រាជធានីភ្នំពេញ ៖ សមត្ថកិច្ចរាជធានីភ្នំពេញ បានអះអាងថា កងកម្លាំងគ្រប់ផ្នែកត្រូវបានប្រមូលផ្តុំកម្លាំងឱ្យបានគ្រប់ចំនួន នៅតាមវេនប្រចាំការដែលបានកំណត់ មានការបែងចែកកម្លាំងទៅតាមគោលដៅ តាមវេន ជាពិសេសពេលយប់ មានការត្រួតពិនិត្យឱ្យបានហ្មត់ចត់ មានការផ្គត់ផ្គង់របបហូបចុកឱ្យបានត្រឹមត្រូវ ដើម្បីធានាបាននូវកិច្ចប្រតិបត្តិការប្រកបដោយប្រសិទ្ធភាព។
កម្លាំងចម្រុះសរុបចំនួន៥៦៤នាក់ ដែលត្រូវបែងចែកទៅគោលដៅវត្តអារាមចំនួន១៥០វត្ត និងសាលាឆទានចំនួន៤សាលា ជាពិសេសកម្លាំងបានត្រៀមប្រចាំការទាំងយប់ទាំងថ្ងៃ នៅតំបន់រមណីយដ្ឋានវត្តភ្នំ ដែលជាទីតាំងរៀបចំកម្មវិធីសង្ក្រាន្ត ដោយសារទីតាំងនោះ មានប្រជាពលរដ្ឋទៅលេងកម្សាន្តច្រើន។
ថ្លែងក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ កាលពីល្ងាចថ្ងៃទី ៥ខែមេសាកន្លងមកនេះ លោកឧត្តមសេនីយ៍ឯក ស ថេត អគ្គស្នងការរង និងជាស្នងការ នៃស្នងការដ្ឋាននគរ បាលរាជធានីភ្នំពេញ បានឱ្យដឹងថា កម្លាំងនគរបាលចម្រុះបានត្រៀមប្រចាំការនៅតាមគោលដៅសំខាន់ៗជាច្រើន នៅក្នុងរាជធានីភ្នំពេញ ពិសេសនៅតំបន់ទីវត្តអារាម និងតំបន់រមណីយដ្ឋានវត្តភ្នំ ដែលជាកន្លែងរៀបចំកម្មវិធីសង្ក្រាន្តកម្សាន្តសប្បាយ សំដៅធានាឱ្យបាននូវសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម អំឡុងពេលដែលប្រជាពលរដ្ឋនៅរាជធានីភ្នំពេញ ប្រារព្ធពិធីបុណ្យចូលឆ្នាំថ្មីប្រពៃណីជាតិ ឆ្នាំខាល ចត្វាស័ក ព.ស ២៥៦៥ ធ្វើយ៉ាងណាឱ្យប្រជាពលរដ្ឋមានការសប្បាយរីករាយ។
ការត្រៀមវិធានការការពារទុកជាមុននេះ គឺដើម្បីបង្កើនប្រសិទ្ធភាពទប់ស្កាត់សកម្ម ភាពបង្កការរំខាននានា ដែលអាចបង្កការគំរា.មកំហែងនៅតាមទីវត្តអារាម កន្លែងសប្បាយភាពនៅតាមរមណីយដ្ឋាន កន្លែងប្រមូលផ្តុំ តាមដងផ្លូវសំខាន់ៗក្នុងរាជធានីភ្នំពេញ។
លោកឧត្តមសេនីយ៍ឯក ស ថេត បានឱ្យដឹងទៀតថា កងកម្លាំងគ្រប់ផ្នែកត្រូវបានប្រមូលផ្តុំកម្លាំងឱ្យបានគ្រប់ចំនួន នៅតាមវេនប្រចាំការដែលបានកំណត់ មានការបែងចែកកម្លាំងទៅតាមគោលដៅ តាមវេន ពិសេសពេលយប់ មានការត្រួតពិនិត្យឱ្យបានហ្មត់ចត់ មានការផ្គត់ផ្គង់របបហូបចុកឱ្យបានត្រឹមត្រូវ ដើម្បីធានាបាននូវកិច្ចប្រតិបត្តិការប្រកបដោយប្រសិទ្ធភាព។
លោកបន្តថា កម្លាំងចម្រុះសរុបចំនួន៥៦៤នាក់ ដែលត្រូវបែងចែកទៅគោលដៅវត្តអារាមចំនួន១៥០វត្ត និងសាលាឆទានចំនួន៤សាលា ជាពិសេសកម្លាំងបានត្រៀមប្រចាំការទាំងយប់ទាំងថ្ងៃ នៅតំបន់រមណីយដ្ឋានវត្តភ្នំ ដែលជាទីតាំងរៀបចំកម្មវិធីសង្ក្រាន្ត ដោយសារទីតាំងនោះ មានប្រជាពលរដ្ឋទៅលេងកម្សាន្តច្រើន ។
ជាងនេះទៅទៀត កម្លាំងទាំងអស់នឹងត្រូវចូលរួមទប់ស្កាត់ឱ្យខាងតែបានការលេងបាញ់ទឹកនៅតាមទីតាំងកម្សាន្តនានាតាមអនុសាសន៍របស់ឯកឧត្តមឃួង ស្រេង អភិបាលរាជធានីភ្នំពេញ ដោយសារការលេងបែបនេះ គឺបានបង្កហានិភ័យខ្ពស់នៃការចម្លងជំងឺកូវីដ១៩ បង្កគ្រោះថ្នាក់នានា ជាពិសេសប៉ះពាល់ដល់ប្រពៃណីខ្មែរថែមទៀតផង។
នាយឧត្តមសេនីយ៏៍ បានបញ្ជាក់ថា «រដ្ឋបាលរាជធានីភ្នំពេញ បានត្រៀមលក្ខណៈរួចរាល់ក្នុងការទទួល រៀបចំកម្មវិធីសង្ក្រាន្តឆ្នាំថ្មីនៅទីតាំងតំបន់ប្រវត្តិសាស្ត្រវត្តភ្នំ ហើយនៅតាមវត្តទាំង១៥០ទូទាំងរាជធានីភ្នំពេញ ក៏ត្រូវរៀបចំកម្មវិធីទទួលទេវតាឆ្នាំថ្មី និងការរៀបចំកម្មវិធីកម្សាន្តសប្បាយមានរាំច្រៀង លេង ល្បែងប្រជាប្រិយខ្មែរ ដើម្បីទទួលអំណរទេវតាឆ្នាំថ្មីជំរុញឱ្យរដ្ឋបាលខណ្ឌ និងកងកម្លាំងចម្រុះត្រូវតែពង្រឹងវិធានការការពារសន្តិសុខសណ្តាប់ធ្នាប់នៅគ្រប់ទីកន្លែង កម្សាន្តសប្បាយ ដើម្បីធ្វើយ៉ាងណាបង្កើនភាពកក់ក្តៅ សុវត្ថិភាព និងសន្តិសុខសណ្តាប់ធ្នាប់ជូនដល់ប្រជាពលរដ្ឋដែលមកលេងកម្សាន្តប្រកបដោយភាពសប្បាយរីករាយ និងគ្មានឧបសគ្គណាមួយមករំខាន។
សូមបញ្ជាក់ថា នៅក្នុងឱកាសពិធីបុណ្យចូលឆ្នាំថ្មីប្រពៃណីជាតិឆ្នាំខាល ចត្វាស័កពុទ្ធសករាជ ២៥៦៥ នឹងត្រូវប្រព្រឹត្តឡើងចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២២ រដ្ឋបាលរាជធានីភ្នំពេញ ក្រៅពីការរៀបចំសន្តិ សុខសណ្តាប់ធ្នាប់ និងកម្មវិធីកម្សាន្តសប្បាយហើយនោះ គឺបានរៀបចំសោភ័ណភាពទីក្រុង និងការតុបតែងលម្អភ្លើងចម្រុះពណ៌នៅតាមដងផ្លូវ និងតំបន់រមណីយដ្ឋានវត្តភ្នំ ដើម្បីទទួលស្វាគមន៍ភ្ញៀវទេសចរមកលេងកម្សាន្តនិងទទួលអំណរទេវតាឆ្នាំថ្មី៕
ចែករំលែកព័តមាននេះ