រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំនៅក្នុងសមរភូមិអ្នកប្រយុទ្ធភេសជ្ជៈគោជល់រវាងកីឡាករកម្ពុជា និងកីឡាករថៃក្នុងប្រភេទទម្ងន់៧៥គីឡូក្រាមនៅលើសង្វៀនទូរទស្សន៍ PNN នឹងចាប់ផ្តើមជាផ្លូវការនៅថ្ងៃអាទិត្យទី២៥ កញ្ញា សប្តាហ៍នេះហើយ ។មាស ភារម្យ មកពីក្លិបកងពលតូចលេខ៣១ការពារដែនសមុទ្រ និងសុខ ទូច មកពីក្លិបកងទ័ពជើងទឹក នឹងឡើងសង្វៀនប្រកួតជាមួយកីឡាករថៃដែលមានប្រវត្តិប្រកួតមិនធម្មតាមុនគេ ។
មាស ភារម្យ ដែលធ្លាប់ប្រកួតបាន៩៤ដង ឈ្នះ៨០ដង ចាញ់១១ដង ស្មើ៣ដង នឹងជួបប្រកួតជាមួយកីឡាករថៃឈ្មោះឌីស៊ែលលេក ដែលធ្លាប់ប្រកួតបាន១៥៣ដង ឈ្នះ១២១ដង ចាញ់៣២ដងនោះ មិនដឹងថាអាចទៅរួចឬអត់នោះទេ ម្យ៉ាងកីឡាករថៃរូបនេះជាម្ចាស់ខ្សែក្រវាត់ដល់ទៅ៣ស្ថាប័នទៀតផង ។
ចំណែក សុខ ទូច ដែលធ្លាប់ប្រកួតបាន៧២ដង ឈ្នះ៥១ដង ចាញ់១៨ដង ស្មើ៣ដង នឹងជួបប្រកួតជាមួយកីឡាករថៃឈ្មោះកាំឡាយផេក ដែលធ្លាប់ប្រកួតបាន១០៣ដង ឈ្នះ៨១ដង ចាញ់២០ដង និងស្មើ២ដង ។ ទោះបីកីឡាករថៃមានប្រវត្តិប្រកួតច្រើនជាងក៏មិនប្រាកដថា អាចយកឈ្នះ សុខ ទូច បានដោយងាយស្រួលនោះដែរ ព្រោះពួកគេមិនធ្លាប់ជួបគ្នាពីមុនមកទេ។ ដូច្នេះបើចង់ដឹងច្បាស់មានតែរង់ចាំមើលការប្រកួតជាក់ស្ដែងប៉ុណ្ណោះទើបដឹងថាអ្នកណាខ្លាំងជាងអ្នកណា។
ដោយឡែក ការប្រកួតជាលក្ខណៈម៉ារ៉ាតុននៅលើសង្វៀនដដែលកីឡាករ អៀម សាវុធ មកពីក្លិបបញ្ជាការដ្ឋានកងទ័ពជើងទឹក ប្រកួតជាមួយកីឡាករវ័ន កក្កដា មកពីក្លិបភិរម្យកូនខ្មែរ ។ កីឡាករ ឈុត សេរីវ៉ាន់ថន មកពីក្លិបរាហូ ខេត្តបាត់ដំបង ប្រកួតជាមួយកីឡាករ ម៉ន ខួច មកពីក្លិបការិយាល័យទី៥កងទ័ពជើងគោក៕
ចែករំលែកព័តមាននេះ