យោងតាមតុល្យការថ្មីចេញផ្សាយនាថ្ងៃទី២២ កញ្ញា ដោយអាជ្ញាធរមូលដ្ឋានថា ទឹកជំនន់ និងការបាក់ដីមកពីភ្លៀងធ្លាក់ខ្លាំងនៅកោះជ្វា ឥណ្ឌូណេស៊ី បណ្តាលឱ្យមនុស្សស្លាប់យ៉ាងតិច២៦នាក់ ហើយមនុស្ស១៩នាក់ទៀតបាត់ខ្លួន ។
ទីភ្នាក់ងារជាតិគ្រប់គ្រងគ្រោះមហន្តរាយគូសបញ្ជាក់ថា ជំនួយចាប់ផ្តើមទៅដល់ GARUT តំបន់ភាគខាងលិចកោះជ្វា ដែលរងការប៉ះពាល់ខ្លាំងជាងគេ ដោយសារទឹកជំនន់ និងការបាក់ដីកាលពីថ្ងៃទី២១ កញ្ញា រួចមនុស្ស២៣នាក់ស្លាប់ និង១៨នាក់បាត់ខ្លួននៅតំបន់នោះ ។
ក្រោយទឹកស្រកបង្ហាញពីទំហំធំធេងនៃការខូចខាតជាមួយផ្ទះទាំងឡាយរងការបំផ្លាញ បណ្តារថយន្តត្រូវក្រឡាប់ និងវិថីទាំងឡាយគ្របដណ្តប់ដោយភក់ និងបំណែកផ្សេងៗ។ ក្នុងចំណោមជនរងគ្រោះមានកុមារយ៉ាងតិច១០នាក់អាយុក្រោម១០ឆ្នាំ ។
ក្នុងតំបន់មួយទៀតនាភាគខាងលិចកោះជ្វាការបាក់ដីមួយកើតមាននាថ្ងៃទី២១ កញ្ញា បណ្តាលឱ្យមនុស្សស្លាប់៣នាក់នៅ SUMEDANG រួចមនុស្សម្នាក់ទៀតបាត់ខ្លួន ។
ទីភ្នាក់ងារជាតិគ្រប់គ្រងគ្រោះមហន្តរាយណែនាំដល់ប្រជាជនឱ្យមានការប្រុងប្រយ័ត្ននារដូវនេះមកពីបាតុភូតបរិយាកាស LA NINA ជាប្រភពនៃភ្លៀងធ្លាក់ខុសទម្លាប់នាដំណាក់កាលនោះនៃឆ្នាំនៅឥណ្ឌូណេស៊ី ។ កាលពីខែមិថុនាកន្លងទៅ មនុស្សជិត៥០នាក់ស្លាប់ ក្រោយភ្លៀងធ្លាក់ខ្លាំង និងការបាក់ដីនៅភាគកណ្តាលកោះជ្វា ៕
ចែករំលែកព័តមាននេះ