រាជធានីភ្នំពេញ ៖ ព្រំ វី និងចាន់ សំអាតមកពីក្លិបកងពលតូចអន្តរាគមន៍លេខ៨ភ្នំទ្រព្យ ត្រូវបានគេរៀបចំឱ្យជួបប្រកួតជាមួយកីឡាករថៃលើសង្វៀនទូរទស្សន៍ CTN នៅថ្ងៃអាទិត្យ ទី២៤កញ្ញា ខាងមុខនេះ
រាជធានីភ្នំពេញ ៖ ព្រំ វី និងចាន់ សំអាតមកពីក្លិបកងពលតូចអន្តរាគមន៍លេខ៨ភ្នំទ្រព្យ ត្រូវបានគេរៀបចំឱ្យជួបប្រកួតជាមួយកីឡាករថៃលើសង្វៀនទូរទស្សន៍ CTN នៅថ្ងៃអាទិត្យ ទី២៤កញ្ញា ខាងមុខនេះ ។ ព្រំ វី ត្រូវជួបប្រកួតជាមួយកីឡាករថៃឈ្មោះ Loukyort Sit Sampiyak ក្នុងប្រភេទទម្ងន់៥៧គីឡូក្រាម ចំណែក ចាន់ សំអាត ជួបប្រកួតជាមួយកីឡាករថៃឈ្មោះ TimChhai Louk Phit Noy ក្នុងប្រភេទទម្ងន់៦១គីឡូក្រាម ។ អ្នកនិយមទស្សនាកីឡាប្រដាល់ភាគច្រើនកំពុងរង់ចាំមើលថាតើកីឡាករកម្ពុជាទាំងពីរមួយណាសម្រេចគោលដៅ ខណៈកីឡាករថៃដែលពួកគេត្រូវជួបនាពេលនេះហាក់ដូចជាមានសមត្ថភាពពិបាកផ្ដួលអ៊ីចឹងនោះ។
កីឡាករថៃទាំង២រូបនេះសុទ្ធតែជាជើងខ្លាំងនិងធ្លាប់មកប្រកួតនៅស្រុកខ្មែរជាច្រើនលើករួចមកហើយ ជាពិសេសកីឡាករ Loukyort Sit Sampiyak តែម្ដងដែលធ្លាប់ធ្វើឱ្យអ្នកប្រដាល់ជើងខ្លាំងកម្ពុជាចាញ់នៅក្រោមកណ្ដាប់ដៃរបស់គេមិនតិចនាក់ទេ ។ សម្រាប់ការមកជួបជាមួយ ព្រំ វី លើកនេះមិនទាន់ដឹងថាយា៉ងណានោះទេ ទោះបី ព្រំ វី មានប្រវត្តិប្រកួតតិចជាងមែន ប៉ុន្តែគេមានប្រៀបខាងកម្ពស់ ។ ព្រំ វី ធ្លាប់ប្រកួតបាន៦៦ដង ឈ្នះ៤៣ដង ចាញ់២០ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់នៅលើ សង្វៀនបាន១១ដង ។ រីឯកីឡាករថៃឈ្មោះ Loukyort Sit Sampiyak វិញធ្លាប់ប្រកួតបាន៨៤ដង ឈ្នះ៦៦ដង ចាញ់១៤ដង និងស្មើ៤ដង ។ ចាំមើល ព្រំ វី និងកីឡាករថៃរូបនេះមួយណាសម្រេចគោលដៅ ។
ចាន់ សំអាត ដែលធ្លាប់ប្រកួតបាន៤០ដង ឈ្នះ២៥ដង ចាញ់១៤ដង ស្មើ១ដង និងផ្តួលគូប្រកួតឱ្យសន្លប់នៅលើសង្វៀនបាន១៥ដង ជួបកីឡាករថៃឈ្មោះ TimChhai Louk Phit Noy ដែលមានប្រវត្តិប្រកួត៧៤ដង ឈ្នះ៥០ដង ចាញ់១៩ដង និងស្មើ៥ដងនោះ មិនទាន់ដឹងថាអ្នកណាខ្លាំងជាងអ្នកណាឡើយ ដោយសារពួកគេមិនធ្លាប់ជួបគ្នាពីមុនមក ។ ដូច្នេះមានតែរង់ចាំមើលការប្រកួតជាក់ស្តែងប៉ុណ្ណោះ នរណាខ្លាំងជាងនរណាគង់តែដឹងទេ ។
ចំណែកគូប្រកួតមិត្តភាពរវាងកីឡាករកម្ពុជា និងកម្ពុជាវិញនោះមាន កីឡាករ លី សារ៉ន មកពីក្លិបសុភានូមានជ័យ ប្រកួតជាមួយកីឡាករ ខុន លីហ៊ុយ មកពីក្លិបកងពលតូចអន្តរាគមន៍លេខ៨ភ្នំទ្រព្យ ។ កីឡាករ ភួង ពិសិដ្ឋ មកពីក្លិបតាឡីដំរីមានរិទ្ធ ប្រកួតជាមួយកីឡាករ សាង សី មកពីក្លិបឃ្លាំងមឿងកីឡា និងកីឡាករ ឆោម ប៊ុនឡុង មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ ជឹម ចិត្រា មកពីក្លិបខ្លារខិនមានរិទ្ធ ៕
ចែករំលែកព័តមាននេះ