បង្ក្រាបបទល្មើសព្រៃឈើ ចាប់បានទាំងបទល្មើសវត្ថុបុរាណ
ខេត្តសៀមរាប ៖ ចម្លាក់ថ្មបុរាណ២ដុំមានរូបរាងជាកូនប្រាសាទចម្លងធ្វើពីថ្មភក់ត្រូវបានរដ្ឋបាលព្រៃឈើប្រចាំស្រុកបន្ទាយស្រីរឹបអូសបានពីជនល្មើសនៅក្នុងករណីចុះបង្ក្រាប …
ខេត្តសៀមរាប ៖ ចម្លាក់ថ្មបុរាណ២ដុំមានរូបរាងជាកូនប្រាសាទចម្លងធ្វើពីថ្មភក់ត្រូវបានរដ្ឋបាលព្រៃឈើប្រចាំស្រុកបន្ទាយស្រីរឹបអូសបានពីជនល្មើសនៅក្នុងករណីចុះបង្ក្រាប …
ខេត្តសៀមរាប ៖ ចម្លាក់ថ្មបុរាណ២ដុំមានរូបរាងជាកូនប្រាសាទចម្លងធ្វើពីថ្មភក់ត្រូវបានរដ្ឋបាលព្រៃឈើប្រចាំស្រុកបន្ទាយស្រីរឹបអូសបានពីជនល្មើសនៅក្នុងករណីចុះបង្ក្រាបបទល្មើសព្រៃឈើនៅចំណុចភូមិត្បែងលិច ឃុំត្បែង ស្រុកបន្ទាយស្រី ខេត្តសៀមរាប កាលពីយប់ថ្ងៃទី២០ ខែកញ្ញា ឆ្នាំ២០១៦ ។
តាមការសន្និដ្ឋានបឋមនៃបុរាណវិទូអាជ្ញាធរជាតិអប្សរា បានឲ្យដឹងថា ចម្លាក់នេះអាចស្ថិតនៅក្នុងសតវត្សទី១០ តែអ្នកជំនាញមិនទាន់អាចកំណត់អត្តសញ្ញាណបានថា ចម្លាក់នេះត្រូវជនល្មើសនាំចេញពីតំបន់ណានៅឡើយទេ ។ អ្នកជំនាញនឹងសិក្សាលម្អិតអំពីចម្លាក់នេះនៅពេលក្រោយ នៅពេលដែលនីតិវិធីផ្លូវច្បាប់បានបញ្ចប់ជាស្ថាពរ ។
ប្រតិបត្តិការនេះដឹកនាំដោយលោក ម៉ុង ប៊ុនលីម នាយផ្នែករដ្ឋបាលព្រៃឈើប្រចាំស្រុកបន្ទាយស្រី ដោយធ្វើការឃាត់រថយន្តម៉ាកកាមរី ស៊េរីឆ្នាំ១៩៩៣ ពណ៌ស្លែ ស្លាកលេខភ្នំពេញ 2A 8316 ។ ជាមួយនឹងការរកឃើញបទល្មើសព្រៃឈើ សមត្ថកិច្ចក៏បានរកឃើញ ថ្មចម្លាក់ជាកូនប្រាសាទចម្លង ដែលជាវត្ថុបុរាណដ៏មានតម្លៃរបស់ជាតិផងដែរ ។ ថ្មចម្លាក់ប្រាសាទចម្លងទាំង២ដុំ រាងសាជី មានទំហំ ៣៨x៣៨x៩០សង្ទីម៉ែត្រ និង ៤៥x៤៥x៩០សង្ទីម៉ែត្រ ។
តាមមន្ត្រីរដ្ឋបាលព្រៃឈើបញ្ជាក់ថា ប្រតិបត្តិការនេះមិនទាន់ចាប់បានជនល្មើសនៅឡើយទេ ដោយជនល្មើសបានបោះបង់ឡានចោល ហើយរត់គេចខ្លួនបាត់ ។
បន្ទាប់ពីទទួលបានការជូនដំណឹងពីរដ្ឋបាលព្រៃឈើប្រចាំស្រុកបន្ទាយស្រី នៅរសៀលថ្ងៃទី២១ ខែកញ្ញា ឆ្នាំ២០១៦ អ្នកជំនាញនៃអាជ្ញាធរជាតិអប្សរា រួមជាមួយនឹងនគរបាលការពារបេតិកភណ្ឌ បានចុះទៅពិនិត្យដល់ទីស្នាក់ការរដ្ឋបាលព្រៃឈើស្រុកបន្ទាយស្រី ដោយធ្វើកំណត់ហេតុច្បាស់លាស់ និងបញ្ជូនវត្ថុតាងទាំងអស់ រួមទាំងចម្លាក់ថ្មបុរាណ២ដុំទៅរក្សាទុកបណ្តោះអាសន្ននៅអធិការដ្ឋាននគរបាលស្រុកបន្ទាយស្រី ដើម្បីធ្វើជាវត្ថុតាងបន្តនីតិវិធីផ្លូវច្បាប់ ។ ចម្លាក់ថ្មបុរាណទាំង២ដុំនេះនឹងត្រូវប្រគល់ជូនអាជ្ញាធរជាតិអប្សរាដើម្បីរក្សាទុក បន្ទាប់ពីនីតិវិធីច្បាប់ត្រូវបានបញ្ចប់ ៕
ចែករំលែកព័តមាននេះ