រៀបចំពិធីដាក់បណ្ដាសាពេលសាលាដំបូងកាត់ទោស
រាជធានីភ្នំពេញ ៖ បន្ទាប់ពីដំណើរការសវនាការអស់ជាច្រើនម៉ោង លោក លី សុខលេង ចៅក្រមជំនុំជម្រះសាលាដំបូងរាជធានីភ្នំពេញ នៅព្រឹកថ្ងៃទី១៩ កញ្ញា …
រាជធានីភ្នំពេញ ៖ បន្ទាប់ពីដំណើរការសវនាការអស់ជាច្រើនម៉ោង លោក លី សុខលេង ចៅក្រមជំនុំជម្រះសាលាដំបូងរាជធានីភ្នំពេញ នៅព្រឹកថ្ងៃទី១៩ កញ្ញា បានសម្រេចប្រកាសសាលក្រមផ្ដន្ទាទោសលើស្ត្រីសកម្មជនដីធ្លីបឹងកក់៤នាក់ ដាក់ពន្ធនាគារក្នុងម្នាក់ៗ ៦ខែ ដោយគ្មានពិន័យជាប្រាក់ទេ ក្រោមការចោទប្រកាន់ពីបទ «ប្រមាថអ្នករាជការសាធារណៈ និងបទប្រឆាំងនឹងអ្នករាជការសាធារណៈ មានស្ថានទម្ងន់ទោស តាមមាត្រា៥០២ និងមាត្រា៥០៤ នៃក្រមព្រហ្មទណ្ឌ ដែលបទល្មើសនេះ បានប្រព្រឹត្តនៅមុខសាលារាជធានីភ្នំពេញ កាលពីថ្ងៃទី២៨ ខែវិច្ឆិកា ឆ្នាំ២០១១ ។
ជនជាប់ចោទក្នុងសំណុំរឿងនេះ មានស្ត្រីជាសកម្មជនដីធ្លីបឹងកក់ទាំង៤នាក់ ដែលល្បីមុខល្បីឈ្មោះ ខាងធ្វើបាតុកម្មពហុវិស័យ ១-ឈ្មោះ ទេព វន្នី បច្ចុប្បន្នកំពុងជាប់ឃុំក្នុងពន្ធនាគារ និង៣នាក់ទៀត ឈ្មោះ បូ ឆវី ឈ្មោះ គង់ ចន្ថា និងឈ្មោះ ហេង មុំ ។ ៣នាក់នេះស្ថិតនៅក្រៅឃុំ ប៉ុន្តែនៅពេលសវនាការឈ្មោះ បូ ឆវី និងស្ត្រីឈ្មោះ គង់ ចន្ថា មានវត្តមាននៅមុខរង្វង់មូលក្រចកសេះជាមួយអ្នកស្រី ទេព វន្នី ដែរ ។ ដោយឡែកឈ្មោះ ហេង មុំ បានកាត់ទោសកំបាំងមុខ ពោលគឺពុំបានបង្ហាញមុខក្នុងសវនាការទេ ។
សំណុំរឿង ដែលសាលាដំបូងលើកយកមកចោទប្រកាន់ស្ត្រីសកម្មជនដីធ្លីបឹងកក់នេះ គឺសាលារាជធានីភ្នំពេញជាដើមបណ្ដឹង ។ សាលក្រមបានទុកពេលចំនួន៣០ថ្ងៃ សម្រាប់ជនជាប់ចោទប្តឹងទាស់ទៅសាលាឧទ្ធរណ៍ បើមិនសុខចិត្តនូវការកាត់ក្តីនេះ ។ ក្រោយពីប្រកាសសាលក្រមហើយ ជនជាប់ចោទអ្នកស្រី ទេព វន្នី ត្រូវបានអនុរក្សនាំទៅឃុំខ្លួននៅពន្ធនាគារព្រៃសវិញ រីឯជនជាប់ចោទឈ្មោះ បូ ឆវី និងឈ្មោះ គង់ ចន្ថា អនុញ្ញាតិឲ្យទៅផ្ទះប្រកមុខរបររកស៊ីជាធម្មតា ។
គេបានសង្កេតឃើញថា ក្រោយពីសាលក្រមសាលាដំបូងរាជធានីភ្នំពេញ ត្រូវបានប្រកាសផ្តន្ទាទោសលើជនជាប់ចោទទាំង៤នាក់ ឲ្យមានទោស ខណ:អនុរក្សពន្ធនាគារនាំអ្នកស្រី ទេព វន្នី តែម្នាក់ឯង ទៅឃុំខ្លួននៅព្រៃសនោះ ស្ត្រីឈ្មោះ បូ ឆវី និងគង់ ចន្ថា ដែលមានទោសដូចគ្នា តែមិនត្រូវបានចាប់ឱ្យអនុវត្តន៍ទោស បានស្រែកឡាំប៉ានៅចំពោះមុខចៅក្រមជំនុំជម្រះថា ការកាត់ក្តីជារឿងអយុត្តិធម៍ ។ ជាងនេះទៀត ជនជាប់ចោទទាំង២នាក់ បានមានបំណងឡើងជិះរថយន្តអនុរក្សពន្ធនាគារ ចង់ទៅនៅពន្ធនាគារជាមួយអ្នកស្រី ទេព វន្នី ដែរ ព្រោះជាសកម្មជនស្លាប់រស់ជាមួយ តែត្រូវបានសមត្ថកិច្ចឃាត់ និងបានណែនាំថា ទោសក្រោម១ឆ្នាំមិនតម្រូវឲ្យដេកពន្ធនាគារទេ ទៅដេកផ្ទះមើលកូនមើលប្ដីទៅ ក្រោមមួយឆ្នាំគុកមិនឱ្យដេកទេ ។
នៅព្រឹកថ្ងៃបើកសវនាការលើសំណុំរឿងស្ត្រីសកម្មជនដីធ្លីបឹងកក់៤នាក់នោះ មានអ្នកបឹងកក់រាប់សិបនាក់ បានទៅគាំទ្រ ខ្លះមានកាន់បដាតូចៗ ទៅឈរនៅពីមុខអគារសាលាដំបូង ដោយមិនបានធ្វើសកម្មភាពអ្វីឲ្យប៉ះពាល់ដល់សណ្តាប់ធ្នាប់សាធារណ:ធ្ងន់ធ្ងរទេ គ្រាន់តែខ្លះលើកបដាទាមទារឱ្យដោះលែងអ្នកស្រី ទេព វន្នី និងខ្លះបានរៀបចំពិធីដូចគេបែរបន់ ដោយដាក់រូបទីងមោង មានដីខ្សាច់ផ្លែឈើផ្លែចេក ដែលអ្នកខ្លះយល់ថា រៀបចំដាក់បណ្ដាសាផងដែរ។ ក្នុងនោះដែរសមត្ថកិច្ចនគរបាលខណ្ឌ៧មករា និងកម្លាំងប្រជាការពារ ដែលដឹកនាំផ្ទាល់ដោយលោក លីម សុភា អភិបាលខណ្ឌ៧មករា បានចុះទៅរៀបចំសណ្តាប់ធ្នាប់ និងសម្រួលចរាចរណ៍លើដងផ្លូវមិនឲ្យកកស្ទះដល់អ្នកធ្វើដំណើរ ។ ក្នុងពេលបើកសវនាការនេះ ឃើញមានវត្តមានលោកស្រី មួរ សុខហួរ អ្នកតំណាងរាស្ត្រគណ:បក្សសង្គ្រោះជាតិ ចូលរួមស្តាប់ដែរ ។ ក្រៅពីនោះមានអ្នកសារព័ត៍មាន ក្រុមអង្គការសង្គមស៊ីវិល និងអ្នកឃ្លាំមើលផ្នែកសិទ្ធិមនុស្សផងដែរ ៕
ចែករំលែកព័តមាននេះ