រោងចក្រក្ស័យធនថៅកែរត់ចោល កម្មករធ្វើបាតុកម្មបិទផ្លូវ
ខេត្តកណ្ដាល ៖ កម្មករកម្មការិនីរោងចក្រកាត់ដេរ ហ្គ្រេតអននើរ GREAT HONOUR ចំនួន៩៧០នាក់ ដែលមានទីតាំងនៅភូមិលេខ៤ ឃុំស្វាយរលំ ស្រុកស្អាង រយៈពេលពីរថ្ងៃជាប់គ្នា
ខេត្តកណ្ដាល ៖ កម្មករកម្មការិនីរោងចក្រកាត់ដេរ ហ្គ្រេតអននើរ GREAT HONOUR ចំនួន៩៧០នាក់ ដែលមានទីតាំងនៅភូមិលេខ៤ ឃុំស្វាយរលំ ស្រុកស្អាង រយៈពេលពីរថ្ងៃជាប់គ្នា
ខេត្តកណ្ដាល ៖ កម្មករកម្មការិនីរោងចក្រកាត់ដេរ ហ្គ្រេតអននើរ GREAT HONOUR ចំនួន៩៧០នាក់ ដែលមានទីតាំងនៅភូមិលេខ៤ ឃុំស្វាយរលំ ស្រុកស្អាង រយៈពេលពីរថ្ងៃជាប់គ្នា កាលពីព្រឹកថ្ងៃទី១៩ និងថ្ងៃទី២០ខែកញ្ញានេះ បាននាំគ្នាធ្វើបាតុកម្មនៅខាងមុខរោងចក្រ ដោយយកកំណាត់លូ និងគ្រែដាក់លើផ្លូវ បិទផ្លូវជាតិ លេខ២១A ទាំងស្រុង មិនអាចធ្វើដំណើរឆ្លងកាត់បាន ដើម្បីទៀមទារឱ្យថៅកែរោងចក្រ បើកប្រាក់ឈ្នួលឱ្យខ្លួន និងឱ្យអាជ្ញាធរស្ថាប័នតុលាការរកយុត្តិធម៌ឲ្យកម្មករ។
រយៈពេលពីថ្ងៃនេះកំណាត់ផ្លូវជាតិលេខ២១A ចំណុចខាងមុខរោងចក្រត្រូវបានបិទទាំងស្រុងមិនអាចធ្វើចរាចរណ៍ឆ្លងកាត់បាន។ ដោយសាតែក្រុមកម្មករ ចងតង់នៅលើផ្លូវ និងយកកំណាត់លូ គ្រែ និងម៉ូតូកង់ មកដាក់លើផ្លូវជាតិ នាំគ្នាឈរលើកបដា និងរូបថតសម្ដេចតេជោ និងសម្ដេចកិត្តិព្រឹទ្ធបណ្ឌិត ដើម្បីទាមទាររកដំណោះស្រាយតាមច្បាប់។ តំណាងកម្មករបានឱ្យដឹងថារោងចក្រនេះអត់ការងារឲ្យកម្មករធ្វើច្រើនខែមកហើយ និងមិនបើកប្រាក់ខែឱ្យកម្មករ។
ហើយជាងមួយខែកន្លងមកនេះ ថៅកែរោងចក្របានប្រកាសប្រាប់កម្មករ និងបុគ្គលិកថារោងចក្រក្ស័យធន និងប្រកាសបិទ រោងចក្រ ប៉ុន្តែមិនបានបើកប្រាក់ឈ្នួលឱ្យកម្មករ និងបុគ្គលិកទេ។ កម្មករលើកឡើងថា ពួកគាត់ធ្វើការជាកម្មករ សង្ឃឹមលើប្រាក់ខែជាង១០០ដុល្លារ សម្រាប់ចាយវាយដោះស្រាយជីវភាពប្រចាំថ្ងៃ។ បើថៅកែរោងចក្រ រត់ចោលមិនបើកប្រាក់ខែ មិនដោះស្រាយឱ្យកម្មករ តើពួកគាត់មានអ្វីសង្ឃឹមនោះ។ កម្មករបានសំណូមពរដល់អាជ្ញាធរ និងតុលាការសូមជួយដោះស្រាយឲ្យបានឆាប់ផង បើរោងចក្រនេះក្ស័យធនបិទទ្វារ សូមឱ្យថៅកែរោងចក្រទូទាត់ប្រាក់ផ្សេងៗទាំងអស់ដល់កម្មករ តាមច្បាប់ស្ដីពីការងារឱ្យបានត្រឹមត្រូវផង។
តំណាងកម្មករបានឱ្យដឹងថា ខាងតំណាងរោងចក្រនេះកាលពីថ្ងៃទី១១ ខែសីហា បានប្រកាសប្រាប់កម្មករ និងបុគ្គលិកថារោងចក្រក្ស័យធន បានបិទទ្វារហើយ និងបានស្នើឱ្យអាជ្ញាធរជួយដោះស្រាយផងដែរ។ ហើយនៅរសៀលថ្ងៃទី១១ ខែសីហាដដែលនោះ អាជ្ញាធរខេត្ត មន្ត្រី ក្រសួង មន្ទីការងារ បានចុះទៅពិនិត្យនៅរោងចក្រនោះផ្ទាល់ ហើយបានធ្វើកំណត់ហេតុ រាប់សម្ភារក្នុងរោងចក្រនោះ និងចាក់សោះទុកបណ្ដោះអាសន្ន ដើម្បីរង់ចាំពិភាក្សា ដោះស្រាយជូនកម្មករជាក្រោយ។
ចាប់តាំងពីពេលនោះមក កម្មករបានរង់ចាំដំណោះស្រាយពីអាជ្ញាធរ មួយសប្ដាហ៍ ហើយមួយសប្ដាហ៍ទៀត ចេះតែបាត់ដំណឹងពីដំណោះស្រាយសូន្យឈឹង និងខាងតំណាងកម្មករ បានដាក់ពាក្យបណ្ដឹងចូលតុលាការទៀតក៏មិនមានចំណាត់ការដែរទើបពួកគាត់ជាកម្មករនាំគ្នាធ្វើបាតុកម្មបិទផ្លូវនៅខាងមុខរោងចក្រនេះ ដែលជាជម្រើសចុងក្រោយ។ កម្មករលើកឡើងថា ពួកគេនឹងបន្តធ្វើបាតុកម្មបិទផ្លូវបន្តទៀត បើថៅកែរោងចក្រ និងអាជ្ញាធរមិនព្រមដោះស្រាយជូនកម្មករតាមច្បាប់ស្ដីពីការងារទេនោះ។
លោក យ៉ែម វន្ថា អភិបាលរងស្រុកស្អាង បានប្រាប់ឱ្យដឹងថាក្រុមកម្មករ ធ្វើបាតុកម្មបិទផ្លូវជាតិពីរថ្ងៃនេះ ខាងអាជ្ញាធរ និងមន្ត្រី មន្ទីរការងារ បានទៅពន្យល់ណែនាំដល់កម្មករ ឲ្យបើកផ្លូវជាតិវិញ ប៉ុន្តែក្រុមកម្មករមិនស្ដាប់តាមការណែនាំទេ បើទោះបីអាជ្ញាធរបានសន្យាថានឹងរកដំដោះស្រាយជូនកម្មករឲ្យបានឆាប់ៗខាងមុខនេះក្ដី។ គួរបញ្ជាក់ថា កាលពីរសៀលថ្ងៃទី១៦ ខែកញ្ញា កន្លងទៅនេះកម្មកររោងចក្រនេះ បាននាំគ្នាទៅឈរលើកបដានៅខាងមុខ សាលាដំបូងខេត្តកណ្ដាល ដើម្បីស្នើសុំឱ្យស្ថាប័ន តុលាការ ជួយរកយុត្តិធម៌ តាមច្បាប់ឱ្យកម្មករ បន្ទាប់ពីរោងចក្រនេះក្ស័យធនបិទទ្វារ។
លោក លឹម សុគន្ថា ព្រះរាជ្ញាសាលាដំបូងខេត្តកណ្ដាលបានប្រាប់ឱ្យដឹងថា ក្រោយពីរោងចក្រនេះក្ស័យធនបិទទ្វារ និងបន្ទាប់ពីមានបណ្ដឹង ពីតំណាងកម្មករ អាជ្ញាធរ និងព្រះរាជ្ញាសាលាដំបូងខេត្តបានធ្វើកំណត់ហេតុ និងរាប់សម្ភារនៅក្នុងរោងចក្រ និងបានចេញដីការក្សារការរួចរាល់ ព្រមទាំងបានប្រកាស ដាក់លក់សម្ភារៈនៅក្នុងរោងចក្រនេះទាំងស្រុងផងដែរដើម្បីយកលុយមកសងឲ្យកម្មករ ប៉ុន្តែមិនទាន់មានអ្នកដាក់ពាក្យទិញនៅឡើយទេ។ លោកព្រះរាជអាជ្ញា បានពន្យល់ពីនីតិវិធីរបស់តុលាការដល់តំណាងកម្មករ ក្រុមកម្មករក៏បាននាំគ្នាត្រឡប់ ទៅវិញផងដែរ៕
ចែករំលែកព័តមាននេះ