នៅក្រុងគីនសាសា រដ្ឋធានីសាធារណរដ្ឋប្រជាធិបតេយ្យកុងហ្គោផ្ទុះបាតុកម្មហិង្សាមានលក្ខណៈនយោបាយកាលពីថ្ងៃទី១៩ កញ្ញា ដែលពួកប្រឆាំងមានបំណងធ្វើសកម្មភាពរហូតទល់តែប្រធានាធិបតីលោក JOSEPH KABILA ចាកចេញពីអំណាចក្រោយចប់អាណត្តិរបស់លោកនាថ្ងៃទី២០ ធ្នូ ។
តុល្យការនៃការប៉ះទង្គិចគ្នានៅក្រុងគីនសាសា យោងតាមអាជ្ញាធរថា អ្នកស្លាប់មានចំនួន១៧នាក់ តែពួកប្រឆាំងថា មានដល់៥០នាក់។ ពួកប្រឆាំងអំពាវនាវឱ្យធ្វើបាតុកម្មក្នុងទូទាំងប្រទេស ដើម្បីបង្ហាញកម្លាំងដល់លោក KABILA ហើយទាមទារឱ្យលោកចាកចេញពីអំណាចឱ្យទាន់ពេល ។ ទាំងរដ្ឋអំណាច ទាំងពួកប្រឆាំងសុទ្ធតែទម្លាក់ការទទួលខុសត្រូវដាក់គ្នាទៅវិញទៅមកចំពោះអំពើហិង្សាបង្ហូរឈាមទាំងនេះ ដែលដូចកាលពីឆ្នាំ២០១៥ដែរ ខណៈមានការបះបោរដែលពុំអាចគ្រប់គ្រងបានទាំងសងខាងក្រោយការបង្ក្រាប ដោយកម្លាំងបាតុកម្មប្រឆាំងលោក KABIA ក្នុងរដ្ឋធានី ។ ពេលនេះគេរាប់ឃើញមនុស្សជាច្រើនសិបនាក់ស្លាប់ក្នុងរយៈពេលតែ៣ថ្ងៃ ។
រដ្ឋមន្ត្រីមហាផ្ទៃកុងហ្គោ លោក EVARISTE BOSHAD អះអាងប្រាប់សារព័ត៌មានថា ក្រុងគីនសាសា ទើបប្រឈមមុខនឹងចលនាបះបោរមួយ ដែលរងបរាជ័យ ។ តុល្យការបណ្តោះអាសន្នមានមនុស្សស្លាប់១៧នាក់ ក្នុងនោះមានប៉ូលិស៣នាក់ និងជនស៊ីវិល១៤នាក់ ក្នុងចំណោមពួកអ្នកឆ្លៀតឱកាសប្លន់យកទ្រព្យគេពេលបះបោរ ។
ចំណែកពួកប្រឆាំងវិញនិយាយថា មានមនុស្សស្លាប់ដល់ទៅជាង៥០នាក់ ដោយសារគ្រាប់កាំភ្លើងរបស់ប៉ូលិស និងកងឆ្មាំសាធារណរដ្ឋ ។ ក្រុមចម្រុះប្រឆាំងអំពាវនាវឱ្យបន្តធ្វើបាតុកម្មរហូតដល់ការចាកចេញជាស្ថាពររបស់លោក KABILA ពីប្រមុខរដ្ឋ ។
អ្នកនាំពាក្យរដ្ឋាភិបាលលោក LAMBERT MENDE ថ្លែងតាមទូរទស្សន៍រដ្ឋថា បទបញ្ជានឹងត្រូវគោរព ហើយបណ្តាពលរដ្ឋស្លូតត្រង់នឹងត្រូវការពារ ។ មុននេះលោក MENDE បានចោទប្រកាន់គណបក្សសម្ព័ន្ធភាព ដើម្បីលទ្ធិប្រជាធិបតេយ្យ និងរីកចម្រើនសង្គម CIDP ជាគណបក្សប្រឆាំងសំខាន់ថា ជាប្រភពនៃអំពើហិង្សា ៕
ចែករំលែកព័តមាននេះ