កំពុងរៀបចំចង្ហាន់ ទាំងព្រះសង្ឃទាំងពុទ្ធបរិស័ទរត់ចេញពីក្នុងសាលាឆាន់
រាជធានីភ្នំពេញ ៖ ខណៈព្រះសង្ឃកំពុងសូត្រធម៌សម្មាទានសីលឆាន់ចង្ហាន់ថ្ងៃត្រង់ ស្រាប់តែឮសំឡេងគ្រឹប បង្កឱ្យមានការភ្ញាក់ផ្អើល និងនាំគ្នារត់ចេញពីសាលាឆាន់ …
រាជធានីភ្នំពេញ ៖ ក្រោយពីមានឧប្បទ្ទវហេតុបាក់ស្រុតធ្នឹមពិដាន និងក្បាលសសរនៅក្នុងសាលាឆាន់មួយដែលមានវ័យចំណាស់ និងអាយុកាលប្រមាណជាជិត៦០ឆ្នាំទៅហើយនោះ បានបង្កឱ្យមានការភ្ញាក់ផ្អើលកើតឡើងទៅដល់ព្រះសង្ឃជាច្រើនអង្គ និងពុទ្ធបរិស័ទ្ធដែលកំពុងប្រារព្ធពិធីបុណ្យកាន់បិណ្ឌក្នុងវេនទី៣ទាំងព្រឹកនៅក្នុងវត្តមហាមន្ត្រី ហើយព្រះសង្ឃ និងគណៈកម្មការវត្តក៏ប្រជុំសម្រេចចាក់សោបិទទ្វារសាលាឆាន់ខាងលើ និងធ្វើរោងថ្មីមួយទៀតដើម្បីឱ្យពុទ្ធបរិស័ទអញ្ជើញមកចូលរួមធ្វើបុណ្យកាន់បិណ្ឌបានរហូតទៅដល់ចប់ចុងចប់ដើមក្នុងកម្មវិធីបុណ្យភ្ជុំបិណ្ឌទៅតាមប្រពៃណីជាធម្មតាវិញ ។
ហេតុការណ៍បាក់ធ្នឹមសាលាឆាន់នេះបានកើតឡើងកាលពីវេលាម៉ោង១០ និង៤៥នាទីព្រឹក ថ្ងៃទី១៩ ខែកញ្ញា ឆ្នាំ២០១៦ នៅក្នុងវត្តមហាមន្ត្រី ដែលមានទីតាំងនៅតាមបណ្តោយផ្លូវព្រះសីហនុ សង្កាត់អូឡាំពិក ខណ្ឌចំការមន រាជធានីភ្នំពេញ ។
ព្រះសង្ឃព្រះនាម ជឹម សុភាព ព្រះវិន័យធម៌វត្តមហាមន្ត្រី មានសង្ឃដីកា ឱ្យដឹងថា ក្រោយពីកើតមានឧប្បទ្ទវហេតុដោយសារតែការបាក់ស្រុតធ្នឹមសាលាធម្មសភា(សាលាឆាន់)ត្រង់ក្បាលសសរ និងធ្នឹមពិដាន ដែលបង្កឱ្យមានការភ្ញាក់ផ្អើលដល់ព្រះសង្ឃជាច្រើនអង្គ និងពុទ្ធបរិស័ទទាំងចាស់ទាំងក្មេងយ៉ាងច្រើនកុះករខណៈកំពុងប្រារព្ធពិធីកាន់បិណ្ឌក្នុងវេនទី៣កាលពីព្រឹកមិញនោះ គណៈកម្មការវត្ត និងព្រះសង្ឃក៏បានបង្កើតគណៈកម្មការមួយធ្វើការប្រជុំពិភាក្សាគ្នា ដើម្បីធ្វើយ៉ាងណាឲ្យពុទ្ធបរិស័ទបានចូលរួមធ្វើបុណ្យកាន់បិណ្ឌឲ្យបានចប់ចុងចប់ដើមជាធម្មតាវិញ ដោយគណៈកម្មការវត្ត និងព្រះសង្ឃបានសម្រេចធ្វើជារោងបុណ្យមួយដែលមានទីតាំងនៅខាងចំពីមុខសាលាឆាន់កើតហេតុខាងលើនេះ និងសម្រេចចាក់សោបិទទ្វារសាលាឆាន់ខាងលើទាំងស្រុងតែម្តង ដើម្បីជៀសវាងបង្កគ្រោះថ្នាក់ជាយថាហេតុណាមួយកើតឡើងទៅដល់ព្រះសង្ឃដែលគង់នៅក្នុងវត្ត ក៏ដូចជាពុទ្ធបរិស័ទ ដែលបានចូលមកធ្វើបុណ្យផងដែរ ។
ព្រះអង្គក៏មានសង្ឃដីកាបន្តទៀតថា មុនពេលកើតហេតុពេលដែលព្រះសង្ឃជាច្រើនអង្គ និងពុទ្ធបរិស័ទមកពីទីជិតទីឆ្ងាយយ៉ាងច្រើនកុះករកំពុងតែចូលរួមបុណ្យកាន់បិណ្ឌក្នុងវេនទី៣ ដោយរៀបចំចង្ហាន់ថ្ងៃត្រង់យ៉ាងសំបូរបែបដើម្បីប្រគេនព្រះសង្ឃនោះ ខណៈព្រះសង្ឃកំពុងតែសូត្រធម៌សម្មាទានសីលឆាន់ចង្ហាន់ថ្ងៃត្រង់នៅក្នុងសាលាឆាន់ខាងលើនោះ ស្រាប់តែឮសំឡេងលាន់គ្រឹប និងមានធ្លាក់កំទេចថ្មពីលើពីដានផងដែរ បន្ទាប់មកក៏ឃើញមានស្នាមប្រេះ២កន្លែងនៅលើធ្នឹមពីដាន និងក្បាលសសរ បង្កឱ្យមានការភ្ញាក់ផ្អើល និងនាំគ្នារត់ចែកជើងគ្នាចេញពីសាលាឆាន់មួយនោះមកខាងក្រៅ ខ្លាចក្រែងមានការបាក់រលំដោយប្រការណាមួយ តែទោះជាយ៉ាងណាគ្មានបង្កគ្រោះថ្នាក់ដល់មនុស្សឡើយ ។
សូមបញ្ជាក់ថា កាលពីរដូវបុណ្យភ្ជុំបិណ្ឌកាលពីឆ្នាំ២០១៥កន្លងទៅ សាលាឆាន់ខាងលើធ្លាប់មានការបាក់ធ្លាក់ផ្ទាំងបេតុងម្តងរួចមកហើយ តែមិនបណ្តាលឲ្យមានមនុស្សណាម្នាក់រងគ្រោះថ្នាក់ដែរ ។ ម្យ៉ាងទៀតសាលាឆាន់ខាងលើនេះមានវ័យចំណាស់ណាស់ទៅហើយ ដោយបានកសាងតាំងពីឆ្នាំ១៩៥៩មកម្ល៉េះ រហុតមកដល់ពេលនេះគឺមានអាយុកាល៥៧ឆ្នាំទៅហើយ ទើបមានសភាពចាស់ទ្រុឌទ្រោម និងស្រុតបាក់ធ្នាក់ធ្នឹមបែបនេះកើតឡើង ៕
ចែករំលែកព័តមាននេះ