ស្ត្រីធាត់ៗចំនួន៣៩០នាក់រយៈពេលជាង២ឆ្នាំបានបង្ហាញថា អ្នកដែលបញ្ចុះទម្ងន់យ៉ាងហោចណាស់៥ភាគរយនៃទម្ងន់ខ្លួនសរុបគឺដេកលក់បានស្កប់ស្កល់និងយូរជាងមុនប្រហែលជា២០នាទីក្រោយរយៈពេល៦ខែនៃការបញ្ចុះទម្ងន់ ។ ចំណែកសុខភាពផ្លូវចិត្តវិញឃើញថា មានភាពល្អប្រសើរច្រើនផងដែរ ។
Nasreen Alfaris អ្នកដឹកនាំការស្រាវជ្រាវមកពីសាកលវិទ្យាល័យផឹនស៊ីលវេនៀ សហរដ្ឋអាអាមេរិកបានថ្លែងថា៖ «ការសិក្សាលើកនេះគឺបានបញ្ជាក់ឱ្យកាន់តែច្បាស់បន្ថែមទៀតលើលទ្ធផលនៃការសិក្សាមុនៗដែលបានរកឃើញថា បញ្ចុះទម្ងន់ជាប់ពាក់ព័ន្ធនឹងការបង្កើនរយៈពេលដំណេកក្នុងពេលយប់» ។
សាស្ត្រាចារ្យរូបនេះបានបន្ថែមថា៖ «ទោះជាយ៉ាងណា ការសិក្សាបន្ថែមទៀតចាំបាច់ត្រូវធ្វើដើម្បីពិនិត្យមើលពីផលប៉ះពាល់ប្រកបដោយសក្តានុពលនៃការឡើងទម្ងន់ជាថ្មីទៅលើប្រសិទ្ធភាពនៃការបញ្ចុះទម្ងន់ និងគុណភាពរបស់ដំណេក» ៕
ចែករំលែកព័តមាននេះ