ប្រទេសថៃ ៖ ក្រុមប្រឹក្សាទេសចរណ៍បាននិយាយកាលពីថ្ងៃចន្ទថា ការមកដល់នៃភ្ញៀវទេសចរ ត្រូវបានគិតទុកមុនថា នឹងកើនឡើងប្រមាណ១៧,៨%ក្នុងត្រីមាសទី៤ឆ្នាំ២០១៦ បើធៀបនឹងរយៈពេលដូចគ្នានាឆ្នាំមុន ។ ការកើនឡើងនេះ មួយផ្នែកធំមកពីកំណើនភ្ញៀវទេសចរចិន ។
វិស័យទេសចរណ៍ត្រូវបានរាប់បញ្ចូល១០% នៃ GDP របស់ប្រទេសថៃ ហើយបានក្លាយជាវិស័យដ៏កម្រ និងសំខាន់សម្រាប់ប្រទេសដែលមានសេដ្ឋកិច្ចលេខ២ ក្នុងអាស៊ីអាគ្នេយ៍មួយនេះ ខណៈមានការអន់ថយនៃផ្នែកនាំចេញ និងតម្រូវការក្នុងស្រុក ។ ការព្យាករណ៍នេះ ស្របពេលប្រទេសថៃគិតថា នឹងស្វាគមន៍ភ្ញៀវប្រមាណ៣៣លាននាក់ក្នុងឆ្នាំនេះ ។
ភ្ញៀវទេសចរចិនពិតជាមានចំណាប់អារម្មណ៍លើប្រទេសថៃណាស់ ហើយមានភ្ញៀវជាច្រើនបានជន់ជោរមកកាន់ប្រទេសនេះកាលពីឆ្នាំមុន។ មួយវិញទៀត ការបំផ្ទុះគ្រាប់បែកជាច្រើនករណីក្នុងប្រទេសថៃនាប៉ុន្មានខែកន្លងមក ដូចជាគ្មានការប៉ះពាល់ខ្លាំងក្លាឡើយលើវិស័យទេសចរណ៍ ។
ប៉ុន្តែកាលពីសប្តាហ៍មុន ធនាគារជាតិរបស់ប្រទេសថៃ បានកាត់បន្ថយចំនួនភ្ញៀវទេសចរ ដែលបានព្យាករណ៍ប្រមាណ៤០ម៉ឺននាក់ មកត្រឹម៣៣,៦លាននាក់ក្នុងឆ្នាំនេះ ដោយសារមានការបំផ្ទុះគ្រាប់បែក និងការលុបបំបាត់កម្មវិធីដំណើរកម្សាន្តតម្លៃថោកហួសប្រមាណ ។
ក្នុងត្រីមាសទី៤ឆ្នាំនេះ គឺជារដូវកាលដ៏ពេញនិយមសម្រាប់ភ្ញៀវទេសចរជាច្រើនមកលេងកម្សាន្តនៅឆ្នេរ បា និងទីវត្តអារាមនានារបស់ប្រទេសថៃ ។
នាយកក្រុមប្រឹក្សាខាងលើ លោក Ittirit Kinglek ថ្លែងថា ៖ « នៅត្រីមាសទី៤ គឺជារដូវកាលដ៏ពេញនិយមមួយ ។ វាជារដូវកាលដែលភ្ញៀវទេសចរធ្វើដំណើរមកច្រើនជាងគេ គឺពីប្រទេសចិន អឺរ៉ុប និងពីតំបន់ផ្សេងៗទៀត ។ ពួកយើងគិតថា នឹងមានភ្ញៀវទេសចរច្រើនជាងឆ្នាំមុន ជាពិសេស ភ្ញៀវជនជាតិចិន » ។
ក្រុមប្រឹក្សាខាងលើព្យាករណ៍ថា យ៉ាងតិចក៏មានជនជាតិចិនប្រមាណ៦០ម៉ឺននាក់ដែរនឹងមកកាន់ប្រទេសថៃ ក្នុងសប្តាហ៍បុណ្យមាសខាងមុខ ។
គួរបញ្ជាក់ថា ប្រទេសថៃបានទាក់ទាញជនជាតិចិនប្រមាណ៧,៩៣លាននាក់កាលពីឆ្នាំមុន។ ក្នុងឆ្នាំនេះ ក្រុមប្រឹក្សាគិតថា នឹងមានជនជាតិចិនឡើងដល់១០លាននាក់ឯណោះ ៕
ចែករំលែកព័តមាននេះ