មន្ត្រីសុខាភិបាលខេត្តពង្រាយកម្លាំងដើម្បីទប់ស្កាត់ជំងឺហ្ស៊ីកា
ខេត្តត្បូងឃ្មុំ ៖ ស្ថិតនៅក្នុងក្តីកង្វល់ខ្លាចមានជំងឺប្រភេទថ្មីម្យ៉ាងទៀតហៅហ្ស៊ីកា (ZIKA) រីករាលដាលពីប្រទេសជិតខាងចូលមកកម្ពុជា នៅច្រកអន្តរជាតិត្រពាំងផ្លុង …
ខេត្តត្បូងឃ្មុំ ៖ ស្ថិតនៅក្នុងក្តីកង្វល់ខ្លាចមានជំងឺប្រភេទថ្មីម្យ៉ាងទៀតហៅហ្ស៊ីកា (ZIKA) រីករាលដាលពីប្រទេសជិតខាងចូលមកកម្ពុជា នៅច្រកអន្តរជាតិត្រពាំងផ្លុង ឃុំត្រពាំងផ្លុង ស្រុកពញាក្រែក មន្ត្រីរបស់មន្ទីរសុខាភិបាលខេត្តបានដាក់ប្រចាំការជារៀងរាល់ថ្ងៃ ដើម្បីពិនិត្យមើលភ្ញៀវទេចរណ៍ជាតិ-អន្តរជាតិដែលចេញចូល ក្រែងមានឆ្លងនូវជំងឺនេះ តែរហូតមកដល់ព្រឹកថ្ងៃទី២១ ខែកញ្ញា ឆ្នាំ២០១៦ មន្ត្រីជំនាញនៅមិនទាន់រកឃើញមានអ្នកណាម្នាក់បានឆ្លងនៅឡើយទេ ។
លោក ហ៊ាន កាំង មន្ត្រីចតាឡីស័កប្រចាំនៅច្រកត្រពាំងផ្លុង បានប្រាប់ឲ្យដឹងថា ដោយទទួលបានការណែនាំពីសំណាក់លោកវេជ្ជបណ្ឌិត កែវ វណ្ណៈ ប្រធានមន្ទីរសុខាភិបាលខេត្ត បានចាត់ឲ្យរូបលោកដឹកនាំកម្លាំងជាច្រើននាក់ចុះមកប្រចាំការនៅច្រកនេះជាច្រើនថ្ងៃមកហើយ ដើម្បីតាមដានពិនិត្យមើលភ្ញៀវដែលបានចេញចូលឆ្លងកាត់ទៅវិញទៅមក ក្រែងមានអាការៈក្តៅខ្លួនខុសពីធម្មតាដោយមានផ្ទុកនូវជំងឺហ្ស៊ីកាដែលមានភាពសាហាវ ប្រសិនបើព្យាបាលមិនបានទាន់ពេលវេលាទេនោះ អាចត្រូវស្លាប់បាត់បង់ជីវិត ។
លោក ហ៊ាន កាំង ប្រាប់បន្តថា រាល់ថ្ងៃមានរថយន្តរបស់ក្រុមហ៊ុននៅប្រទេសកម្ពុជាបានដឹកភ្ញៀវចេញចូលតាមច្រកត្រពាំងផ្លុង តាមការពិនិត្យមិនទាន់ឃើញមានពលរដ្ឋកម្ពុជា ឬវៀតណាមបានឆ្លងនូវជំងឺនេះនៅឡើយទេ ។ នាពេលកន្លងមកធ្លាប់បានទៅចូលរួមប្រជុំនៅប្រទេសវៀតណាម២ទៅ៣លើក ដោយមានសំណូមពរថា ប្រសិនណាបើរកឃើញមានមនុស្សដែលបានធ្វើដំណើរចេញពីប្រទេសវៀតណាមចូលមកកម្ពុជាមានផ្ទុកជំងឺហ្ស៊ីកា នឹងត្រូវបញ្ជូនត្រឡប់ទៅឲ្យភាគីវៀតណាមវិញ ដោយសារតែប្រទេសគេ មានសម្ភារទំនើបគ្រប់គ្រាន់ ហើយនៅកៀកទៀតផង ។ ជាក់ស្តែងនៅព្រឹកថ្ងៃទី២១ ខែកញ្ញា ឆ្នាំ២០១៦ មានជនបរទេស៣នាក់ បានចេញពីវៀតណាមចូលមកកម្ពុជាតាមច្រកត្រពាំងផ្លុង នៅពេលដែលយកឧបករណ៍តេស្តកំដៅពិនិត្យឃើញថា ស្ថិតក្នុងលក្ខណៈធម្មតា បានអនុញ្ញាតឲ្យបន្តដំណើតទៅមុខទៀត ជាមួយនោះបានផ្តល់ខិតប័ណ្ណដល់ជនបរទេសទាំងនោះថែមទៀតប្រសិនបើមានកំដៅឡើងខុសពីធម្មតា ត្រូវប្រញាប់ទូរស័ព្ទមកកាន់មន្ត្រីសុខាភិបាល ។
លោក ផាន់ គឹមសន ប្រធានច្រកទ្វារអន្តរជាតិត្រពាំងផ្លុង ប្រាប់ឲ្យដឹងថា ចំពោះវិធានការទប់ស្កាត់ជំងឺហ្ស៊ីកា ក្នុងនាមរូបលោកជាប្រធានច្រក ត្រូវបង្កើនការយកចិត្តទុកដាក់ក្នុងការត្រួតពិនិត្យចំពោះភ្ញៀវដែលបានធ្វើដំណើរចេញចូល ។ រាល់ថ្ងៃនេះតាមព័ត៌មានដែលបានដឹងថា ជំងឺនេះកំពុងតែមានការរីករាលដាលនៅបណ្តាប្រទេសជាច្រើនលើសកលលោក ដូច្នេះរូបលោកព្យាយាមប្រឹងប្រែងធ្វើយ៉ាងណាឲ្យមន្ត្រីប្រចាំច្រកត្រូវបង្កើនការយកចិត្តទុកដាក់ខ្ពស់ ទប់ស្កាត់ចៀសវាងកុំឲ្យឆ្លងចូលមកកម្ពុជា ។
លោកវេជ្ជបណ្ឌិត កែវ វណ្ណៈ ប្រធានមន្ទីរសុខាភិបាលខេត្ត មានប្រសាសន៍ឲ្យដឹងដែរថា ចំពោះមន្ត្រីសុខាភិបាលដែលបានដាក់ប្រចាំការនៅច្រកត្រពាំងផ្លុង មិនសូវមានភ្ញៀវចេញចូលប៉ុន្មាននោះទេ កត្តាសំខាន់ត្រូវធ្វើដូចជា ១-បាញ់ថ្នាំសម្លាប់មេរោគលើកង់រថយន្ត ២-អ្នកដំណើរឆ្លងកាត់ត្រូវស្គ្រីនកំដៅមើល ប្រសិនបើឃើញក្តៅមានផ្ទុកហ្ស៊ីកា ប្រញាប់បញ្ជូនមកកាន់មន្ទីរពេទ្យ ៣-សារអប់រំលើអ្នកដំណើរទាំងឡាយ ។ ក្នុងពេលខាងមុខ រូបលោកនឹងដាក់កម្លាំងបន្ថែមទៀតនៅតាមច្រកដា និងច្រកទន្លូង ស្រុកមេមត់ ដើម្បីទប់ស្កាត់ជំងឺនេះ ។
សូមបញ្ជាក់ថា ហ្ស៊ីកា ជាប្រភេទជំងឺឆ្លងដែលបង្កដោយពពួកវីរុស ZIKA ហើយភ្នាក់ងារចម្លងជាប្រភេទមូលខ្លា ដែលដូចគ្នាទៅនឹងជំងឹគ្រុនឈាម ។ មានការផ្ទុះឡើងនៃជំងឺនេះនៅក្នុងប្រទេសមួយចំនួននៃទ្វីអាហ្រិ្វច ទ្វីបអាមេរិក និងថ្មីៗនេះនៅក្នុងប្រទេសមួយចំនួននៃតំបន់អាស៊ី ៕
ចែករំលែកព័តមាននេះ